काठमाडौं– नेकपा एकीकृत समाजवादी पार्टीका अध्यक्ष तथा पूर्व प्रधानमन्त्री माधवकुमार नेपालले व्याख्यात्मक घोषणाको रुपमा एमसीसी पास नगरेको भए नेपालको हात तल पर्ने, नेपालको स्वाभिमानले नतमस्तक हुनुपर्ने स्थिति आउने दाबी गरेका छन्।
सोमबार काठमाडौंमा आयोजित एक कार्यक्रमलाई सम्बोधन गर्दै उनले यस्तो दाबी गरेका हुन्। उनले व्याख्यात्मक घोषणापछि मात्रै पास गर्नाले विदेशीको गुलाम बन्नु नपरेको बताए।
अध्यक्ष नेपालले एमसीसीको घोर विरोध गरेको कारण वाहवाही पाउने भए मजदुर किसान पार्टी र मोहनविक्रम सिंहको पार्टीले सय सिट कटाउने बताए। एमसीसीको विरोध गर्न लगाएर आफ्नो पार्टीलाई सरकारबाट फाल्ने कुचेष्टा भएको बताए।
उनले भने, ‘हामीले व्याख्यात्मक टिप्पणी भनेर त्यसको अंग बनाएर पारित गरेका छौं। केही पार्टीले केही थप्नु पर्दैन, संशोधन परिमार्जन गर्नु पर्दैन, यथास्थितिमा पास गर्नुपर्छ भनेका थिए। यदी हामीले व्याख्यात्मक घोषणाको रुपमा थप्ने काम नगरेको भए एमसीसी यथास्थितिमा पास हुने थियो। नेपालको हात तल पर्ने थियो, नेपालको स्वाभिमानले नतमस्तक हुनु पर्दथ्यो। हाम्रै पार्टीको पहल कदमीमा व्याख्यात्मक टिप्पणी ल्याएर हाम्रो देशको स्वाभिमानको रक्षा गरेका छौं।’
विगतका सरकारहरुले पनि यो सम्झौता गरेको तर आफूहरुले कमजोरी देखेपछि देशको स्वाधिनता रक्षाका लागि व्याख्यात्मक टिप्पणी गरेको उनको भनाइ छ। उनले भने, ‘विगतमा भएका सरकारहरुले केही सम्झौता गरेका थिए। त्यस सम्झौतालाई एमसीसी भनिन्छ। मिलिनियम कम्प्याक्ट कोप्रेशनले जुन एउटा योजना ल्यायो, पहिले त्यो बेलामा कम्युनिष्ट पार्टीकै सरकार थियो। केपी ओलीकै सरकार पनि थियो। कमी कमजोरी हामीले देख्यौं। हाम्रो मुलुकको स्वाधिनतामा स्वाभिमानमा, परराष्ट्र नीतिमा असर पर्नेकुरा देख्यौं। त्यसपछि असंलग्न परराष्ट्र नीतिको रक्षा गरेका छौं।’
उनले केही मानिसको गीत नै एमसीसी अस्वीकार गर्नुपर्थ्यो भन्ने रहेको बताए। अस्वीकार गरेका कारण आफूहरुलाई जनताले वाहीवाही गर्ने कुरा कल्पनासम्म पनि नभएको उनको दाबी छ।
नेपालले भने, ‘केही मानिसको गीत नै एमसीसी अस्वीकार गर्नु पर्दथ्यो भन्ने छ। त्यो गरेर हामीलाई सरकारबाट फालिदिने, पार्टीलाई कमजोर बनाउने, अमेरिकन स्वार्थको रक्षा हुने, विदेशीको हालीमुहाली चल्दा तमासा हेरेर बस्ने, जनताले हाम्रो वाहवाही गर्ने थिए भनेर कल्पना गर्न सकिँदैन। एमसीसीको घोर विरोध गरेको मजदुर किसान पार्टी विरोध गरेको कारण वाहवाही पाउँथ्यो भने देशव्यापी फैलिसक्थ्यो। एमसीसी विरोधकै आधारमा हुने भए मोहनविक्रमजीहरुको पार्टीलाई सारा देशका जनताले भोटै भोट खसालेर सय सिट दिन्थे। हुँदो रहनेछ।’
हामीलाई सरकारबाट निकाल्ने षड्यन्त्र भइरहहेको छ
नेपालले सत्ता गठबन्धनबाट आफ्नो पार्टीलाई बाहिर निकाल्ने षड्यन्त्र भइरहेको बताएका छन्। पूर्वप्रधानमन्त्रीसमेत रहेका अध्यक्ष नेपालले गठबन्धनलाई कमजोर पार्नका लागि आफ्नो पार्टीलाई बाहिर निकाल्ने काम भइरहेको बताए।
उनले सबैखाले यस्ता षड्यन्त्रबाट होशियार रहन आग्रह गरे। गठबन्धनलाई बलियो बनाउने जिम्मेवारी आफूहरुको रहेको भन्दै उनले गठबन्धन बनाउने काममा भूमिका आफूहरुले नै खेलेको बताए। अनुचित कुराकाविरुद्धमा संघर्ष गर्ने र नयाँ स्तरको उन्नत कम्युनिष्टहरुको एकता कायम गर्दै अघि बढ्ने नीति आफूहरुको रहेको उनको भनाइ छ।
गठबन्धनमा आफूहरुलाई कसैले तानेर गएको नभई अरुलाई आफूहरुले तानेर ल्याएको उनले दाबी गरे। उनले भने, ‘हामी कसैले तानेर गएको होइन। हामीले तानेर ल्याएको हो। यो कुराप्रति गौरवबोध गर्नुपर्छ। हामीले गठबन्धनलाई जोगाउने, बढाउने काममा भूमिका खेल्नुपर्छ। कमजोरी भएका छन् भने आलोचना गर्न सकिन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
