काठमाडौं– भारतका लागि नेपालको राजदूतमा सिफारिस भएका निलाम्वर आचार्यले सो पदका लागि आफू उपयुक्त भएको दाबी गरेका छन्। संसदीय सुनुवाइ समितिमा आचार्यले भारतसँगको सम्बन्ध पुरानो हुनुका साथै परिपक्व समेत भएकाले आफू योग्य भएको दाबी गरेका हुन्।
संसदीय सुनुवाइ समितिमा सांसदहरुका प्रश्नको जवाफ दिँदै आचार्यले भारतसँग सम्बन्ध सुमधुर र विश्वास योग्य बनाउनका लागि परिपक्व राजनीतिज्ञ आवश्यक हुने र त्यसमा आफू सक्षम रहेको जिकिर गरेका हुन्। ‘नेपाल र भारतका बीचमा प्रष्ट कुरा नहुँदा धेरै समस्याहरु सिर्जना भएका छन्’, उनले भने ‘, म यसको समाधानका लागि काम गर्नेछु।’
इपिजी प्रतिवेदन लामो समयसम्म पनि सार्वजनिक नभएको र सोका लागि भारत तयार नदेखिएको भन्ने विषयमा सांसदहरुले सोधेको प्रश्नमा आचार्यले आफूले पहल गर्ने बताए। दुबै देशका बुद्धिजीवीहरुको सहमतीमा प्रतिवेदन तयार भएकाले नबुझिने कुरा नहुने भन्दै उनले यसमा ढुक्क हुन आग्रह गरे।
अहिले देखिएको समस्या प्रतिवेदन सार्वजनिक भएपछि समाधान हुने भन्दै उनले केही व्यक्तिले अँध्यारो कोठामा गरिएको छलफलको निचोड मान्य हुँदैन भनेर नहुने टिप्पणी गरे। ‘यो दुबैतर्फका ८ जना प्रतिनिधिले बनाएको साझा दस्तावेज हो’, उनले भने ‘, असहमति भए सोही समयमा आउनु पर्ने थियो। त्यो समयमा आएन। त्यसकारण पनि हाम्रो बुझाइमा कुनै समस्या छैन।’
भारतका लागि राजदूतको रुपमा काम गर्न पाएमा आफूले नेपाल–भारत सम्बन्ध उचाईमा पुग्नेगरी काम गर्ने उनले प्रतिवद्धता व्यक्त गरे। लामो समयसम्म राजनीतिक रुपमा सचेत वर्ग भई बसेको अनुभव देशको हितमा खर्च गर्ने उनले बताए।
आचार्यले नेपालको समृद्धिका लागि भारत अभिन्न अंग भएको उल्लेख गर्दै त्यसका लागि आफूले आत्मीय सम्बन्ध कायम राख्न कूटनीतिक पहल गर्ने कामलाई उच्च प्राथमिकता दिने पनि स्पष्ट पारे। आफ्नो योग्यता, क्षमता र भावी योजनाबारे जानकारी दिँदै उनले अरु देशसँग सम्बन्ध विस्तार गर्दा भारतसँगकाे सम्बन्धमा अाँच अाउने बुझाईलाई पनि आफूले अन्त्य गर्ने प्रतिवद्धता व्यक्त गरे। उनले भारतसँगको सीमा समस्या समाधानमा पनि आफूले उत्तिकै ख्याल राख्ने स्पष्ट पारे।
भारतका लागि प्रस्तावित राजदुत आचार्यले भारतसँग नेपालको सीमा खुला भएपनि मन खुला नभएको टिप्पणी गरे। उनले मित्र राष्ट्रको हैसियतमा नेपालले भारतसँग विश्वास निर्माणका लागि खुला मनका साथ काम गर्ने वातावरण बनाउने विषयलाई आफूले प्राथमिकता दिने योजना सुनाए। आचार्यले विगतमा भारतसँग भएका समझदारी कार्यान्वयनमा पनि आफूले जोड दिने स्पष्ट पारे।
आचार्यले भारतसँगको सम्बन्धलाई अझै आत्मीय बनाउन आफूले नेपालका राजनीतिक नेतृत्वसँग आवश्यक परामर्श गरिरहने प्रतिवद्धता पनि संसदीय सुनुवाइका क्रममा पटक–पटक दोहोर्याए।
बैठकमा समितिका सदस्यहरुले चीन र भारतसँगको सम्बन्धलाई सन्तुलित बनाउन भारतका लागि राजदुतमा प्रस्तावित आचार्यलाई सचेत गराएका थिए। समितिका सदस्य योगेश भट्टराईले भारत र चीनबीचको सम्बन्धलाई सन्तुलित बनाउन पहल गर्न आचार्यलाई सचेत गराएका थिए।
समितिका अर्का सदस्य पार्वत गुरुङले नेपाली जनताको भारतविरोधि मनस्थिति अन्त्य गर्न आचार्यको ध्यानाकर्षण गराए।
संसदीय सुनुवाई विशेष समितिका सदस्यहरुले भारतले नेपालमा हेपाहा प्रवृत्ति देखाउने गरेको भन्दै त्यसलाई रोक्न आवश्यक कूटनीतिक पहल गर्न आचार्य सफल हुने विश्वास पनि व्यक्त गरेका थिए।
आज भारतका लागि नेपालको राजदूतमा सिफारिस भएका आचार्यमाथि संसदीय समितिमा सुनुवाइ भएकाे हो। सुनुवाइ हुनुअघि आचार्यमाथि कुनै पनि उजुरी परेको थिएन।
सरकारले भारतका लागि अाचार्यसहित युएईका लागि कृष्णप्रसाद ढकाल, मलेसियाका लागि उदयराज पाण्डे र इजरायलका लागि अन्जान शाक्यकाे नाम सिफारिस गरेकाे थियाे।
अाजै मलेसियाका लागि सिफारिस पाण्डेमाथिकाे सुनुवाइ पनि हुँदै छ।
याे पनि पढ्नुस्:
राजदूतका रुपमा भारत जानुअघि नै इपिजी प्रतिवेदन सार्वजनिक हुन्छ : निलाम्बर आचार्य
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
