काठमाडौं- काँचको स्क्रिनमा मात्र होइन र राजेश हमाललाई हेर्नकै लागि सुटिङस्थल पुग्ने प्रशंसकहरुको लर्को लाग्थ्यो कुनैबेला। सुगठित शरीर, लामो केश र बोल्ड आवाजकै कारण उनले सुरुवाती चरणका फिल्मदेखि नै थुप्रै प्रशंसक कमाइसकेका थिए। सुटिङमा उनलाई घेर्ने प्रशंसकको पहिलो रूचि नै हुन्थ्यो- मसल छाम्ने।
शारीरक संरचनाले समकालीन कलाकारभन्दा फरक थिए उनी। नियमित जिम जान्थे, खानपानमा ध्यान पुर्याउँथे। खेलकुद र व्यायाममा रुचि भएकैले आफू फिट रहेको बताउँछन् उनी।
'स्कुले जीवनदेखि नै मेरो रूचि शारीरिक व्यायाममा थियो,' उनी सम्झन्छन्, 'छुट्टीमा मामाघर (नवलपरासी) जाँदा पनि म बिहानै खेतमा दौडिरहेको हुन्थेँ। त्यो देखेर हजुरआमाले भन्नुहुन्थ्यो- कति दौडिन्छ? लड्लास् र चोट लाग्ला। म भने आफ्नै धुन छोड्दिनथेँ।'
एकदिन उनको भेट भयो भारतका चर्चित कुस्तीबाज दाह्रा सिंहसँग। पहिलो भेटमै भीमकाय शरीरबाट लोभिएका राजेशमा 'ज्यान अझै बनाउँछु' भन्ने भूत सवार भइहाल्यो। 'दाह्रा सिंहको शरीर पो शरीर भन्ने लाग्यो,' किशोरावस्थाको उत्तरार्द्धतिर फर्किए उनी, 'म यति प्रभावित भएछु कि एकदम फिट रहेको मान्छे जानीनजानी मोटाएर ११८ किलोसम्म पुगेँ।'
१८ वर्षको कलिलो उमेरमै एक क्विन्टलभन्दा बढी वजन रहेका राजेशमा भने गर्व थियो- ज्यान बनाएकोमा। 'आफूलाई त भयकंर रेस्लर हुँ भन्ने लाग्थ्यो,' उनले हाँस्दै भने, 'कतिपयले त्यस्तो फिट मान्छेको शरीर कसरी यस्तो भयो भनेर जिज्ञासा राख्दा मेरो जवाफ हुन्थ्यो- म त रेस्लर हुँ नि।'
यहीबीच परराष्ट्र मामिलामा काम गर्ने उनका बाबुको सरुवा थाइल्यान्डको बैंककमा भयो। समय-समयमा राजेश आफ्ना मातापितालाई भेट्न गइरहन्थे। यस्तैमा उनको परिचय एक महिलासँग भयो। उनीसँग भेट नभएको भए आफ्नो भीमकाय शरीरले अझ कस्तो रुप लिने हो, उनी भन्न सक्दैनन्।
तिनै महिलाको भेटले नै 'रेस्लर शरीर'सँगको मोह भंग भइदियो।
राजेश त्यसबेला १८–१९ वर्षका थिए, उनी थिइन् २६–२७ की। भेटघाट बाक्लिँदै गएपछि उनीहरुको डेटिङ सुरु हुन थाल्यो। 'आकर्षक शरीर बनाउने भए नियमित एक्सरसाइज गर्नुपर्छ भनेर सुझाव दिइरहन्थिन्,' उनी भन्छन्, 'एकदमै एक्ट्रयाक्टिभ मान्छे बन्नेछौ’ भन्ने उनको आग्रहले मलाई भित्रैसम्म छोयो।'
ती युवतीको सूत्र नै आफ्नो ज्यानलाई फिट बनाउने अचूक औषधि भइदियो। वजनदार राजेशले भोलिपल्टदेखि नै जीवनशैली परिवर्तन गरिहाले।
'उनको त्यही भनाइले आजसम्म काम गरिरहेको छ। मैले त्यसपछि आफ्नो सारा ध्यान फिट बनाउनमै लगाइरहेको छु,' उमेरले आधा शतक पार गरे पनि योङ देखिने उनी भन्छन्, 'फिल्ममा आएपछि झनै सचेत हुन थालेँ। यो क्षेत्रमा नआएको भए म आज जस्तो फिट नहुन पनि सक्थेँ।'
राजेश आज पनि नियमित व्यायाम गर्छन्। खानपानमा उस्तै सावधानी अपनाउँछन्। शारीरिक तन्दुरुस्तीका लागि फिटनेट अनिवार्य मान्ने उनी दैनिक एक घन्टा व्ययाममै व्यस्त हुन्छन्। 'एक्ट्रयाक्टिभ’ हुन सुरू गरेको व्यायाम पछि जीमतिर सोझियो।
विद्यार्थीकालमा अंग्रेजी फिल्म हेर्ने उनी सन् १९८० को दशकमा हलिउड अभिनेता चार्ल्स ब्रोन्सनको फ्यान समेत थिए। किनकि उनलाई चार्ल्सकै जस्तो ज्यान बनाउनु थियो। त्यो समयमा शरीरकै कारण फिल्मबाहिर पनि आफूले प्रशंसा पाउने गरेको उनी सुनाउँछन्।
जीममा पसिना बगाए पनि उनी हार्डकोर जिमर भने होइनन्। तर पनि सबै किसिमको व्यायामको अनुभव छ उनीसँग। 'यात्राका क्रममा पनि म व्यायाम छुटाउँदिन,' उनले भने, 'जीम गर्न मिलेन भनेर त्यतिकै बस्ने होइन। मिल्ने ठाउँमा रनिङ, पुसअप आदि गरेर एक्सरसाइजको कोटा पूरा गर्छु।' कतै घुम्न निस्कँदा पार्क भए/नभएको बुझेर मात्र जाने गरेको उनले बताए।
पहिला उनको बाइसेप्स १५-१६ इन्च थियो। कुनै समय ४८ इन्चसम्म पुगेको छाती छाती औसतभन्दा ठूलो छ। उनी अहिले ज्यानमा मसल थप्ने भन्दा पनि स्लिम बनाउनेमा ध्यान दिइरहेका छन्। 'त्यसका लागि स्ट्रेचिङ र योगा गर्ने गरेको छु,' ६ फिट अग्ला सदाबहार अभिनेता राजेशलाई एक्सरसाइज लत जस्तै बनिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
