कुश्मा– पर्वतको कुश्मा नगरपालिका–३ दुर्लुङको गौडामुनिमा शनिबार राति जिप दुर्घटना हुँदा १ बालिकाको मृत्यु भएको छ। दुर्घटनामा ११ जना घाइते भएका छन्।
जिल्ला ट्राफिक प्रहरी कार्यालय पर्वतका प्रमुख सुमन निउरेका अनुसार सदरमुकाम कुश्माबाट दुर्लङका लागि छुटेको ग१ज ५२२९ नम्बरको जिप दुर्घटनामा परेको थियो। दुर्घटनामा परी गम्भीर घाइते भएकी कुश्मा–३ की ७ वर्षीया बालिका शीतल विकको उपचारका क्रममा निधन भएको हो। टाउको र आँखामा गम्भीर चोट लागेकी उनलाई उपचारका लागि पर्वत अस्पताल पुर्याइएको थियो।
सोही स्थानका चार वर्षीय प्रिन्स क्षेत्री र ५० वर्षीया चन्द्रकला क्षेत्रीलाई थप उपचारका लागि गण्डकी अस्पताल पोखरा पठाइएको छ। प्रहरीका अनुसार उनीहरू दुवैको अवस्था मध्यम छ।
दुर्घटनामा परी दुर्लुङकै तीन वर्षीय सौरभ विक, २३ वर्षीया शान्ति विक, ७० वर्षीय कृष्णप्रसाद पाध्या, १६ वर्षीय निशान परियार, ५५ वर्षीया हीरादेवी मगर, ३५ वर्षीय मीनबहादुर क्षेत्री, ४७ वर्षीय अमृत शर्मा, ७६ वर्षीय भजत शर्मा, पोखरा बस्ने १६ वर्षीय अमर विक घाइते भएका छन्।
उकालो बाटोमा चढ्दै गरेको जिप अचानक अनियन्त्रित भइ सडकबाट करिब ३०–३५ मिटर तल खसेको थियो। जिपका चालक प्रहरीको नियन्त्रणमा रहेको र जिप घटनास्थलमा सवारीधनीको जिम्मामा रहेको प्रहरी निरीक्षक प्रकाश रावतले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
