काठमाडौं– कञ्चनपुरमा बलात्कारपछि हत्या गरिएकी १३ वर्षीय बालिका निर्मला पन्त प्रकरणमा थप अनुसन्धानका लागि प्रहरी महानिरीक्षक (आइजिपी) सर्वेन्द्र खनालसहितको एक टोली कञ्चनपुरतर्फ लागेको छ। प्रहरीका ३ विभागका प्रमुखसहितको टोली मंगलबार सडकमार्ग हुँदै कञ्चनपुरका लागि निस्केको हो।
निर्मला हत्याको ५ महिना बितिसक्दा पनि प्रहरीले अनुसन्धानमा कुनैपनि सफलता हात पार्न नसकिरहेको अवस्थामा प्रहरी प्रमुखसहितको टोली कञ्चनपुरतर्फ लागेको हो।
टोली मंगलबार बेलुका बुटवलमा बास बसी बुधबार बिहान कञ्चनपुरका लागि निस्केको स्रोतले बतायो।
टोलीमा आइजिपी खनालसहित केन्द्रीय अनुसन्धान ब्युरोका निर्देशक डिआइजी निरज बहादुर शाही, इन्टरपोल प्रमुख उमेशराज जाेशी, एसपी गणेश रेग्मी, आइजी सचिवालयका एसपी रामदत्त जोशी, महानगरीय प्रहरी अपराध महाशाखाका डिएसपी रुगम कुँवर, सई गजेन्द्र रावललगायत छन्।
कञ्चनपुर पुगेर टोलीले निर्मलाको हत्या भएको स्थानको समेत अवलोकन गर्ने बताइएको छ। घटनास्थल, निर्मलाका परिवार तथा स्थानीयसँग छलफल गरी अनुसन्धानका नयाँ पाटाहरुको समेत खोजी हुने बताइएको छ।
यसअघि शंकाष्पद मानी पक्राउ गरिएका तथा अनुसन्धानमा तानिएकाहरुमाथि पनि पुनः नयाँ ढंगबाट विश्लेषण गरिने छ। ‘घटनामा शंकाष्पद मानिएका आरोपीहरुको घटनापछिको चालचलन तथा दैनिकीलाई समेत प्रहरीले नियालिरहेको छ, स्थलगत अवलोकनपछि घटनामा उनीहरुको सम्बन्ध रहनसक्ने/नसक्ने बारे पनि विश्लेषण हुनेछ,’ स्रोतले भन्यो।
निर्मलाको हत्या भएको स्थानबाट नजिकै रहेको नेपाली सेनाको ब्यारेकका १६ जना सेनामाथि पनि अनुसन्धान गर्न सकिने नसकिने विषयमा पनि टोलीले आवश्यक चासो दिनेछ। निर्मलाको हत्या भएको दिन १६ जना सेना एकैपटक ब्यारेकबाट बाहिर निस्किएका थिए।
निर्मलाको हत्यापछि गठन भएका छानबिन समितिले दिएको प्रतिवेदनका आधारमा टोलीले यसअघिको अनुसन्धानमा देखिएका कमजोरीहरुलाई समेत केलाउने तथा तत्कालीन समयमा अनुसन्धानमा खटिएका प्रहरी अधिकारीहरुको कार्यसम्पादनको समेत विश्लेषण हुने स्रोतले बतायो।
बालिका पन्तको गएको साउन १० गते बलात्कारपछि हत्या भएको थियो। उनको शव हत्या भएको भोलिपल्ट नजिकैको उखुबारीमा फेला परेको थियो।
निर्मला हत्याको ५ महिना बितिसक्दा पनि सरकारले हालसम्म हत्यारा पक्राउ गर्न सकेको छैन।
यसबीचमा प्रहरीले घटनामा संलग्न रहेको आशंकामा दर्जन भन्दा बढीको डिएनए जाँच तथा दर्जनौंसँग सोधपुछ गरिसकेको छ। निर्मलाको हत्यापछि अनुसन्धानमा खटिएका तत्कालिन कन्चनपुर प्रहरी प्रमुख दिल्लीराज विष्टलगायतका प्रहरी अधिकारीको समेत डिएनए जाँच गरिएकोमा रिपोर्ट ‘नेगेटिभ’ आएको थियो।
स्थानीय दिलीपसिंह विष्ट, प्रदीप रावल तथा विशाल चौधरीलगायतको पनि डिएनए जाँच मिलेको थिएन। डिएनए नमिलेपछि विष्ट र चौधरीलाई हिरासतमुक्त गरिएपनि रावललाई अझै छोडिएको छैन। उनलाई गत मंसिर १८ गते काठमाडौंबाट पक्राउ गरिएको थियो।
रावलले आफ्नो साविती बयानका क्रममा निर्मलाको हत्या गरेको स्वीकारेका प्रहरीले बताएको थियो। सोपश्चात् उपप्रधान तथा रक्षामन्त्री ईश्वर पोखरेलले पनि हत्यारा पत्ता लागिसकेको र केहीदिनमा सार्वजनिक हुने बताएका थिए।
साेमबार मात्रै पत्रकार सम्मेलन गर्दै आइजिपी खनालले निर्मला पन्त हत्यामा अनुसन्धानको प्रगति यति नै भयो भनेर भन्न नसकिने बताएका थिए। उनले प्रहरीले अनुसन्धानमा इमानदारिताका साथ प्रयास गरिरहेको दाबीसमेत गरेका थिए। पत्रकार सम्मेलनमा आइजिपीले भनेका थिए, ‘हातमा लाग्यो शून्य भन्ने पनि छैन, यति प्रतिशत पत्ता लाग्यो भन्ने पनि छैन। यो तपाईंहरुले बुझ्नुहुन्छ।’
हत्यामा जोसुकै संलग्न भए पनि कानुनी कठघराबाट उम्कन नसक्ने उनको भनाइ थियो।
घटनाका सम्बन्धमा विभिन्न काेणबाट अनुसन्धान गरिरहेकाे बताएका आइजिपी खनाल करीब १५/१६ जना प्रहरी अधिकारीकाे टाेलीसहित कञ्चनपुरतर्फ लागेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
