संगीत

जब आनन्दले पुरानो गीत ‘भाइरल’ भएको थाहा पाए [भिडिओ]

समर्पण श्री शनिबार, असोज २०, २०८० ०६:५६

काठमाडौं– केही महिनाअघि गायक आनन्द कार्की कतारमा सांगीतिक प्रस्तुतिको क्रममा व्यस्त थिए।

एकदिन फेसबुक खोलेर हेर्छन् त गायिका प्राश्ना शाक्यको गुनासो र आग्रह भरिएको स्टाटस आँखाअगाडि आयो। स्टाटसमको आशय थियो, ‘अहिले टिकटकमा बादल, वर्षा, बिजुली’ गीत सर्वाधिक हिट भइरहेको छ। टिकटकमा गीतको फिमेल सिंगरको नाम गलत प्रचार भएको छ।’

त्यो गीत १८ वर्षअगाडि आनन्द कार्की र प्राश्ना शाक्यले गाएका थिए।

त्यसपछि टिकटक र सामाजिक सञ्जालमा उनले गीत भाइरल भइरहेको पाए। केही साथीहरूले पनि भने, ‘यो गीत तपाईंले गाउनुभएको रहेछ। अहिले नेपाल भारत दुवै देशमा चर्चित छ।’

त्यसलगत्तै नेपाल आएपछि गीतलाई रिमेक गरेर युट्युवमा राखे। ‘१८ वर्षअघिको गीतले मलाई कमब्याक गरायो,’ उनले हाँस्दै सुनाए। यो गीत त्यतिबेला ‘कर्तब्य’ फिल्ममा समावेश थियो।

गीतले पुनर्चर्चा पाएपछि उनलाई आशा छ, ‘पछिल्लो समय चलचित्रमा मेरो स्वर लिन बन्द गर्नुभएको थियो। अब फेरि संगीत निर्देशकले मौका दिनुहोला कि।’

०००

४० को दशकमा आनन्दले पहिलो गीत ‘जीवनमा धेरै खोला तर्नु छ’ रेकर्डिङ गराए। त्यसपछि ६०को दशकको मध्यतिरसम्म उनले कहिल्यै पछाडि फर्किएर हेर्नुपरेन। ‘जनम जनम जिउँला सँगै, भरे आउँछु सपनीमा, यी हल्लाहरू हुन्, लाग्छ मन हेरिरहुँ, वनमा फूल्यो फूल’ लगायत दर्जनौँ गीत हिट दिएका थिए आनन्दले।

५० को दशकपछि उनको व्यस्तता झन् चुलियो। कतिपयका राम्रा गीतका प्रस्तावमा पनि उनले समय निकाल्न सकेनन्। ‘यहाँ देशको छ चिन्ता’ गीत म एकदमै व्यस्त भएकाले समय दिन सकिनँ। ‘कहिले तिम्रो पछ्यौरीमा अल्झें’ गीत पनि समय दिन नसकेरै मेरो हातबाट छुट्यो,’ उनी सम्झिन्छन्।’

ती गीत हिट भएको सुनेपछि आनन्द पछुताए। त्यतिबेलै उनले बेलायत, कतार, हङकङ लगायत थुप्रै देशमा सांगीतिक प्रस्तुतिका लागि पुगिसकेका थिए। ‘मेरो लागि यस्तो गोल्डेन समय थियो, संगीतकारलाई एउटा गीत आनन्द कार्कीले गाइदिए हुन्थ्यो जस्तो लाग्थ्यो। सबैको प्यारो गायक थिएँ,’ उनी भन्छन्।

तर समय सधैं कहाँ एकैनाश चल्दो रहेछ र। आनन्दलाई सम्झिँदा यस्तै लाग्छ।

०६३/०६४ पछि अवस्था बदलियो। दिनमा निकै व्यस्त हुने गायक पनि महिनौँसम्म कामबिहीन हुनुपर्यो। ‘०६४पछि अवस्था उति राम्रो थिएन। चलचित्र बनाउन कम भयो। सबै पलायन हुन थाले। फ्रस्टेसन जस्तो भयो। त्यतिबेला कामहरू बन्द भए। रेकर्डिङ ठप्प भयो। कार्यक्रम कम भयो,’ उनी सुनाउँछन्।

त्यहीबेला आनन्दलाई सांगीतिक प्रस्तुतिका लागि सिंगापुरबाट निम्तो आयो। उनी सिंगापुर गए। तत्काल नेपाल फर्किएर कामहरू पाउने माहोल थिएन। डेढ वर्ष उतै बिताए।

जब उनी नेपाल फर्किए। नयाँ गायकहरूको आगमन भइसकेको थियो। काम गर्ने शैलीमा परिवर्तन भइसकेको थियो। फिल्ममा पहिलेजस्तो गीतहरू समावेश थिएनन्। हिरोकै मानक पनि बदलिसकेको थियो। गीतमा स्वाद बदलिसकेका थिए। म्युजिक डाइरेक्टर आफैंले गीत गाउन थालेका थिए। ‘मेरो अन्तिम सुपरहिट गीत ‘म तिमी विना मरिहाल्छु’ भयो। त्यसपछि हातबाट अवसरहरू छुटे,’ उनी सुनाउँछन्।

०००

केही वर्षअघि मात्र आनन्दले आफ्नो युट्युव च्यानल खोले। उनले आफ्ना पुराना गीत युट्युवमा हाल्न थाले। एउटा कार्यक्रममा गाएको ‘जनम जनम’ गीत च्यानलमा राखे।

त्यो गीतले उनको च्यानललाई उठाइदियो। उनको पुनरागमन गराइदियो।

यसपालि ‘बादल, वर्षा, बिजुली’ले उनलाई नेपालमा मात्र हैन, भारत लगायत अन्य देशमा पनि चिनायो।

अहिले आनन्द आफ्ना पुराना गीतहरूलाई रिमेक गर्ने योजनामा छन्। जसले अहिलेको पुस्तामाझ पुन: उनलाई परिचित गराउनेछ।

भिडिओ