उपल्लो मुस्ताङमा मोबाइल र इन्टरनेट सेवाको गुणस्तर बढ्याे : टेलिकम

सूचना-प्रविधि

नेपाल लाइभ बिहीबार, मंसिर २७, २०७५ १३:२०

बागलुङ- नेपाल टेलिकमले 'हिमालपारीकाे जिल्ला' उपल्लो मुस्ताङमा ‘माइक्रोवेभ रेडियो लिङ्क’को पहुँच विस्तार गरेको छ। ‘स्याटेलाइट’ प्रविधि हटाएर ‘माइक्रोवेभ रेडियो लिङ्क’ सञ्चालनमा ल्याइएको हो। मोबाइल र इन्टरनेट सेवाको गुणस्तर बढाउन नयाँ प्रविधि भित्र्याएको टेलिकमले जनाएको छ।

नेपाल टेलिकम बागलुङ कार्यालयका अनुसार उपल्लो मुस्ताङको लोमान्थाङ, घमी, चराङ, सुरखाङ, छुसाङ, समर र स्याङ्बोचेमा ‘जिएसएम, बिटियस’ टावर निर्माण गरी सेवा सुरु गरिएको हो। ‘माइक्रोवेभ रेडियो लिङ्क’ प्रविधिले ‘भ्वाइस’ र ‘डाटा’मा उल्लेख्य सुधार आएको कार्यालयका वरिष्ठ इञ्जिनियर केशव शर्माले बताए। 'मुस्ताङबाट भि स्याट प्रविधि प्रतिस्थापन भएको छ', इञ्जिनीयर शर्माले भने, 'सेवाको गुणस्तर बढेको छ, राज्यको खर्च पनि घटेको छ।'

‘माइक्रोवेभ रेडियो लिङ्क’ले टेलिकमको अतिरिक्त आर्थिक भार कटौती हुनेछ। ‘भि स्याट’ हुँदा वर्षेनी विदेशी स्याटेलाइट कम्पनीलाई पैसा तिर्नुपर्ने अवस्था थियो।

'पहिले ब्यान्डविथको डाटा क्षमता जम्मा २ सय ५० केबिपिएस थियो', इन्जिनीयर शर्माले भने, 'अहिले २ हजार एमबिपिएस छ, फोन नलाग्ने समस्या हटेको छ।' भरपर्दो मोबाइल र तीव्र गतिको इन्टरनेट सेवा पाएपछि उपल्लो मुस्ताङवासी पनि खुसी छन्। यसअघि सर्वसाधारण मोबाइलको लागि ‘भि स्याट’मा निर्भर थिए।

'मोबाइल सेवामा सुधार आएको छ, ‘टुजी’ पनि राम्रो चलेको छ', लो–घेकर दामोदर कुण्ड गाउँपालिकाका अध्यक्ष राजु विष्टले भने।

कम जनसङ्ख्या भएको भए पनि उपल्लो मुस्ताङ विश्वकै आकर्षक पर्यटकीय गन्तव्य भएकाले टेलिकमले गुणस्तीय सेवा विस्तारमा प्राथमिकता दिएको हो। सेवा विस्तारसँगै उपल्लो मुस्ताङ पुग्ने आन्तरिक तथा बाह्य पर्यटकले समेत प्रत्यक्ष लाभ लिनेछन्। हाल उपल्लो मुस्ताङमा नेपाल टेलिकमबाहेक अन्य कुनै पनि दूरसञ्चार कम्पनीको सेवा पुगेको छैन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

आगो बाल्दा वा विद्युतीय उपकरणको प्रयोग गर्दा सावधानी अपनाउनूस्ः स्वास्थ्य मन्त्रालय

मन्त्रिपरिषद् बैठक सुरु

अप्राकृतिक भएकै कारण अब ओली सरकार चल्दैन : अध्यक्ष प्रचण्ड