काठमाडौं– कवि घनश्याम अस्तित्वको कविता संग्रह 'चिहानमाथि महल बनाइरहेको मान्छे' सार्वजनिक भएको छ।
शनिबार काठमाडौंमा कविहरू: श्यामल अधिकारी, राधिका कल्पित र सुरज रानाले उक्त कृतिको संयुक्त रुपमा विमोचन गरेका हुन्।
प्युठानमा जन्मिएर हाल दाङमा रहेर शिक्षण पेशा गरिरहेका अस्तित्वको उक्त संग्रहमा तत्कालीन ग्रामीण परिवेशको भोगाइ र वर्तमान राजनीतिक अवस्थालाई चित्रण गरिएको छ।
संग्रहमा जम्मा ६६ कविता समावेश छन्। जसमा राजनीतिक क्षेत्रमा देखिएका विसंगती, शिक्षा प्रणालीको कमजोरी, बेरोजगारी, गरिबीजस्ता विषयलाई समेटिएको कवि अस्तित्वले प्रकाश पारेका छन्।
कृतिको समीक्षा गर्दै कवि श्यामल अधिकारीले फरक शैलीमा स्थानीय भाषा र परिवेशअनुरुप शैलीको स्वाद दिने गरी कवि अस्तित्वले शब्दचित्रमा उतारेको उल्लेख गरे। मानिसले आश्रय दिएको सहरलाई गाली गरेर गाउँलाई बिर्सिएको सन्दर्भमा गाउँको सुगन्धलाई कविताले समेटेको बताए।
यस्तै, कवि राधिका कल्पितले चिहानमाथि महल बनाइरहेको मान्छेभित्रका कविताले प्रत्येक पाठकलाई आफ्नै भोगाइ र संघर्षको गहिराइको अनुभूति दिलाउने विश्वास व्यक्त गरिन्। उनले कविको बाल्यकालदेखि अहिलेको अवस्थासम्म छर्लंग चित्र आउने आख्यान जस्तो कविता संग्रह रहेको बताइन्।
कविताले तत्कालीन द्वन्द्वकालमा रोल्पा जिल्लाको अवस्था, अध्ययनका लागि सहर छिरेको संघर्ष आदिलाई पुस्तकले उजागर गरेको कवि कल्पितले बताइन्।
यसैगरी, कवि सुरज रानाले ग्रामीण परिवेशका विभिन्न गम्भीर विषयलाई कविले सरल भाषामा कविताको रुपमा उतारेको उल्लेख गरे। कवितामा कतिपय पात्र र परिवेशबारे कविताले स्पष्ट पार्न नसकेको उनको टिप्पणी छ।
बिएन पुस्तक संसार प्रालिले प्रकाशन गरेको उक्त पुस्तकको मूल्य तीन सय ५० रुपैयाँ रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
