काठमाडौं– दोस्रो संविधानसभाको चुनावमा कमजोर नतिजा ल्याएको माओवादी केन्द्रले पछिल्लो पटक सरकारको नेतृत्व गर्दा गरेका केही सकारात्मक कामहरुले थोरै भए पनि ‘जस’ पाएको छ। स्थानीय तहको निर्वाचनमा उसले प्राप्त गरेको सम्मानित मत माओवादीको हौसलाको आधार बनेको छ। अर्कोतर्फ, एमालेसँगको गठबन्धनले पनि उसलाई थप सफलता दिलाउने अपेक्षा गर्न सकिन्छ।
एमाले र माओवादीबीच गठबन्धन भएकाले केही क्षेत्रमा सहमति भई दुवै पार्टीका केही नेताले सम्झौता गर्न सक्नेछन्।
प्रदेश र प्रतिनिधिसभाको चुनाव नजिकिँदै जाँदा मुख्य पार्टीका शीर्ष नेताहरु कहाँबाट चुनाव लड्दैछन् भन्ने चर्चा चलिरहँदा नेपाल लाइभले माओवादी शीर्ष नेताको भावी चुनावी मैदानबारे केही सूची तयार पारेको छ।
पुष्पकमल दाहाल प्रचण्ड
प्रचण्ड यसपटक चितवन ३ बाट चुनाव लड्दैछन्। चितवन उनले मतदान गर्ने क्षेत्रसमेत हो। यसअघि दोस्रो संविधानसभाको चुनावमा काठमाडौं र सिरहाबाट चुनाव लडेका उनी सिरहाबाट विजयी भएका थिए। काठमाडौंमा भने उनी कांग्रेस उम्मेदवार राजन केसीसँग पराजित भएका थिए।
नारायणकाजी श्रेष्ठ
श्रेष्ठ गोरखा २ बाट चुनाव लड्ने तयारीमा छन्। यही क्षेत्र प्रतिष्ठाको विषय बनेपछि वामपन्थी गठबन्धनबाट नयाँ शक्ति पार्टी बाहिरिएको थियो। किनकि, नयाँशक्ति संयोजक बाबुराम भट्टराई पनि वाम गठबन्धनबाट सोही क्षेत्रमा उठ्न चाहन्थे। श्रेष्ठ ०७० सालको चुनावमा मकवानपुर २ मा पराजित भएका थिए।
रामबहादुर थापा बादल
पहिलो संविधानसभाको चुनावमा चितवन २ बाट विजयी बादल यसपटक ललितपुर १ बाट चुनाव लड्दैछन्। दोस्रो संविधानसभाको चुनाव बहिष्कार गरेका उनले यसपटक चितवनको सो क्षेत्र एमालेका निम्ति छाड्दैछन्।
कृष्णबहादुर महरा
महरा दाङ २ बाट चुनाव लड्ने तयारीमा छन्। दाङ महराको गृहजिल्ला पनि हो। पहिलो र दोस्रो संविधानसभाको चुनावमा महरा क्रमश दाङ ३ र रोल्पा २ बाट विजयी भएका थिए।
देव गुरुङ
गुरुङ कास्की १ बाट सिफारिसमा परेका छन्। दोस्रो संविधानसभाको चुनाव बहिष्कार गरेका गुरुङले ०६४ सालको चुनावमा मनाङ र कास्की ३ बाट चुनाव जितेका थिए।
गिरिराजमणि पोखरेल
पोखरेल महोत्तरी १ बाट चुनाव लड्नेछन्। यसअघि पनि उनले सोही क्षेत्रबाट जित्दै आएका छन्।
वर्षमान पुन
०६४ सालको चुनावमा ललिलपुर १ बाट विजयी पुन ०७० को चुनावमा मोरङ ९ बाट लड्दा तेस्रो भएका थिए। यसपटक उनी रोल्पाबाट सिफारिसमा परेका छन्। रोल्पामा एउटा मात्रै निर्वाचन क्षेत्र कायम भएको छ।
अग्नि सापकोटा
सापकोटा यसपटक पनि सिन्धुपाल्चोक १ बाट चुनाव लड्दैछन्। यसअघि उनी क्षेत्र नम्बर २ बाट विजयी बनेका थिए। साबिकमा ३ वटा निर्वाचन क्षेत्र रहेको सो जिल्लामा यसपटक २ वटा निर्वाचन क्षेत्रमात्रै कायम भएको छ।
पम्फा भुसाल
ललितपुर २ बाट चुनाव लड्ने तयारीमा छिन् भुसाल। उनले पनि ०७० सालमा सम्पन्न दोस्रो संविधानसभाको चुनाव बहिष्कार गरेकी थिइन्। पहिलो संविधानसभाको चुनावमा भने उनी ललितपुर ३ बाट विजयी बनेकी थिइन्।
जनार्दन शर्मा
शर्मा पूर्वी वा पश्चिम रुकुमबाट चुनाव लड्नेछन्। उनले दोस्रो संविधानसभाको चुनावमा रुकुम २ बाट चुनाव जितेका थिए। उनी यसपटक पश्चिम रुकुमबाट सर्वसम्मत सिफारिसमा परेका छन्।
यो पनि पढ्नुस्:
एमालेका शीर्ष नेता कहाँ-कहाँबाट चुनाव लड्दैछन्?
कांग्रेसका शीर्ष नेता को कहाँबाट चुनाव लड्दैछन्?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775464606-1775465458.jpg)
-1764146706.png)
