राजविराज– अर्थमन्त्री डा. युवराज खतिवडाले करका सम्बन्धमा देखिएको अन्यौल चाँडै सम्बोधन गरिने बताएका छन्। संघ, प्रदेश र स्थानीय सरकारबीच पर्याप्त समन्वय नहुँदा जनताले धेरै ठाउँमा कर तिर्नुपर्ने अवस्था बनेको उनको भनाइ छ।
राजविराजमा ‘करदाता सेवा कार्यालय’ को उद्घाटन गर्न सोमबार सप्तरी आएका अर्थमन्त्री खतिवडाले भने, ‘एउटै बिन्दुबाट कर संकलनको व्यवस्था मिलाउनु पर्ने थियो। केही कमजोरी देखिएका छन्, त्यसको चाँडै समाधान हुन्छ।’ करको बारेमा भइरहेका अन्य आलोचना ‘फेसबुके हल्ला’ मात्रै भएको खतिवडाको टिप्पणी छ। ‘करका सम्बन्धमा अहिले फेसबुके हल्ला धेरै भइरहेका छन्,' उनले थपे–‘तर यथार्थ त्यो होइन।'
सरकारले पर्याप्त अध्ययनपछि करको दायरा र दर निर्धारणको नीति ल्याएकाले अनावश्यक हल्लाको पछि नलाग्न पनि उनले आग्रह गरे। संविधानले स्थानीय सरकारलाई वित्तीय स्रोत व्यवस्थापन र परिचालन गर्न सक्ने अधिकार दिएकाले त्यही अधिकार प्रयोग गरी कर नीतिमा हेरफेर गरेकाले करको दुरुपयोग नहोस् भन्नेमा चनाखो हुनुपर्ने बताए।
शिक्षा, स्वास्थ्य, रोजगारी, सामाजिक सुरक्षा लगायत आधारभूत सेवा सरकारले करबाट नै पूर्ति गर्ने भएकाले कर संकलनको विषयलाई अनावश्यक रुपमा लिन नहुने उनको धारणा छ। खतिवडाले भने, ‘कर तिर्नु भनेको राष्ट्रको ढुकुटी बलियो बनाउनु हो। ढुकुटी बलियो भए मात्रै विकास र समृद्धिका काम अघि बढाउन सकिन्छ।’
रेलमार्गको काम अघि बढ्यो
मन्त्री खतिवडाले सरकार यतिबेला महत्वपूर्ण योजना पूरा गर्ने अभियानमा जुटेको बताए। पूर्वपश्चिम रेलमार्ग निर्माणका लागि भारतसँग ऋण सम्झौताको काम अघि बढिसकेको उनले जानकारी दिए। भारत भएर जनकपुर आउने रेल वर्दिवास हुँदै हेटौंडासम्म पुर्याउन काम अघि बढिरहेको पनि बताए।
यसैगरी हुलाकी सडकको काम सरकार आफैंले पूरा गर्न लागेको पनि खतिवडाले बताए। हुलाकी सडक निर्माणमा पैसा भन्दा पनि कार्यान्वयनको समस्या महत्वपूर्ण भएको उनको भनाइ छ। ‘केहि ठाउँमा मुआब्जाको समस्या देखिएको छ, त्यो पनि चाँडै समाधान भएर निर्वाध निर्माण कार्य अघि बढ्छ,’ उनले भने।
उद्योग वाणिज्य संघद्वारा १० बुँदे अवधारणा पत्र
अर्थमन्त्री खतिवडालाई सोमबारै सप्तरी उद्योग वाणिज्य संघले १० बुुँदे अवधारणा पत्र बुुझाएको छ। मन्त्रीको सम्मानमा आयोजित स्वागत तथा भेटघाट कार्यक्रममा संघका अध्यक्ष अरुण प्रधानले जिल्लाको समग्र विकास निर्माणलाई समेटर अवधारणा पत्र बुुझाएका हुन्।
अवधारणा पत्रमा राजविराज भन्सार कार्यालयको स्तर वृद्धि, राष्ट्रिय वाणिज्य बैंक मार्फत भारु नोटको निर्बाध सटहीको व्यवस्था, छोटी भन्सार कार्यालयहरू सञ्चालन, नेपालको तिलाठी र भारतको कुनौली जोड्ने मैत्री पुलको निर्माण, राष्ट्रिय वाणिज्य बैंक मार्फत सुनचाँदी व्यवसायीलाई उपलब्ध हुँदै आएको सुनको परिमाण वृद्धि, सुनचाँदी कारोबारमा प्रहरी प्रशासनबाट हुँदै आएको अवरोधको अन्त्य लगायतका विषय समेटिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
