पाटन– बैतडीको सिगास गाउँपालिका–७ को साङदा र थलार गाउँमा कक्षा ३ सम्मको मात्रै विद्यालय छ। कक्षा ४ र त्योभन्दा माथिल्लो कक्षामा अध्ययन गर्ने बालबालिकाले झन्डै १ घण्टा हिँडेर सिगास गाउँपालिका–६ मा रहेको गणेश माध्यमिक विद्यालय पुग्नुपर्छ।
१ घण्टा पैदल हिँड्नुपर्दाको दु:ख त छँदैछ, त्यो भन्दा पनि अर्को पीडादायक पक्ष छ ज्यानकै बाजी राखेर नदी तर्नुपर्ने बाध्यता। साङदा र थलार गाउँबाट सिगास–६ को गणेश माध्यमिक विद्यालय पुग्नलाई न्वाघरी गाड (नदी) तर्नुपर्छ।
बर्खामा बाढी आउँदासमेत ज्यानको बाजी लगाएर विद्यार्थी र शिक्षकहरु नदी पार गर्दै विद्यालय जान्छन्। हिउँदमा पनि पानीको बहाव उच्च नै हुन्छ। ज्यानको बाजी लगाएर नदी तर्ने विद्यार्थीहरु चिसोका कारण बिरामी पर्न थालेपछि अहिले स्थानीयले नदीमाथि काठको पुल बनाएका छन्।
काठको पुल पनि भरपर्दो छैन। पुल कतिबेला भत्किन्छ भन्ने पिरमा स्थानीय छन्।
स्थानीय शिक्षक लक्ष्मी चन्द नदी तर्दा चिसो पानीका कारण विद्यार्थीहरु बिरामी हुन थालेपछि गाउँलेहरु मिलेर काठको पुल बनाइएको बताउँछिन्। ‘नदी तराएर गणेश मावि लैजाने र ल्याउने काम गर्दै आएका थियौं। चिसो बढेपछि नदी तर्न समस्या भयो। स्थानीयले मिलेर काठको पुल बनाएका हौं,’ चन्दले भनिन्।
साङदा र थलार गाउँबाट दैनिक ४० जना बालबालिका नदी पार गरेर गणेश माध्यमिक विद्यालय पुग्नछन्। झोलुङ्गे पुल भए पनि बनाइदिन भन्दै पटक–पटक जनप्रतिनिधिको ध्यानाकर्षण गराए पनि आफूहरुको मागको सुनुवाइ नभएको स्थानीय बताउँछन्।
गाउँको छेउबाट बग्ने न्वाघरी गाडमा बगेर ३ जनाको मृत्यु भइसकेको छ। न्वाघरी गाडसँगै सेती नदीले पनि गाउँको जमिन कटान गर्दै आएको छ। सेती नदी र न्वाघर गाडमा आउने बाढीले धेरैपटक बस्ती पनि बगाएको छ।
बैतडीको सिगास गाउँपालिका–७ भौनेली पातलदेखि डोटीको आदर्श गाउँपालिका–६ पाङ बबिना जोड्ने पुल पनि बाढी बगाएको छ। उक्त पुल बगाएपछि यहाँका नागरिकको दैनिकी झन् कष्टकर बनेको छ।
डोटीको आदर्श गाउँपालिकासम्म सडक पुगेको छ। दैनिक उपभोग्य वस्तुहरु–नुन, चिनी, साबुन र लत्ताकपडा किन्न डोटीको आदर्श पुग्नुपर्छ। तर पुल नहुँदा ज्यानको जोखिम मोलेर नदी तर्नुपर्ने बाध्यता रहेको स्थानीय भीमबहादुर चन्द बताउँछन्।
सिगास गाउँपालिकाका अध्यक्ष हरिसिंह धामी न्वाघरी गाडामा पुल निर्माण गर्न स्थानीय सरकारको अगुवाइमा प्रदेश सरकारले सर्वेक्षण गरेको बताउँछन्। ‘पुल नहुँदा यहाँ समस्या छ। त्यसप्रति स्थानीय सरकार गम्भीर छ। स्थानीय सरकारको निरन्तरको पहलपछि अहिले प्रदेश सरकारले पुल निर्माणका लागि सर्वेक्षण गरिरहेको छ। अब पुल बन्छ,’ गाउँपालिका अध्यक्ष धामीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
