एजेन्सी– फ्रान्समा विद्यालयका विद्यार्थीहरूले शुक्रबार विद्यालयबाहिर आगजनी गर्दै प्रहरीसँग झडप गरेपछि विद्यार्थी आन्दोलन थप चर्किएको छ ।
गत सातादेखि सुरु भएको आन्दोलनका कारण देशभरका ५६० भन्दा बढी उच्च माध्यमिक विद्यालय मा पढाइ प्रभावित भएको शिक्षा मन्त्रालयले जनाएको छ ।
पेरिस क्षेत्रबाट सुरु भएको आन्दोलन केही दिनमै देशभर फैलिएको हो । अन्तिम वर्षमा अध्ययनरत विद्यार्थीहरूले विद्यालय प्रवेशद्वार अवरुद्ध गर्दै लामो कक्षासमय, अपर्याप्त भौतिक सुविधा, अत्यधिक गर्मी भएका कक्षाकोठा तथा शिक्षकको अभावलगायतका समस्या उठाएका छन् ।
पेरिसस्थित टुर्गो उच्च माध्यमिक विद्यालयबाहिर १५ वर्षीय साइमनले एक वर्षसम्म आफूहरूको विज्ञान शिक्षक नभएको र पाठ्यपुस्तक नभएको बताए ।
सरकारले विद्यार्थीहरूले उठाएका केही गुनासा जायज रहेको स्वीकार गरे पनि आन्दोलनका क्रममा भएको हिंसाको आलोचना गरेको छ । शिक्षामन्त्री एडुआर जफ्रेले विद्यार्थी आन्दोलनलाई “अत्यधिक हिंसात्मक समूहहरूले नियन्त्रणमा लिएको” आरोप लगाए ।
शुक्रबार पेरिसका लियोनार दे भिन्सी र गास्तों–बाशलार उच्च माध्यमिक विद्यालयका प्रवेशद्वारमा आगलागी भएको र दमकलले आगो निभाएको समाचार संस्थाले जनाएको छ ।
सरकारका अनुसार आन्दोलन सुरु भएयता ६५ जना विद्यालय कर्मचारी घाइते भएका छन्, जसमा ४० जना विद्यालय प्रधानाध्यापक छन् । साथै, करिब १७० विद्यार्थी घाइते भएको र १०० भन्दा बढी विद्यालयमा गम्भीर क्षति पुगेको शिक्षामन्त्रीले बताए ।
न्यायमन्त्री जेराल्ड दार्मानिनका अनुसार आन्दोलन सुरु भएयता करिब दुई हजार जनालाई प्रहरीले नियन्त्रणमा लिएको छ, जसमध्ये करिब ९० प्रतिशत नाबालिग रहेको उनले बताए ।
पश्चिमी फ्रान्सको रेनेसस्थित जाँ–मासे उच्च माध्यमिक विद्यालयमा पनि प्रहरीको बाक्लो उपस्थिति देखिएको थियो । १६ वर्षीया लोला नामकी विद्यार्थीले विद्यालय बन्द गराउन सफल भएको दाबी गर्दै आन्दोलनकारीमाथि प्रहरीको व्यवहारको आलोचना गरे ।
विद्यार्थीहरूले प्रदर्शन नियन्त्रणका क्रममा प्रहरीले अत्यधिक बल प्रयोग गरेको र नियमित रूपमा अश्रुग्यास प्रहार गर्दा केही विद्यार्थी घाइते भएको आरोप लगाएका छन् ।
यसैबीच, आन्दोलनले फ्रान्सको राजनीतिमा समेत बहस सिर्जना गरेको छ । राष्ट्रपति निर्वाचन हुन करिब आधा वर्ष बाँकी रहँदा सरकारले वामपन्थी दल फ्रान्स अनबो माथि आन्दोलनलाई समर्थन वा उक्साएको आरोप लगाएको छ । तर उक्त दलका वरिष्ठ नेता म्यानुएल बोम्पारले सरकारको आरोपलाई “षड्यन्त्रको सिद्धान्ततर्फ झर्दै गएको” भन्दै अस्वीकार गरेका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
