काठमाडौं– नेपाल कम्युनिस्ट पार्टी (नेकपा)को जारी स्थायी समिति बैठकमा अध्यक्षद्वयको तर्फबाट पेस भएको प्रतिवेदनमा सिन्डिकेट अन्त्य भएकाे दाबी गरिएको छ।
मंसिर मसान्तसम्ममा कम्पनीमा दर्ता हुन यातायात व्यवसायीलाई समय दिइएकोमा केही दिनअघि मात्रै ३ महिना बढाएर फागुन मसान्तसम्म समय थप गरिएको थियो।
जसका कारण सिन्डिकेट जारी छ, यात्रुले हैरानी पाइरहेकै छन्। तर, अध्यक्षद्वयको प्रतिवेदनमा भनिएको छ, 'यातायात क्षेत्रमा लामो समयदेखि विद्यमान सिन्डिकेटको अन्त्य गर्दै स्वस्थ व्यवसायिक प्रतिस्पर्धा र मूल्य तिरेपछि गुणस्तरीय सेवा पाउने उपभोक्ताको हकलाई प्रत्याभूत गरिएको छ।
सरकार सञ्चालनको ९ महिनालाई प्रतिवेदनमा मूल्यांकन गर्दै यसबीचमा नेपाललाई सुन तस्करीको ट्रान्जिटको रुपमा प्रयोग गर्दै आएको तस्करीको जालोमाथि प्रहार गरिएको उल्लेख गरिएको छ।
९ महिनाको अवधिमा दलहरुबीच बृहत्तर सहमति निर्माण, संघीयता कार्यान्वयन, अनूकुल बाह्य सम्बन्ध, महत्त्वपूर्ण कानुन निर्माण तथा विद्यार्थी भर्ना अभियानजस्ता काम गरिएको प्रतिवेदनमा उल्लेख छ।
त्यस्तै पार्टीको आगामी कार्यभारअन्तर्गत पार्टीको सांगठनिक एकता, समृद्धिका योजना, सुशासन लगायतका बुँदाहरु राखिएका छन्। नेकपाले प्रचार कार्यलाई पनि प्राथमिकता दिएको छ।
'पछिल्लो समय विपक्षी कित्ताबाट पार्टी र सरकारविरुद्ध भ्रामक प्रचारको योजनावद्ध अभियान नै चलाइएको छ। साधनस्रोत सम्पन्न, अत्याधुनिक प्रविधियुक्त र विभिन्न ठाउँबाट पोषित यस्तो योनजाबद्ध 'प्रोपागाण्डा'का तुलनामा हाम्रो प्रचार अभियान निकै कमजोर देखिएको छ', प्रतिवेदनमा भनिएको छ।
प्रचार अभियान कमजोर हुँदा पार्टी र सरकारको नीति र योजनाहरुलाई जनतामाझ सम्प्रेषित गर्न, पार्टीको पक्षमा जनमत निर्माण गर्न र विरोधमा भइरहेको भ्रमपूर्ण प्रचार र प्रोपगाण्डाहरुलाई निष्प्रभावी तुल्याउन नसकिएको उल्लेख छ।
नेपाल कम्युनिस्ट पार्टीको स्थायी समिति बैठक गत मंसिर २९ शनिबार देखि जारी छ। शनिबार दुई घन्टा बसेर स्थगित भएको बैठक आाज (सोमबार) पनि बसिरहेको छ।
शनिबारको बैठकमा अध्यक्षद्वयको तर्फबाट पुष्पकमल दाहाल प्रचण्डले राजनीतिक प्रतिवेदन पेस गरेका थिए।
अध्यक्षद्वयको प्रतिवेदनमाथि नेता वामदेव गौतमले फरक मत राखेपछि सदस्यहरुलाई प्रतिवेदन अध्ययनका लागि समय छुट्याउँदै बैठक स्थगित भएको थियो।
सोमबारको बैठकमा भने दुबै प्रतिवेदनमाथि छलफल भइरहेको छ। अध्यक्ष केपी शर्मा ओलीले आफ्नो धारणा निर्धक्कसँग राख्न सदस्यहरुलाई आग्रह गरेका छन्।
यस्ताे छ अध्यक्षद्वयको प्रतिवेदन:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
