काठमाडौं। युक्रेनको खार्किभमा सोमबार रुसी आक्रमणमा कम्तीमा चार जनाको मृत्यु भएको छ।
खार्किभका मेयर इहोर तेरेखोभका अनुसार निर्देशित हवाई बमबाट भएको आक्रमणमा कम्तीमा तीन जनाको मृत्यु भएको छ भने तीन बालबालिकासहित ३९ जना घाइते भएका छन्। आक्रमणबाट प्रभावित आवासीय भवनको भग्नावशेषमा मानिसहरू फसेको हुनसक्ने भन्दै खोज तथा उद्धार अभियान सञ्चालन गरिएको छ।
त्यसअघि आइतबार राति रुसी ड्रोन आक्रमणमा खार्किभको इन्डस्ट्रियल्नी जिल्लामा थप एक जनाको मृत्यु भएको थियो। आक्रमणमा सवारीसाधन र एउटा प्रशासनिक भवनमा आगलागी हुनुका साथै आवासीय भवनहरूमा क्षति पुगेको थियो।
डोनेट्स्क क्षेत्रको स्लोभियान्स्क समुदायमा भएको छुट्टै रुसी आक्रमणमा पनि एक जनाको मृत्यु भएको स्थानीय अधिकारीले बताएका छन्। युक्रेनी वायुसेनाका अनुसार सोमबार बिहानसम्म रुसले रातभर २०५ वटा ड्रोन प्रहार गरेको थियो, जसमध्ये १७२ वटा खसालिएको वा निष्क्रिय पारिएको थियो।
युक्रेनका राष्ट्रपति भोलोदिमिर जेलेन्स्कीले रुसी ड्रोन आक्रमणका कारण कृष्णसागरमा एउटा व्यावसायिक पानीजहाजमा आगलागी भएर पछि डुबेको बताएका छन्। रोमानियाली अधिकारीका अनुसार घटनामा दुई जनाको मृत्यु भएको थियो भने ११ जना चालक दलका सदस्यको उद्धार गरिएको थियो।
युक्रेनले जेट इन्जिनयुक्त रुसी ड्रोनविरुद्ध कृत्रिम बुद्धिमत्ता (एआई) प्रविधिमा आधारित स्वचालित बन्दुक प्रणाली प्रयोग गरेको दाबीसमेत गरेको छ।
युक्रेनी राष्ट्रपति कार्यालयका सल्लाहकार सेर्ही बेस्क्रेस्नोभका अनुसार राजधानी किभमा १२ वटा स्वचालित टरेट जडान गरिएको छ। युक्रेनी वायुसेनाले यी प्रणाली प्रयोग गरेर जेट इन्जिनयुक्त रुसी ड्रोन खसालेको पहिलोपटक भएको जनाएको छ।
यसैबीच, रुसी रक्षा मन्त्रालयले रुसका विभिन्न क्षेत्र, क्रिमिया र कृष्णसागरमाथि रातभर १९९ वटा युक्रेनी ड्रोन खसालेको दाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
