काठमाडौं- वैदेशिक रोजगारीका लागि पोर्चुगलमा रहेका चन्द्र बास्तोलाले अघिल्लो वर्षको दशैं मनाएनन्। अघिल्लो वर्ष साउनमा पोर्चुगल पुगेका उनी एग्रिकल्चर क्षेत्रको काममा लागेको बल्ल दुई महिना मात्रै भएको थियो। उनीसँगै ५ जना साथीहरुले पनि दशैंको टीकाको दिनमा समेत छुट्टी पाएनन्।
‘पोहोर साल त भरखर काम सुरु गरेका थियौं। छुट्टी लिन पाइएन। दशैंको टीकाको दिन पनि काम गर्यौ। यसपालि त ३/४ दिन छुट्टी लिएर दशैं मनाउने हो,’ उनले भने।
अहिले उनीसँगै ४ जना साथीहरु पनि एउटै कम्पनीमा काम गर्छन्। सबै जना मिलेर एउटा भेडो काटेर दशैं मनाउने तयारी रहेको उनले सुनाए।
एक वर्षअघिको दशैं उनले साथीसँगै ग्रिसमा मनाएका थिए। त्यो बेलामा उनीहरुले नेपालमा जसरी जमरा राखेर धुमधामले दशैं मनाए। त्यो वर्ष ६/७ जनाको समूहले २८ केजीको च्यांग्रा काटेर दशैं मनाए। टीकाको दिन एक आपसमा साथीभाइ मिलेर टीका लगाएर खुसी साटासाट गरेको अनुभव उनी सुनाउँछन्।
६ वर्षअघि उनी वैदेशिक रोजगारीको लागि मलेसियामा थिए। उनले त्यहाँ ३ वर्ष दशैं मनाए। दशैंको लागि तीन/चार दिनको छुट्टी लिएरै दशैं मनाए।
मलेसियामा हुँदा टीकाको दिनमा एउटै डेरामा बस्ने नेपालीमध्ये सबैभन्दा जेठो उमेर भएकाले सबैलाई टीका लागाई आशिर्वाद दिएर दशैं खुब रमाइलोसँग मनाएका थिए। उनले अहिलेसम्म ८ वटा दशैं विदेशी भूमिमा मनाइसकेका छन्।
‘विदेशमा जतिसुकै धन कमाए पनि चाडपर्वमा भने नरमाइलो हुने रहेछ। यहाँ साथीभाइसँग रमाइलो त गरिन्छ। तर चाडपर्वको बेलामा आफ्नो परिवारबाट टाढा हुनुपर्दा दुःख लाग्छ। यहाँ जति मिठो–मसिनो खाएकोभन्दा रमाइलो हुन्छ, परिवारसँग हुँदा गुन्द्रुक नै खान किन नपरोस्। दशैंतिहार नेपालमै रमाइलो,’ उनले भने।
०००
उच्च शिक्षा अध्ययनका लागि जापानमा रहेका गगन बडुले पनि यसपालिको दशैं मनाउन टीकाको दिन छुट्टी लिइसकेका छन्।
अघिल्लो वर्ष उनी दशैं आउनुभन्दा केही महिनाअघि मात्रै जापान पुगेका थिए। त्यतिबेला उनको रातिको समयमा ड्युटी थियो। बिहान ६ बजेपछि डेरामा फर्किन्थे। कामको चपेटाले दशैं आएको भेउ नै नपाएको उनी सुनाउँछन्।
‘पोहोर त दशैं आयो कि आएन थाहै पाइएन। यो पालि भने एक दिनको भए पनि छुट्टी लिइसकेको छु रमाइलो गरी मनाउँने हो दशैं,’ उनले भने।
यो वर्ष आफू बसेको क्षेत्रमा रहेका सबै नेपाली जम्मा भएर टीका लगाएर दशैं मनाउने तयारी रहेको उनी सुनाउँछन्।
नेपालमा परिवारसँग दशैं मनाउनु र विदेशमा साथीभाइसँग दशैं मनाउनुमा निकै फरक हुने उनी सुनाउँछन्। चाडपर्वमा आफ्नो परिवारबाट टाढा हुनुपर्दा जतिसुकै तडकभडक गरेर दशैं मनाए पनि रमाइलो नहुने उनी बताउँछन्।
‘आफ्नो भूमि भनेको आफ्नै हो। चाडपर्व आउँदा छुट्टै रौनक हुन्छ। दशैं आउँदा फूलपातीभन्दा २/३ दिन अघिदेखि घरमा जम्मा हुने र दशैंमा रमाइलो गरिन्थ्यो। यहाँ त छुट्टी पनि खासै मिल्दैन, अर्काको देशमा के दशैं के तिहार,’ बडुले भने।
०००
वैदेशिक रोजगारीका लागि कतारमा रहेका भरत पौडेल पनि यो वर्षको दशैंमा २/३ दिनको छुट्टी मिलाएर दशैं मनाउने तयारी रहेको सुनाउँछन्। सँगै डेरामा बस्ने साथीभाइसँग मिलेर दशैंमा रमाइलो गर्ने योजना छ। अघिल्लो वर्षको एक दिनकै छुट्टी पाए पनि दशैं रमाइलोका साथ मनाएको उनी सुनाउँछन्।
‘पोहोर धेरै दिनको छुट्टी पाइएन। तर पनि रमाइलोका साथ मनाइयो तर नेपालमा हुँदा जस्तो रमाइलो भने यहाँ हुँदैन। नेपालमा दशैं मनाउँदा अर्कै रमाइलो छ। आफ्नो देश, आफ्नो गाउँ आफ्नो परिवार, आफन्तसँगै दशैं मनाउँदा अर्कै मज्जा छ,’ उनले भने।
उनले कतारमा रहेर ४ वटा दशैं मनाइसकेका छन्। हरेक वर्ष सँगै बस्ने साथीभाइसँग मिलेर जमरा राख्ने, टीका लगाउने सुख–दुःख साटासाट गर्दै दशैं मनाउँदै आएका छन्।
०००
वैदेशिक रोजगारीका लागि रोमानिया पुगेकी सम्झना क्षेत्री यो वर्षको दशैं खासै उल्लासमय नभएको बताउँछिन्। अघिल्लो वर्ष पनि दशैंको दिन समेत छुट्टी भएको थिएन। यो वर्ष पनि एक दिनको मात्रै छुट्टी पाएकी छिन्।
‘यहाँ काम गर्न आउने नेपालीलाई कुनै चाडबाडले छुँदैन। खासै छुट्टी पनि मिल्दैन, त्यसैले दशैं खासै रमाइलो हुँदैन। अघिल्ला वर्ष दशैंको दिनमा पनि काममा जानुपर्ने हुन्थ्यो। यो वर्ष टीकाको दिन छुट्टी लिएको छु,’ उनले भनिन्। तीन वर्षदेखि रोमानियामा रहेकी उनी चाडपर्व आउँदा नेपालको याद आउने सुनाउँछिन्।
नेपालमा फूलपाती, अष्टमी, नवमी, दशमी गरी दिनदिनै फरकफरक तबरले रमाइलो हुने हुन्थ्यो। तर विदेशमा न फूलपाती न अष्टमी, टीकाकै दिनमा छुट्टी मिलाएर दशैं मनाउँदा खासै रमाइलो नहुने उनी सुनाउँछिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750327258.png)
-1749826086.png)
