फाइल तस्बिर
एजेन्सी- भारतको सुदूर उत्तरपूर्वी क्षेत्रमा बाल विवाहविरुद्ध सरकारले गरेको दोस्रो कारबाहीका क्रममा यो वर्ष एक हजारभन्दा बढी व्यक्ति पक्राउ परेका छन्। मंगलबार सार्वजनिक एक तथ्यांकमा उक्त जानकारी दिइएको छ।
संयुक्त राष्ट्रसंघको तथ्यांकअनुसार भारतमा २२ करोडभन्दा बढी बाल दुलही छन्। यद्यपि, भारतमा बाल विवाहको संख्यामा नाटकीय रूपमा कमी आएको देखिन्छ। आसाम राज्यले गत फेब्रुअरीमा चार हजार जनालाई पक्राउ गरिसकेको थियो, जसमा विवाहित दम्पतीका आमाबाबु र कम उमेरका विवाहमा हस्ताक्षर गर्ने रजिष्ट्रारहरू पनि सामेल थिए।
राज्यका मुख्यमन्त्री हिमन्त विश्वा शर्माले प्रहरीले बाल विवाहविरूद्धको अभियानको दोस्रो चरण मंगलबारदेखि सुरु गरिएको जानकारी दिए। उनले सामाजिक सञ्जाल एक्स (ट्वीटर)मा लेखेका छन्, ‘पक्राउ पर्नेको संख्या अहिले एक हजार ३९ पुगेको छ। यो संख्या अझै बढ्न सक्ने सम्भावना छ।’
सन् २०२६ सम्ममा आफ्नो राज्यमा बाल विवाहलाई पूर्णरूपमा अन्त्य गर्ने योजनासहित प्रशासनले नयाँ अभियान चलाएको शर्माले बताए।
भारतमा १८ बर्षभन्दा माथिको विवाहलाई कानुनी विवाहको मान्यता दिइएको छ तर विशेष गरी गरीब ग्रामीण क्षेत्रहरूमा लाखौं बालबालिकाहरु वैवाहिक बन्धनमा बाँधिन बाध्य छन्। थुप्रै आमाबाबुले आफ्नो आर्थिक सुरक्षा सुधार्ने आशामा आफ्ना छोराछोरीको कम उमेरमा नै विवाह गरिदिन्छन्।
बाल विवाह हुँदा खास गरी केटीहरूले आफ्नो विवाहपछिको घरमा परिवारका लागि खाना पकाउन, घरको सरसफाई र अन्य घरेलु कामकाजका लागि विद्यालय छोड्छन्। यसको परिणाम विनाशकारी हुन सक्छ, किनकि र सानै उमेरमा विवाह गरेर विद्यालय छोड्दा उनीहरूले शैक्षिक ज्ञान आर्जन गर्न सक्दैनन् र सानो उमेरमा बच्चा जन्माउँदा स्वास्थ्य समस्याहरू पनि भोग्ने गरेका प्रशस्तै उदाहरण पनि देख्न सकिन्छ ।
सन् २०१७ को एक ऐतिहासिक फैसलामा भारतको सर्वोच्च अदालतले बाल विवाहलाई दुरूत्साहन गर्न कम उमेरकी श्रीमतीसँग यौन सम्बन्ध राख्नु पनि बलात्कार भएको फैसला सुनाएको थियो। तर फैसलालाई भारतका अधिकांश पाहाडी क्षेत्रमा व्यवहारिक रूपमा कार्यान्वयनमा ल्याउन सकिएको देखिँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।