काठमाडौं– सशस्त्र प्रहरी बलमा नयाँ दरबन्दी थप भएको छ। सशस्त्र प्रहरी प्रधान कार्यालयले गरेको प्रस्तावलाई पारित गर्दै मन्त्रिपरिषद् बैठकले नयाँ दरबन्दी सिर्जना गरेको छ।
मन्त्रिपरिषद् बैठकले नयाँ दरबन्दी सिर्जना गरेसँगै आर्थिक वर्ष २०७९/८० को अन्तिम दिन हिजो (आइतबार) सशस्त्रले एकै पटक एसएसपीदेखि सहायक हवल्दारसम्मका लागि बढुवा भन्दै सूचना समेत प्रकाशित गरेको छ।
यदि आइतबार दरबन्दी थप नभएको भए आज साउन १ गतेबाट कार्यसम्पादन मूल्यांकन (कासमू) फारम भर्नु पर्ने भएकाले कात्तिक, मंसिरसम्म बढुवाका लागि सूचना निकाल्ने अवस्था रहँदैनथ्यो। जसकारण मन्त्रपरिषद्ले नयाँ दरबन्दी स्वीकृत गरेर बढुवा खुलाउन भन्दै निर्देशन दिएपछि सशस्त्र प्रहरी प्रधान कार्यालयले बढुवाको सूचना निकालेको हो।
गृह मन्त्रालय उच्च स्रोतका अनुसार सशस्त्र प्रहरीमा साधारण समूहतर्फ १७५ नयाँ दरबन्दी थप भएको छ। ‘यीमध्ये ७७ दरबन्दी प्राविधिकतर्फका खाली पदहरु र समायोजनबाट साधारणतर्फ मिलान गरिएको हो भने ९८ नयाँ दरबन्दी थप भएको हो,’ गृह मन्त्रालय स्रोतले नेपाल लाइभसँग भन्यो। योसँगै ३७ हजार ५५ दरबन्दी रहेको सशस्त्रको संख्या अब ३७ हजार १ सय ५३ हुने भएको छ।
तल्लो तहका केही पदहरु समायोजन गरेर केही कटौती गरी उनीहरुको सेवा सुविधा तथा तलवभत्ता बराबरको आर्थिक व्यवभारबाट माथिल्लो पदमा नयाँ दरबन्दी मिलान गरिएको छ। यसरी समायोजन र खाली हुने प्राविधिकतर्फको दरबन्दीबाट ७७ पद सिर्जना गरिएको हो भने बाँकी ९८ पद नयाँ थप भएका हुन्।
जसअनुसार सशस्त्र प्रहरी वरिष्ठ उपरीक्षक (एसएसपी)मा ११ वटा नयाँ दरबन्दी थप गरिएको छ। सशस्त्र प्रहरी उपरीक्षक (एसपी)मा ४३, सशस्त्र प्रहरी नायव उपरीक्षक (डीएसपी) मा ३१, सशस्त्र प्रहरी निरीक्षक (इन्स्पेक्टर)मा ४२ र सिनियर सशस्त्र प्रहरी नायव निरीक्षक (वरिष्ठ सई) मा ४८ दरबन्दी थप गरिएको स्रोतले नेपाल लाइभलाई जानकारी दियो।
नयाँ दरबन्दी स्वीकृत भएसँगै ठूलो संख्यामा सशस्त्र प्रहरी कर्मचारीहरु बढुवा हुने भएका छन्। थपिएका ११ एसएसपी पद र यसअघि नै रिक्त ४ गरी १५ जना एसपीहरु अब एसएसपीमा बढुवा हुने भएका छन्। उनीहरु २० वर्षपछि एसएसपी बन्न लागेका हुन्।
त्यसैगरी थप गरिएको ४३ दरबन्दीसहित ६३ जना डीएसपीहरु २० वर्षपछि एसपी बन्नेछन्। २०६० सालमा भर्ना भएको सशस्त्र प्रहरी निरीक्षकको ठूलो टोली अहिलेसम्म डीएसपीमै रहेका छन्। अब उनीहरु एसपीमा बढुवा हुने बाटो खुलेको छ।
त्यसैगरी थप गरिएको नयाँ दरबन्दी ३१ सहित १०३ जना इन्स्पेक्टरहरु १५ वर्षपछि डीएसपीमा बढुवा हुने भएका छन्। २०६४ सालमा भर्ना भएका सि.सं. ७ का इन्स्पेक्टरहरु अघिल्लो बढुवामा छुटेका थिए। अब नयाँ दरबन्दी थप भएसँगै उनीहरुको पनि बढुवा हुने बाटो खुलेको छ।
नयाँ दरबन्दीसहित ५१ जना वरिष्ठ सई इन्स्पेक्टरमा बढुवा हुनेछन् भने ४९ जना सई वरिष्ठ सईमा बढुवा हुनेछन्। ६७ जना असई सईमा, २१० जना वरिष्ठ हवल्दार असईमा बढुवा हुने गृह स्रोतले जानकारी दियो।
२२४ जना हवल्दारलाई वरिष्ठ हवल्दारमा, २ हजार १ सय २८ जना सहायक हवल्दारलाई हवल्दारमा र ४ हजार ४० जवानलाई सहायक हवल्दारमा बढुवा गरिने भएको छ।
यसरी समग्रमा ६ हजार ९ सय ६० सशस्त्र प्रहरी कर्मचारीको एकै पटक बढुवा हुन लागेको हो। यसले सशस्त्र प्रहरी कर्मचारीमा निकै हर्षोल्लाहस छाएको छ। ठूलो संख्यामा एकै पटक बढुवा खुलेसँगै एउटै पदमा लामो समयसम्म बस्नुपर्दा आउने नैराश्यता, त्यसले पार्ने कार्यसम्पादनमा असर, बीचमै राजीनामा जस्ता विषयहरुको केही हदसम्म भए पनि रोकिने र नयाँ ऊर्जाका साथ कार्यसम्पादन हुने सशस्त्र हेडक्वाटरको बुझाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
