काठमाडौं– निजी हवाई सेवा प्रदायक कम्पनी सौर्य एयरलाइन्सले त्रिभुवन अन्तर्राष्ट्रिय विमानस्थल कार्यालयको बक्यौता तिर्ने प्रतिबद्धता जनाएको छ।
विमानस्थल कार्यालयलाई एयरलाइन्सले विमानस्थल सेवा शूल्कबापत ४ करोड रुपैयाँभन्दा बढी रकम तिर्न बाँकी थियो। तर, एयरलाइन्सले लामो समयसम्म पनि सबै रकम चुक्ता गर्न नसक्दा नियमित उडान नै बन्द भएको उनले स्विकारे।
‘लामो समयदेखि विमानस्थल कार्यालयलाई तिर्नुपर्ने बक्यौता तिर्न नसकेकै हो’, एयरलाइन्सका बजार व्यवस्थापक मुकेश खनालले भने, ‘अब बक्यौता किस्तामा तिर्दै नियमित उडान गर्छौं।’
खनालका अनुसार सो रकममध्ये केही रकम भने भुक्तानी भइसकेको छ।
एयरलाइन्सको व्यवस्थापन हेरिरहेका श्याम अधिकारी चीन भ्रमणमा रहेकोले आज उडान बन्द हुन पुगेको उनको भनाइ छ। अधिकारी शुक्रबार काठमाडौं आएपछि सोमबार भित्र बाँकी रहेको बक्यौता रकम तिर्दै एयरलाइन्सले नियमित उडान सुरु गर्ने खनालले दाबी गरे।
यता विमानस्थल कार्यालयले भने बक्यौता रकम चुक्ता नगरेको भन्दै बिहीबार दिँउसोदेखि नै एयरलाइन्सको नियमित उडान बन्द गराइसकेको छ।
एयरलाइन्सले विमानस्थल कार्यालयलाई अब ३ करोड रुपैयाँभन्दा बढी बक्यौता तिर्न बाँकी छ। एयरलाइन्सले बारम्बार बक्यौता तिर्न समय दिए पनि रकम भुक्क्तानी नगरेपछि नियमित उडान बन्द गराएको कार्यालयका प्रमुख राजकुमार क्षेत्रीले बताए।
उनका अनुसार एयरलाइन्सले सोमबारभित्र केही बक्यौता चुक्ता गर्ने जनाएको छ। एयरलाइन्सले बक्यौता चुक्ता नगरेसम्म उडान हुन नदिने उनले स्पष्ट पारे।
‘एयरलाइन्सलाई माघदेखि ताकेता गर्दा अहिलेसम्म १ करोड ७० लाख रुपैयाँ तिरेको छ। अब तिर्न बाँकी झन्डै ३ करोड रुपैयाँ छ। एयरलाइन्सले अति नै न्यून रकमका दरले बक्यौता चुक्ता गर्दा समस्या आएको छ’, उनले भने।
दीपक पोखरलेको स्वामित्वमा रहँदा नै सौर्य एयरलाइन्सले विमानस्थल कार्यालयलाई झन्डै ३ करोड रुपैयाँ विमानस्थल कार्यालयलाई बुझाउनुपर्ने अवस्था थियो। तर, आर्थिक संकट बढ्दै गएपछि पोखरेलले एयरलाइन्स ६१ करोड रुपैयाँमा बिक्री गरेका थिए। साउनको अन्तिम साता व्यवसायी श्याम अधिकारी, श्यामकृष्ण महर्जन र रामप्रसाद पन्थीको नयाँ व्यवस्थापकीय टिमले सौर्य एयरलाइन्स खरिद गरेको हो।
खरिद गर्दा एयरलाइन्सले विमानस्थल कार्यालयलाई बाँकी रहेको रकम तिर्ने सहमति भएको थियो। तर, नयाँ व्यवस्थापनले एयरलाइन्स कम्पनी खरिद गरेर नियमित उडान सुरु गरेको तीन महिना हुँदा पनि बक्यौता चुक्ता गरेको छैन।
अहिले सौर्य एयरलाइन्स कम्पनी रामप्रसाद पन्थीका छोरा बुद्धिराज पन्थीको नाममा हस्तान्तरण भएको छ। तर, सञ्चालक टिममा भने अरु पनि सदस्य छन्।
सौर्यसँग ‘सिआरजे–२००’ सिरिजका दुई वटा विमान छन्। एउटाले नियमित उडान भरिरहेको छ भने अर्को विमानमा प्राविधिक समस्या आएकाले ग्राउन्डेड छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768295773.png)
-1768291693.png)
-1764146706.png)
