रसुवा- रसुवागढी नाकामा कडाइ गरिएसँगै मालागढीबाट सुन तस्करी हुने गरेको खुलासामा भएको छ। विशेष सुराकीका आधारमा मालागढीबाट सुन तस्करी हुने गरको सूचना पाएपछि प्रहरीले सक्रियता बढाएसँगै सोमबार बिहान एक जना पक्राउ परेका छन्। चीनको केरुङबाट अवैध रुपमा नेपाल ल्याइएको दुई किलोग्राम सुन सहित रसुवा प्रहरीले एक जनालाई पक्राउ गरेको हो। पक्राउ पर्नेमा जिल्लाको गोसाईंकुण्ड गाउँपालिका १ थुम्मनका ३७ वर्षीय निमा दोर्जे तामाङ छन्।
स्याफ्रुबाट काठमाडौंतर्फ जादै गरेको ना १ ज ६१७६ नम्बरको टाटासुमोमा लुकाइछिपाई ल्याएको अवस्थामा विशेष सुराकीका आधारमा सदरमुकाम धुन्चेबाट सुनसहित तामाङलाई पक्राउ गरिएको प्रहरी नायव उपरीक्षक सन्तोष तामाङले बताए।
'नियमित चेकजाँचका क्रममा विशेष सुराकीका आधारमा चेकजाँच गर्दा हामीले दुई किलोग्राम सुनसहित उनलाई पक्राउ गरिएको हो', नायव उपरीक्षक तामाङले भने।
निमा दोर्जे तामाङ टाटासुमोमा टिकट काटी स्याफ्रुबाट काठमाडौं जान लागेका थिए।
उनको साथबाट बरामद गरिएको सुनको मूल्य करिब ९० लाख रहेको प्रहरीले जनाएको छ। सुन सहित पक्राउ परेका उनलाई राजश्व अनुसन्धान विभागमा बुझाउने तयारी भइरहेको प्रहरीले जनाएको छ।
चोर बाटो हुँदै तस्करी
चीनको केरुङ जाने मुख्य नाका रसुवागढीमा कडाई गरेसँगै मालागढी नाका हुँदै सुन तस्करी हुन थालेको खुलासा भएको हो। सोमबार बरामद गरिएको २ किलो सुन निमा दोर्जे तामाङले मालागढी नाका हुँदै काठमाडौं लैजान लागेको अनुसन्धानबाट खुलेको प्रहरी नायव उपरीक्षक तामाङले बताए। 'चिनियाँ पक्षले मालागढीमा सुन दिएको र उनले काठमाडौं लैजान लागेको देखिन्छ', उपरीक्षक तामाङले भने।
मालागढी नाकाबाट सुन तस्करी हुने गरेको खुलासा भएसँगै एक साताभित्रमा सो नाकामा सशस्त्र प्रहरीको चेक पोष्ट स्थापना गरिने प्रमुख जिल्ला अधिकारी कृष्ण पौडेलले बताए। 'जिल्ला सुरक्षा समितिबाट इन्सपेक्टरको कमान्डमा एउटा पोष्ट राख्न गृह मन्त्रालयमा अनुरोध गरिसकेका छौं। अब चाडै पोष्ट खडा गरी निगरानी बढाउछौं', प्रजिअ पौडेलले भने।
भाडाका सवारी प्रयोग गरेर हुन सक्ने तस्करीका लागि सुरक्षाकर्मी परिचालन गरी पेट्रोलिङ गस्ती बढाउनुका साथै अवैध रूपमा हुन सक्ने तस्करी नियन्त्रणका लागि सुरक्षाकर्मीलाई तालिम प्रदान गरिरहेको पनि पौडेलले बताए। अवैध गतिविधि नियन्त्रण गरिने उनको भनाइ छ।
गोसाईंकुण्ड गाउँपालिका-१ थुम्मनमा मालागढी नाका रहेको छ। सदरमुकाम धुन्चेबाट करिब तीन घन्टाको यात्रामा थुम्मन पुग्न सकिन्छ। थुम्मनबाट एक दिनको पैदल यात्रापछि चीनसँग सिमाना जोडिएको चोरी बाटो मालागढी नाका पुगिन्छ। त्यहाँ कुनैपनि बस्ती छैन।
पक्राउको नालीबेली, तस्करको केन्द्र टिमुरे
२०७१ असार १७ गते गोसाईंकुण्ड गाउँपालिका-२ टिमुरेकी फुर्पु ग्याल्मो तामाङ्नी १० तोला बुटिलसहित पक्राउ परिन्। २०७१ साउन ६ गते टिमुरेकै ३० वर्षीया सम्झना तामाङ ६ तोला बुटिल पक्राउ परिन्। २०७२ साउन १४ आमाछोदिङमो गाउँपालिका-४ गोल्जुङका १७ वर्षीया सीता तामाङ र २५ वर्षीय योसाङ तामाङ १ केजी सुनसहित पक्राउ परे।
२०७२ चैत १७ गते बाग्लुङका २२ वर्षीय पेम्बा रेन्जेन गुरूङ २२ तोला सुनसहित धुन्चे बाट पक्राउ परे। २०७३ जेठ ३० गते गोसाईंकुण्ड गाउँपालिका-२ टिमुरेका काङकाङ तामाङ ६ किलो सुनसहित टिमुरेबाट पक्राउ परे। २०७३ पुष ६ गते आमाछोदिङमो गाउँपालिका ३ गत्लाङका २८ वर्षीय वीरेन लामा ५ किलो सुनसहित गोसाईंकुण्ड गाउँपालिका-२ टिमुरेबाट पक्राउ परेका थिए।
२०७३ माघ १ गते सूर्यविनायक भक्तपुरका ३० वर्षीय रवीन्द्र भुजेल १५ किलो सुनसहित काठमाडौंबाट पक्राउ परेका थिए। २०७३ माघ १० गते सिन्धुपाल्चोक सिम्पालकाभ्रे ७ का ४७ वर्षीय चक्रबहादुर धमला १ सय १७ दशमलव ३२ ग्राम सुनसहित टिमुरेबाटै पक्राउ परेका थिए।
२०७३ चैत ३ मा वालिङ, स्याङ्जा हाल रसुवा उत्तरगया गाँउपालिका-२ का ३५ वर्षीय प्रकास गैरे ७ किलो सुनसहित गोसाईंकुण्ड गाउँपालिका-२ टिमुरेबाट पक्राउ परे।
२०७४ असार ६ मा सिन्धुपाल्चोक बाह्रबिसे नगरपालिका-४ का कृष्णबहादुर श्रेष्ठ र दिनेश रोक्का २ किलो सुनसहित गोसाईंकुण्ड गाउँपालिका-२ टिमुरेबाटै पक्राउ परे।
त्यस्तै २०७४ साउन २८ मा उत्तरगया गाउँपालिकाका ३७ वर्षीय दिपक घले, आमाछोदिङमो गाउँपालिकाका २४ वर्षीय फुर्बा तामाङ ९ किलो सुनसहित नुवाकोटबाट पक्राउ परे।
चीनको केरुङबाट रसुवागढी हुँदै आएको सुनसहित पक्राउ पर्नेमा अधिकाशं भरिया रहेका छन्।
पछिल्लो समय सिन्धुपाल्चोकको तातोपानी नाका बन्द भई रसुवागढी नाकामा चहलपहल बढेसँगै अवैधानिक गतिविधि पनि हुँदै आएको छ। तातोपानी नाका बन्द भएपछि रसुवागढी नाकाबाट तस्करी बढिरहेको पाइएपछि रसुवामा सुरक्षा निकायले कडाई गरेको बताउने गरेका भए पनि दैनिकजसो नै रसुवाबाट अवैध सुनको तस्करी भइरहेको अनुमान गर्नेको संख्या पनि कम छैन।
नेपाल चीन र भारत जोड्ने त्रिदेशीय मार्गको रुपमा विस्तार भईरहेको रसुवागढी नाकामा अवैध रूपमा तस्करी बढेसँगै प्रहरीले विशेष निगरानी गरिरहेको दाबी गरेको छ।
भूकम्प र पहिरोका कारण तातोपानी नाका बन्द भएपछि रसुवागढी नाकाबाट २०७१ सालदेखि नै सुन तस्करी हुन थालेको देखिन्छ। नाका सञ्चालनमा आएदेखि अहिलेसम्म जिल्लाभित्र नौ पटक सुन पक्राउ परिसकेको छ। तर जिल्ला बाहिरबाट भने न्युनतम ९ देखि ८८ किलोसम्म सुन पक्राउ परेको छ। जिल्लामा सबैभन्दा ठुलो परिमाणमा ७ किलोसम्म सुन पक्राउ परेको छ। जिल्लाभित्र जाँचका लागि दर्जनौं चेकपोष्ट राखिए पनि सुन तस्करी नियन्त्रणमा आएको छैन।
चेकपोष्टबाट सर्वसाधारणले सास्ती पाउनु बाहेक अन्य कुनै कुरा नभएको स्थानीयवासीको भनाइ छ। सर्वसाधारणको झोला खोतल्ने, अनावश्यक समय पर्खाउनेलगायतका काम मात्र भएको सर्वसाधरणको गुनासो छ।
अहिले जिल्लामा नेपाली सेना, नेपालप्रहरी र सशस्त्र प्रहरीका एक दर्जन चेकपोष्ट सञ्चालनमा रहेको छन्। जिल्लाको टिमुरेमा ४ वटा, स्याफ्रुमा एउटा, धुन्चेमा तीन वटा, कालिकास्थानमा दुई वटा र बेत्रावतीमा एउटा चेक पोष्ट राखिएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।