काठमाडौं– नेपाली राष्ट्रिय क्रिकेट टिमले आगामी माघ दोस्रो साता युएई भ्रमण गर्ने भएको छ। युएईविरुद्ध हुने एकदिवसीय र टी–२० सिरिजका लागि नेपालले युएई भ्रमण गर्ने भएको हो। अन्तर्राष्ट्रिय क्रिकेट काउन्सिल (आइसिसी) प्रतिनिधि भावना घिमिरेले सिरिजको मिति टुंगो लागेको पुष्टि गरिन्।
घिमिरेका अनुसार सिरिज आगामी माघ ९ गते सुरु भएर माघ २१ गते सकिनेछ। त्यसबीचमा दुई टिमले ३ एकदिवसीय र ३ टी–२० सिरिज खेल्नेछन्।
घिमिरेले मितिको विषयमा आइसिसीलाई पत्राचार गरेको र उल्लेखित मितिमा सिरिज हुने पक्का जस्तै भएको नेपाल लाइभलाई जनाकारी दिइन्। सिरिजको मिति भने केहि दिनमै आइसिसीले पक्का गर्ने घिमिरेल बताइन्।सिरिज हुने यसअघि नै पक्का भएपनि मिति भने सार्वजनिक गरिएको थिएन।
नेपाल विरुद्धको सिरिजका लागि युएईका नियमित कप्तान रोहान मुस्ताफासहित ३ महत्वपूर्ण खेलाडी उपलब्ध हुनेछैनन्। मुस्ताफासहित अहमेद राजा र रमीज साहजादलाई युएईको क्रिकेट बोर्डले गत साता ८ साताको लागि निलम्बन गरेको थियो। पाकिस्तानमा भएको इमर्जिङ टिम्स एसिया कपको व्यवस्थापनप्रति सामाजिक सञ्जालमा असन्तुष्टि जनाउँदै प्रतिक्रिया दिएपछि उनीहरुलाई निलम्बन गरिएको हो।
गत वर्ष एकदिवसीय मान्यता पाएपछि नेपालले तेस्रो पटक एकदिवसीय खेल खेल्न लागेको हो। नेपालले यसअघि नेदरल्यान्ड्सविरुद्ध २ खेलको एकदिवसीय खेल खेलेको थियो। २ मध्ये नेपालले १ खेलमा जित र १ खेलमा हार बेहोरेको थियो। त्यस्तै गत सेप्टेम्बरमा भएको एसिया कप छनोटमा नेपाल र युएईबीचको खेलले पनि एकदिवसीय मान्यता पाएको थियो। सो खेलमा नेपाल पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
