इटहरी- सुनसरी सोनापुरका फिदा हुसेन गएकाे मंसिर ५ गते बिहान ६:३० बजेतिर श्रीमतीसँग 'मर्निङ वाक'बाट फर्किँदै थिए।
'मर्निङ वाक'कै क्रममा अचानक उनीमाथि गोली प्रहार भयो। लगत्तै भाइ ज्याबुल हुसनेले उपचारको लागि अस्पताल पुर्याए। तर, अस्पतालमा उनकाे मृत्यु भयाे।
मोटरसाइकलमा आएका दुई अज्ञात व्यक्तिले दुहबीमा उनीमाथि गोली प्रहार गरी भागेका थिए। फिदाको हत्या भए लगत्तै दुहबी बजार बन्द भयो। हत्यारा पत्ता लगाई कारबाहीको माग राख्दै आन्दोलनसमेत भयो।
सरकार र पीडित पक्षबीच सहमति भयो। सहमतिअनुसार फिदालाई सहिद घोषणा गर्न सरकार राजी भयो। परिवारले १० लाख रुपैयाँ पनि पायो।
उनका कान्छा छोराले विद्युत प्राधिकरणमा जागिर पनि पाए। तर, अझैसम्म परिवारले न्याय पाउन सकेको छैन। न त फिदालाई सहिद घोषणा गरिएकाे छ।
खुर्सिद आलममाथि प्रहार गरिएकाे गाेलीकाे खाेका।
हुसनेको हत्या भएको तीन महिना पहिले अर्थात् भदौ ४ गते सुनसरीकै भुटाहमा मुुस्लिम अगुवा खुर्सिद आलमको हत्या भएको थियो। विद्यालयको बैठक सकेर घर फर्कने क्रममा उनको हत्या भएको थियो।
हत्या लगत्तै भुटाहा बजार तनावग्रस्त बन्याे। छानबिन समिति गठन भयो। सहिद घोषणालगायत पीडितको परीवारलाई १० लाख रुपैयाँ सरकारले प्रदान गर्यो। आलमकाे परिवारले पनि हुसेनका परिवारले झैं आश्वासन त पाए, तर हालसम्म पनि न्याय पाउन सकेका छैनन्।
०००
खुर्सिद र फिदा दुबै मुस्लिम समुदायका अगुवा नेता हुन्। स्थानीयवासी माझ लोकप्रिय मानिएका दुवै नेताहरूको हत्याको प्रकृति समान देखिन्छ। दुबैको हत्या बाइकमा आएका समूहले गरेको पाइएको छ।
आन्तरिक सूचनाको प्रयोगकै आधारमा उनीहरूको हत्या भएको देखिन्छ। तर, प्रहरी अनुसन्धानले ठोस रुपमा आफ्नो प्रतिवेदन बुझाउन सकेको छैन।
प्रहरीको अनुसन्धान फितलो हुनु र हत्यारा पक्ता नलाग्नुले त्यहाँको माहोल त्रसित बन्दै गएको छ। हुसेनको हत्यापछि आफूहरु सधैँ त्रसित हुनुपरेको भाइ ज्याबुल हुसेनले बताए
फिदाको घर अगाडि प्रहरीको गस्ती जारी छ। दिउँसो ३ र राति ४ जना प्रहरी उनकै घरअगाडि तैनाथ छन्। त्यसको अलावा बिहान र साँझ प्रहरी गस्तीमै हुन्छन्। तर, अहिलेसम्म को अपराधी हो भन्ने विषयमा प्रहरी आफैं अनभिज्ञ भएको अहिलेसम्मको परिणामले बताउँछ।
हुसेन हत्या प्रकरणका अनुसन्धान अधिकृत ज्ञानेन्द्र फुयाँल प्रहरीले अनुसन्धान गरिरहेकाले केही भन्न नमिल्ने बताउँछन्। ‘प्रहरीले आफ्नो तरिकाले अनुसन्धान गरिरहेको छ। यदि त्यसको उपलब्धि बाहिर आएमा अनुसन्धान प्रभावित हुनसक्छ। त्यसैले अहिले केही भन्न मिल्दैन,’ अधिकृत फुयाँलले भने।
०००
फिदाका भाइ ज्याबुलका अनुसार अनुसन्धान टोलीले बारम्बार गाउँघरमा आएर मान्छे भेला पार्ने र सोधपुछ गर्ने गरिरहन्छ। शंका भएको व्यक्तिबारे भन्न लगाउँछन्।
फिदाको हत्या भएको १५ दिनपछि उनका जेठा दाइ आता हुसेनको हृदयघातका कारण मृत्यु भएको ज्याबुल बताउँछन्। ‘मेरो ठूलो दाइ फिदालाई सम्झिँदै बारम्बार रुनुहुन्थ्यो,’ उनी भक्कानिँदै भन्छन् , ‘म फिदालाई लिएर आउँछु भन्दै हुनुहुन्थ्यो। त्यतिकैमा बसेकै कुर्सीबाट लड्नुभयो। फिदा लिएर आउनुभएन, बरु फिदासँगै जानुभयो।’
दुई श्रीमती, पाँच छोरा र तीन छोरीका अभिभावक फिदाको अभावमा परिवारमा घाम लाग्न सकेको छैन। श्रीमती आशा हुसेन भन्छिन्, ‘सरकारले पैसा दियो, तर न्याय दिएन।’
श्रीमानको ज्यान किन्न खोजेर सरकारले अन्याय गरेको उनको भनाइ छ। ‘मलाई पैसा नदिइयोस्, तर न्याय दिइयोस्’, भावुक हुँदै उनले भनिन्।
फिदाका माइला दाइ गपुर हुसेन हरदिन भाइको हत्या भएको ठाउँमा घुमिरहन्छन्। फिदाको हत्या भएको स्थान देखाउँदै उनी भन्छन्,‘मलाई मारेको भए हुन्थ्यो तर मेरो आखाँमा राख्दा पनि नबिझाउने भाइलाई मारिदिए पापीले।’
०००
उता खुर्सिद आलमको परिवार अझैसम्म पनि स्तब्ध छ। उनका दाजु जाबेद आलम पनि अझैसम्म शान्तिसँग बस्नसक्ने अवस्था नरहेको बताउँछन्। ‘कुनै गल्ती नगर्ने मेरोे भाइलाई हत्या गर्नेले भोलि मेरो पनि लिन सक्छ,’ उनी त्रसिद मुद्रामा बोल्छन्।
गृहमन्त्री स्वयम् आएर न्याय दिने वाचा गरे पनि अहिलेसम्म अपराधी पत्ता नलाग्दा न्यायको आशा मरिसकेको उनकाे भनाइ छ।
चार छोरी र तीन छोराका बाबु खुर्सिदको हत्यापछि परिवार अभिभावकविहीन भएको छ। खुर्सिदका छोरा सहाजिद आलम बाबु गुमाउँदाको पीडा सम्झन चाहँदैनन्। ‘अहिले पनि घरमा कोही नयाँ मान्छे आयो भने शंका लाग्छ ,’ उनी गुनासो पोख्दै भन्छन्, ‘घरमा बस्ने अवस्था छैन। तर यो सरकार र प्रहरी प्रशासनले कुनै चासो देखाउँदैन।’
०००
खुर्सिदको हत्या लगत्तै छानबिन टोली गठनसमेत भयो। एसएसपी किशोर कुमार दाहालको नेतृत्वमा बनेको टोलीले अझैसम्म अनुसन्धान गरिरहेको छ। तर, अहिलेसम्म अपराधी पत्ता लागेको छैन।
पछिल्लो समय सुनसरीको दक्षिणी क्षेत्रमा सुरक्षा संवेदनशीलता बढ्दै गएको छ। मुस्लिम अगुवाको बारम्बार भएका हत्याले सम्पूर्ण मुस्लिममाथि नै खतरा बढेको अर्का मुस्लिम अगुवा जाकिर हुसेनको भनाइ छ।
नियोजित रुपमा मुस्लिम समुदायमाथि प्रहार गर्ने काम भइरहेकोप्रति उनी रुस्ट देखिन्छन्। भन्छन् ,‘मुस्लिम समुदाय सुरक्षित हुन सकेन भने यो देशमा कोहीपनि सुरक्षित छैनन्। त्यसैले यो सरकारले मुस्लिमको सुरक्षामा ध्यान देओस्।’
र याे पनि:
‘हत्या भएका आलम भारतले मागेका व्यक्ति’
खुर्सिद हत्याको फितलो अनुसन्धान, प्रहरी भन्छ- अहिल्यै बोल्न मिल्दैन
खुर्सिद हत्या प्रकरण : परिवारमा अझै सन्नाटा, प्रहरी भन्छ– अपराधी पत्ता लगाएरै छाड्छौं
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
