काठमाडौं– पाँचदिने चेम्बर एक्स्पो २०७५ सोमबार सम्पन्न भएको छ। एक्स्पोमा ५० हजारभन्दा बढीले अवलोकन भ्रमण गरेका थिए। एक्स्पोमा पाँच करोडभन्दा बढीको कारोबार भएको एक्स्पो संयोजक राष्ट्रभूषण चाकुबजीले बताए।
एक्स्पो स्टलमा रहेका विभिन्न कम्पनीका गाडीको अर्डर भएको जानकारी आयोजकले दिएको छ। निर्माण सामग्रीका रुपमा रहेका भूकम्प प्रतिरोधात्मक प्यानलहरुको अर्डर बढी देखिएको संयोजक चाकुबजीले जनाए।
एक्स्पोमा अटोमोबाइल, इलेक्टिकल एन्ड इलेक्ट्रोनिक्स, फलोरिंग एन्ड फर्निसिङ, होम अप्लाएन्स, फेसनवेयर, मोबाइललगायतका दुई सय २५ वटा स्टल राखिएका थिए।
चेम्बरले आयोजना गरेको यो तेस्रो एक्स्पो हो। चेम्बरले प्रत्येक वर्ष यस्ता अन्तराष्ट्रिय एक्स्पो गर्दै आएको छ। यस पटकको एक्स्पोमा दक्षिण कोरियाले पनि साझेदारी गरेको छ। त्यस्तै थाइल्यान्ड ‘फोकस मुलक’का रूपमा सहभागी रहेको थियो।
एक्स्पोमा नेपालदेखि बर्मासम्मको सहभागिता
एक्स्पोमा नेपालसहित आठ वटा मुलुकको सहभागिता थियो। एक्स्पोमा बर्माका १५ वटा स्टल रहेका थिए। बर्माले पहिलो पटक एक्स्पोमा सहभागिता जनाएको हो।
उक्त एक्स्पोमा सहभागी बर्मेली व्यवसायीहरूले नेपालमा आफ्ना देशमा उत्पादन भएका सामानको माग रहेको बताए। एक्स्पोमा बर्माका ट्राभल कम्पनी, आर्ट, गरगहनालगायतका समान राखिएको थियो।
दुई महिनाअघि गठन भएको नेपाल म्यानमार चेम्बरले पनि एक्स्पोमा सहभागिता जनाएको थियो। यसले दुई देशको व्यापार बढाउने विश्वास लिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
