गुल्मी– सरकारी कार्यालयमा कर्मचारीको नियमित उपस्थिति, समयपालना र सेवा प्रवाहको अवस्था बुझ्न राष्ट्रिय सतर्कता केन्द्रले गरेको अनुगमनका क्रममा गुल्मीका विभिन्न कार्यालयमा फरक–फरक अवस्था देखिएको छ। कतिपय कार्यालयमा कर्मचारी समयमै उपस्थित नभएको भेटिएको छ भने केही कार्यालयमा विद्युतीय हाजिरी प्रणाली नै नरहेको पाइएको छ।
केन्द्रले २०८३ असोज १४ गते गरेको दैनिक अनुगमन तथा आवश्यक कारबाहीका लागि निर्देशनसम्बन्धी विवरणअनुसार गुल्मीका सरकारी कार्यालयसँगै काठमाडौंस्थित विशेष आर्थिक क्षेत्र प्राधिकरण र राष्ट्रिय खेलकुद परिषद्मा समेत अनुगमन गरिएको थियो। अनुगमनका क्रममा कर्मचारीको समयपालना, पोशाक तथा आचरण, सेवा प्रवाह र विद्युतीय हाजिरीको अवस्थालाई मुख्य आधार बनाइएको थियो।
गुल्मीका १५ वटा कार्यालय तथा काठमाडौंका दुई कार्यालयको अनुगमनबाट कर्मचारी व्यवस्थापन र कार्यालय सञ्चालनको अवस्था एकरूप नभएको देखिएको छ।
कतै आधाभन्दा बढी कर्मचारी नै समयमा पुगेनन्
गुल्मीको कोष तथा लेखा नियन्त्रक कार्यालयमा १२ कर्मचारीमध्ये ८ जना निर्धारित समयमा कार्यालयमा उपस्थित नभएको पाइएको छ। त्यस्तै नापी कार्यालय गुल्मीमा २० कर्मचारीमध्ये ८ जना समयमै उपस्थित नभएको केन्द्रको विवरणमा उल्लेख छ।
रेसुङ्गा नगरपालिका, नगर कार्यपालिकाको कार्यालयमा पनि ८२ कर्मचारीमध्ये १४ जना निर्धारित समयमा उपस्थित नभएको भेटिएको छ। यद्यपि उक्त कार्यालयमा पोशाक नलगाएर आएका कर्मचारी भने नभएको अनुगमन विवरणमा उल्लेख छ।
खानेपानी तथा सरसफाइ कार्यालय गुल्मीमा १३ कर्मचारीमध्ये ३ जना निर्धारित समयमा उपस्थित नभएको पाइएको छ। यी कार्यालयमा समयपालनामा देखिएको कमजोरीबारे केन्द्रले सम्बन्धित कर्मचारीलाई प्रचलित कानुनअनुसार कारबाही गरी त्यसको जानकारी उपलब्ध गराउन निर्देशन दिएको छ।
हाजिरी प्रणाली नै नभएका कार्यालय धेरै
अनुगमनका क्रममा गुल्मीका विभिन्न कार्यालयमा विद्युतीय हाजिरी प्रणाली जडान नभएको समेत पाइएको छ।
जिल्ला हुलाक कार्यालय गुल्मीमा ७० कर्मचारी भए पनि विद्युतीय हाजिरी प्रणाली नभएको भेटिएको छ। त्यसैगरी जलस्रोत तथा सिँचाइ विकास डिभिजन कार्यालयका १२ कर्मचारी, शिक्षा विकास तथा समन्वय इकाईका ८ कर्मचारी, कृषि ज्ञान केन्द्र गुल्मीका १५ कर्मचारी र राष्ट्रिय आधुनिकीकरण कार्यक्रम कार्यान्वयन इकाईका १२ कर्मचारी रहेको कार्यालयमा पनि विद्युतीय हाजिरी प्रणाली नभएको विवरणमा उल्लेख छ।
यी सबै कार्यालयलाई विद्युतीय हाजिरी प्रणाली जडान गरी त्यसको जानकारी राष्ट्रिय सतर्कता केन्द्रलाई उपलब्ध गराउन निर्देशन दिइएको छ।
सडक पूर्वाधार कार्यालयमा पनि विद्युतीय हाजिरी प्रणाली जडान गर्न निर्देशन दिइएको छ। त्यसबाहेक फिल्डमा जाने कर्मचारीले कार्यालयबाट बाहिरिनुअघि अनिवार्य रूपमा लगबुक भर्ने व्यवस्था गर्न केन्द्रले भनेको छ।
कतै भने कर्मचारीको उपस्थिति सन्तोषजनक
अनुगमनबाट सबै कार्यालयको अवस्था भने कमजोर देखिएको छैन।
घरेलु तथा साना उद्योग कार्यालय गुल्मीमा रहेका ९ जना कर्मचारी नै निर्धारित समयमा उपस्थित भएको पाइएको छ। कर्मचारीको समयपालना सन्तोषजनक देखिए पनि कार्यालयको सरसफाइमा थप ध्यान दिन केन्द्रले सुझाव दिएको छ।
त्यस्तै डिभिजन वन कार्यालय गुल्मीका ९ जना कर्मचारी पनि अनुगमनका क्रममा कार्यालयमा उपस्थित रहेको भेटिएको छ। कर्मचारीको उपस्थितिको अवस्था सन्तोषजनक रहेको भन्दै केन्द्रले यसलाई निरन्तरता दिन सुझाव दिएको छ।
जिल्ला प्रशासन कार्यालय गुल्मीको सेवा प्रवाह, कर्मचारीको समयपालना, पोशाक र आचरणको समेत अनुगमन गरिएको थियो। अनुगमनपछि केन्द्रले सेवा प्रवाहलाई अझ व्यवस्थित र प्रभावकारी बनाउन सुझाव दिएको छ।
काठमाडौंमा पनि फरक–फरक अवस्था
केन्द्रको अनुगमन गुल्मीमा मात्र सीमित रहेन। काठमाडौंस्थित विशेष आर्थिक क्षेत्र प्राधिकरणमा गरिएको अनुगमनमा २६ कर्मचारीमध्ये ११ जना निर्धारित समयमा कार्यालयमा उपस्थित नभएको पाइएको छ।
त्यसैगरी तीन जना कर्मचारीले तोकिएको पोशाकसमेत नलगाएको भेटिएको केन्द्रको विवरणमा उल्लेख छ। केन्द्रले सम्बन्धित कर्मचारीलाई प्रचलित कानुनअनुसार कारबाही गरी त्यसको जानकारी गराउन निर्देशन दिएको छ। साथै सेवा प्रवाहलाई थप प्रभावकारी र जनमैत्री बनाउन भनिएको छ।
यसको विपरीत राष्ट्रिय खेलकुद परिषद्मा भने अनुगमनका क्रममा सबै कर्मचारी समयमै कार्यालयमा उपस्थित भएको पाइएको छ। परिषद्को सेवा प्रवाह, कर्मचारीको समयपालना, पोशाक र आचरणको अवस्थासमेत हेरिएको थियो। केन्द्रले देखिएको राम्रो अवस्थालाई निरन्तरता दिन सुझाव दिएको छ।
सेवा प्रवाहमा पनि केन्द्रको चासो
राष्ट्रिय सतर्कता केन्द्रले गरेको अनुगमन कर्मचारी कार्यालयमा आए–नआएकोमा मात्र केन्द्रित थिएन। कार्यालयबाट नागरिकलाई प्रदान भइरहेको सेवा कत्तिको प्रभावकारी र जनमैत्री छ भन्ने विषयलाई पनि अनुगमनको आधार बनाइएको थियो।
समयमै कार्यालयमा नपुगेका कर्मचारी रहेका कार्यालयलाई सम्बन्धित कर्मचारीमाथि कानुनअनुसार कारबाही गर्न निर्देशन दिइएको छ। साथै नागरिकले पाउने सेवामा असर नपर्ने गरी कार्यालयको सेवा प्रवाहलाई थप प्रभावकारी बनाउन भनिएको छ।
अनुगमनका क्रममा विद्युतीय हाजिरी नभएका कार्यालयलाई तत्काल प्रणाली जडान गर्न निर्देशन दिइनुले कर्मचारीको नियमित उपस्थिति र अभिलेखलाई थप व्यवस्थित गर्ने प्रयास देखिन्छ। फिल्डमा बढी खटिनुपर्ने कार्यालयका कर्मचारीको हकमा भने लगबुकमार्फत कार्यालयबाट बाहिरिएको र फिल्डमा गएको विवरण राख्नुपर्ने व्यवस्थालाई जोड दिइएको छ।
एउटै जिल्लाका कार्यालयमा यस्तो फरक
सतर्कता केन्द्रको एउटै दिनको अनुगमनले गुल्मीका सरकारी कार्यालयमा कर्मचारी व्यवस्थापन र कार्यालय सञ्चालनको अवस्था समान नरहेको देखाएको छ। कतिपय कार्यालयमा सबै कर्मचारी समयमै उपस्थित छन् भने कतिपयमा कुल कर्मचारीको ठूलो हिस्सा नै निर्धारित समयमा कार्यालयमा नपुगेको भेटिएको छ।
त्यस्तै केही कार्यालयले विद्युतीय हाजिरी प्रयोग गरिरहेको अवस्था देखिए पनि हुलाक, कृषि, शिक्षा, सिँचाइ र आधुनिकीकरण कार्यक्रम कार्यान्वयनसँग सम्बन्धित कार्यालयमा त्यस्तो प्रणाली नै नरहेको पाइएको छ।
केन्द्रले अनुगमनबाट देखिएका कमजोरी सुधारका लागि सम्बन्धित कार्यालयलाई निर्देशन दिएको छ भने कर्मचारीको उपस्थिति र सेवा प्रवाह सन्तोषजनक देखिएका कार्यालयलाई त्यसलाई निरन्तरता दिन सुझाव दिएको छ।
सतर्कता केन्द्रको विवरणले सरकारी कार्यालयमा कर्मचारीको समयपालना, पोशाक तथा आचरण, विद्युतीय हाजिरी र नागरिकलाई दिइने सेवाको गुणस्तर अझै पनि नियमित अनुगमन र सुधारको विषय रहेको देखाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
