जापानको केन्द्रीय बैंकका पूर्व गभर्नर भन्छन्– नेपालमा आर्थिक वृद्धिको ठूलो सम्भावना छ

अर्थ समाचार

नेपाल लाइभ शुक्रबार, असोज १९, २०८० १४:५८

काठमाडौं– जापानको केन्द्रीय बैंक, बैंक अफ जापानका पूर्वगभर्नर हारुहिको कुरोदाले नेपालको अर्थतन्त्रमा केही चुनौती रहे पनि आर्थिक वृद्धिको ठूलो सम्भावना रहेको जनाएका छन्। काठमाडौंको दरबारमार्गमा आयोजित पत्रकार सम्मेलनमा बोल्दै एसियाली विकास बैंकका पूर्व अध्यक्षसमेत रहेका कुरोदाले १० वर्षको अवधिमा नेपालको अर्थतन्त्रमा ठूलो परिवर्तन देखिएको बताए।

‘पछिल्लो १० वर्षमा नेपालको आर्थिक विकासबाट म प्रभावित भएको छु, तर यहाँ आर्थिक विकसको अझै प्रचुर सम्भावना छ,’ उनले भने।

उनले नेपालको अर्थतन्त्रका ३ वटा क्षेत्रमा आफूले सम्भावना देखेको बताए। उनले नेपालमा मानव स्रोत, जलस्रोत र पर्यावरणीय स्रोत प्रचुर रहेको भन्दै यस्ता स्रोतको सदुपयोग गर्नसके नेपालमा आर्थिक विकास हुने जिकिर गरे। उनले नेपालमा अझै धेरै चुनौती रहेको उल्लेख गर्दै नेपाल सरकार र यहाँको राजनीतिक नेतृत्वले त्यसबारे ध्यान दिनेमा आफू विश्वस्त रहेको बताए।

नेपाल भ्रमणका क्रममा आफूले यहाँका अर्थशास्त्रीहरु, राजनीतिक नेताहरु एवम् सरोकारवालाहरुसँग भेटघाट गरेको र अर्थतन्त्रबारे छलफल गरेको उनले जानकारी दिए।

पत्रकार सम्मेलनका क्रममा उनले नेपालले धेरै ऋण लिनुअघि सावधान हुनुपर्ने बताए। जापानमा कूल ग्राहस्थ उत्पादन (जीडीपी) र ऋणको अनुपात २६३ प्रतिशत रहेको उल्लेख गर्दै उनले चालु खाता बचतमा रहेकाले जापानलाई ऋण लिन सहज भएको बताए। तर नेपालको चालु खाता घाटामा रहेकाले ऋण लिनुअघि सावधानी अपनाउनुपर्ने उनको तर्क छ।

‘जापानको चालु खाता ठूलो नाफामा छ। यस प्रकारको बचतले जापान सरकारलाई ऋण लिन सहज भएको छ,’ उनले भने, ‘मेरो विचारमा थप ऋण लिनुअघि नेपाल सचेत हुनुपर्छ। ऋण नै लिनुपर्ने अवस्था भए पनि एसियाली विकास बैंक र विश्व बैंकजस्ता संस्थाबाट सहुलियतपूर्ण ऋण लिनुपर्छ।’

पत्रकार सम्मेलनमा एसियाली विकास बैंकका पूर्व उपाध्यक्ष विन्दुनाथ लोहनीले पूर्वगभर्नर कुरोदालाई नेपालमा स्वागत गर्न पाउँदा आफू खुशी भएको जनाए। उनले पूर्वगभर्नर कुरोदाले नेपाली अर्थतन्त्रलाई आशावादी दृष्टिकोणले हेरेको भन्दै यसबाट आफू प्रभावित भएको उल्लेख गरे।
उनले राजनीतिक नेतृत्वको ध्यान आर्थिक वृद्धि तथा युवाहरुको विकास एवम् रोजगारीमा केन्द्रित हुनुपर्ने भन्दै नेपालमा सूचना प्रविधिजस्ता क्षेत्रको ठूलो सम्भावना रहेको र निजीस्तरबाट लगानी गरेर यस क्षेत्रमा युवाहरुलाई परिचालन गर्नुपर्ने जिकिर गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्रतिनिधिसभा बैठक बस्दै, यस्तो छ कार्यसूची

धरहरा प्रवेश शुल्कबाट एक करोड ५२ लाखको राजस्व संकलन, अब ५ बजेसम्म खुला रहने

आजको मौसमः तराईमा हुस्सु, पहाडका केहि क्षेत्रमा सामान्य बदलीको सम्भावना