काठमाडौं- सहिद स्मारक ‘ए’ डिभिजन लिगको आठौं उपाधि जित्ने संघारमा छ, मनाङ मर्स्याङ्दी क्लब। मनाङले आज दिउँसो २:३० संकटा क्लबसँग प्रतिस्पर्धा गर्दैछ। यो खेलमा जित हात पारे मनाङ २ खेल अघि नै लिग च्याम्पियन बन्नेछ।
हार बेहोरेको खण्डमा मनाङको पाधि यात्रामा समेत धक्का लाग्न सक्छ। लिगको दशौं चरणको खेल सकिदा मनाङले सबै खेल जित्दै ३० अंक जोडेको छ। दोस्रो स्थानको संकटाको २५ अंक छ।
जारी लिगमा १० मध्ये ८ खेलमा जित हात पारिसकेको संकटालाई रोक्न मनाङलाई सहज देखिन्न। संकटामा विशेषगरी ३ विदेशी खेलाडीले प्रभावशाली खेल पस्किरहेका छन्। डिफेन्समा ताम्पी अरनेस्ट, मिडफिल्डमा सेड्रीक अबा र फरवार्डमा एलोन म्याक्सवेलले संकटालाई महत्वपूर्ण योगदान दिएका छन्। यी तीन खेलाडीलाई रोक्न सके मात्र मनाङले रेकर्ड बनाउने लक्ष्य अघि बढ्नेछ।
जारी लिगमा कमजोर मानिएका टिमसँग पनि अपेक्षाअनुरुप गोल गर्न नसक्नु मनाङको कमजोर पक्ष हो। मनाङले पुछारमा संघर्ष गरिरहेका जावलाखेल युथ क्लब र मच्छिन्द्र क्लबविरुद्ध १–० को जित निकालेको थियो।
आइतबार एन्फा कम्प्लेक्स सातदोबाटोमा भएको दशौं चरणको खेलमा नेपाल पुलिस क्लबमाथि १–० को जित निकालेसँगै घरेलु फुटबलको सर्वाधिक लिग विजेता मनाङ आठौं उपाधिको नजिक पुगेको थियो।
मनाङले २०४३, २०४४ र २०४६ गरी लगातार तीन पटक उपाधि जितेको थियो। यस्तै मनाङले २०५७ र २०६० मा पनि लिगको उपाधि उचालेको थियो। २०६२ मा लिगको उपाधि जित्दै मनाङले सर्वाधिक लिग जित्ने रानीपोखरी कर्नर टिमको रेकर्डसँग बराबरी गरेको थियो। पछिल्लो पटक २०७० सालमा लिग च्याम्पियन बनेसँगै मनाङ सर्वाधिक लिग जित्ने क्लब बनेको थियो।
सिजनको लिगमा मनाङ अर्को रेकर्ड बनाउने लक्ष्यमा छ। लिगमा लगातार १० खेलमा जित हात पारेको मनाङ बाँकी रहेका ३ खेलमा पनि जित निकाल्दै शतप्रतिशत नतिजासहित उपाधि जित्न चहान्छ। अहिलेसम्म उपाधि जितेका कुनै पनि टिमले सबै खेल जितेर च्याम्पियन बनेको इतिहास छैन।
मनाङले हात पारेका जित
ब्रिगेड ब्वाइजविरुद्ध : ३–१
एनआरटीविरुद्ध : २–०
थ्रीस्टारविरुद्ध : २–१
एपिएफविरुद्ध : २–१
सरस्वती युथविरुद्ध : २–०
जावलाखेल युथविरुद्ध : १–०
मच्छिन्द्रविरुद्ध : १–०
त्रिभुवन आर्मीविरुद्ध : १–०
च्यासल युथविरुद्ध : ३–१
नेपाल पुलिसविरुद्ध : १–०
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
