दुबई– यमनको प्रमुख नाकाका रुपमा रहेको होडेडा बन्दरगाह सहर कब्जा गरेर बसेका यमनी विद्रोही समूहहरु युद्धविराम सम्झौता अनुसार उक्त सहरबाट फिर्ता हुन थालेको राष्ट्रसङ्घका एक अधिकारीले बताएका छन्।
नाम बताउन नचाहने ती अधिकारीले शुक्रबार मध्यरातबाट हुथी विद्रोही समूह होडेडाबाट फिर्ता हुन थालेको बताएका हुन्।
हुथी विद्रोहीद्वारा सञ्चालित साबा समाचार संस्थाले एक विद्रोही नेताको भनाई उद्धृत गर्दै हुथी विद्रोही समूहले पहिलो चरणको फिर्ता हुने कार्य थालिसकेको जनाएको छ। विद्रोहीले एक समारोहको आयोजना गरी होडेडा छोड्न थालेका थिए।
विद्रोहीले होडेडा शहर छाडेसँगै भोकमरीको समस्यामा रहेका झण्डै १ करोड ४० लाख मानिसलाई खाद्यान्न सहयोग गर्न सकिने छ। राष्ट्रसङ्घको अगुवाइमा भएको युद्धविराम गत डिसेम्बर ८ बाट कार्यान्वयनमा आएको हो।
उक्त सहरमा रहेका सरकार समर्थित सैनिक पनि फिर्ता हुन लागेका छन्। गत जुन १३ देखि साउदी गठबन्धनको भीषण हवाई आक्रमणपश्चात केही भागमा यमनी सेना तैनाथ गरिएको छ।
राष्ट्रसङ्घ सुरक्षा परिषद्ले गत साता युद्धविरामको अवस्था अनुगमन गर्न एक टोली होडेडा पठाउन सर्वसम्मत निर्णय गरेको थियो।
विश्व स्वास्थ्य संगठनका अनुसार सन् २०१५ देखि भड्किएको गृहयुद्धका कारण यमनमा १० हजारभन्दा बढी नागरिकको मृत्यु भइसकेको छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
