इटहरी– ‘भ्रष्टाचार विरोधीलाई सरुवा गरेर देश समृद्ध बन्छ प्रधानमन्त्रीज्यू?’ वरिष्ठ श्रम अधिकृत प्रेममप्रसाद सञ्जेलले प्रधानमन्त्री केपी शर्मा ओलीलाई गरेको प्रश्न हो यो।
विराटनगरमा पत्रकार सम्मेलनको आयोजना गरी उनले प्रधानमन्त्री, श्रममन्त्री र श्रम सचिवले आफ्नो प्रश्नको जवाफ दिनुपर्ने बताएका छन्। आफू कार्यालयमा हाजिर भएको तीन महिनामै सरुवा भएकोप्रति रुष्ट भएका सञ्जेलले कानुनविपरीत काम गर्ने अधिकार कसैको नभएको बताए।
‘निजामती सेवा ऐन २०४९ को दफा १८ ले कर्मचारी सरुवाको विषयमा स्पष्ट बताएको र कानुनविपरीत मेरो सरुवा भएकोले मान्य हुने छैन,’ उनले विज्ञप्तिमा भनेका छन्, ‘निजामती सेवा नियमावली २०५० को नियम ३६ को उपनियम १ को खण्ड ख बमोजिम श्रम कार्यालय आएको हुँदा मलाई यो सरुवा मान्य हुनेछैन।’
उनले प्रश्न गरेका छन्, ‘मलाई किन सरुवा गरियो? सम्माननीय प्रधानमन्त्रीज्यू, श्रममन्त्रीज्यू र श्रम सचिवज्यू जवाफ दिनुहोस्। के भ्रष्टाचारविरोधी अभियन्तालाई हटाएर देश समृद्ध बन्छ?’
उनले विज्ञप्तिमा भनेका छन्, ‘के यो मोफसलमा श्रम स्वीकृति राख्नुअघिको भ्रष्टाचारको सेटिङ हो? छोटो समयमै श्रम मन्त्रालय मातहतका २ दर्जन बढी भ्रष्टाचारीलाई अख्तियारले मुद्दा चलाउने अवस्था सिर्जना हुनु भनेको के हो? के यहाँ भ्रष्टाचारविरोधी आउँदैनन् भन्ने हो? मलाई र जनतालाई जवाफ चाहियो सरकार।’
आफूले आजसम्म एक रुपैयाँ पनि भ्रष्टाचार नगरेको दावी गर्दै उनले भ्रष्टाचार गर्न नपाएका कर्मचारी र श्रमिक ठग्ने उद्योगीको चेपुवामा परेर श्रम मन्त्री र सचिवले आफ्नो सरुवा गरेको उनले बताए। उनले आफ्नो घरमा साइकल पनि नभएको तर आफ्ना सहयोगीको कार भएको भन्दै उनले तलबबाहेक अतिरिक्त आम्दानी गर्न पल्केका कर्मचारी आफ्नो विरुद्धमा लागेको उनको आरोप छ।
‘के मेरा सहयोगीको कार केपी ओलीले किन्दिएको हो? नभए त्यत्रो सम्पत्ति कहाँबाट आयो?’, उनले प्रश्न गरेका छन्, ‘सरुवा गराउने श्रम सचिव महेश दाहाल, श्रममन्त्री गोकर्ण विष्ट र सम्माननीय प्रधानमन्त्रीले जवाफ दिनुपर्छ।’
आफ्नो सरुवा हुनुको मुख्य कारण भनेको वैदेशिक श्रम स्वीकृति विराटनगर आउनु र त्यहाँ कर्मचारीदेखि नेताले घुस खान नपाउने अवस्था सिर्जना हुनु उनले बताए। प्रधानमन्त्री, श्रममन्त्री र श्रमसचिवलाई उनको प्रश्न छ, ‘के श्रम कार्यालयमा भ्रष्टाचारविरोधी मान्छे अटाउँदैनन्?’ ]
भिडियो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
