काठमाडौं– मंगलबार बिहान १०:५ मिनेटमा सोलुखुम्वुवाट काठमाडौका लागि उडेको मनाङ एअरको हेलिकोप्टर सम्पर्कविहीन भयो। लुक्ला विमानस्थलसँग १० बजेर १३ मिनेटमा अन्तिम पटक हेलिकोप्टरको सम्पर्क भएको थियो। त्यसपछि हेलिकोप्टर एकाएक हरायो।
अन्तिम सम्पर्क हुँदा हेलिकोप्टर लामजुरा क्षेत्रमा पुगेको थियो। यो सोलुखुम्वुको सोलुदुधकुण्ड नगरपालिका र लिखुपिके गाउँपालिकाको सीमानामा हो। उक्त क्षेत्रबाट हेलिकोप्टरले काठमाडौं टावरसँग समन्वय र सम्पर्क गर्नुपर्ने थियो। तर काठमाडौसँग कुनै सम्पर्क नै भएन।
टावरसँग सम्पर्क टुटेपछि काठमाडौं विमानस्थल शतर्क हुँदै विमान बेपत्ता भएको जानकारी लिएर खोजी र सम्पर्कको प्रयासमा जुटेको त्रिभुवन विमानस्थल उड्ड्यन कार्यालयले जनाएको छ। खोज तथा उद्धार केन्द्रले अल्टिच्यूड एअरको दुई हेलिकप्टर सम्भावित घटनास्थलतर्फ खटाउने निर्णय पनि गर्यो। यो सँगै सार्वजनिक सञ्चार माध्यममा हेलिकोप्टर सम्पर्कविहीन भएको सूचना सार्वजनिक भयो। लगत्तै स्थानीय स्तरमा प्रहरीले खोजी कार्य तीव्र बनायो।
बिहान हराएको हेलिकोप्टर दिउँसोसम्म आइपुग्दा दुर्घटनाग्रस्त भेटियो। भेडा चराउन पुगेका सर्वसाधरणहरुले हेलिकोप्टर दुर्घटना भएको देखेपछि गाउँपालिका र स्थानीय प्रहरीलाई खबर गरेका थिए। उद्धार सुरु हुँदासम्म हेलिकोप्टरका पाइलट र यात्रुहरुले ज्यान गुमाइसकेका थिए।
उक्त दुर्घटनमा परी पाइलट चेतबहादुर गुरुङसहित पाँच जना मेक्सिकन नागरिकले ज्यान गुमाएका छन्। उक्त दुर्घटनामा परी ज्यान गुमाउनेहरुलाई हेलिकोप्टरमा काठमाडौं ल्याएर पोष्टमार्टम गरिने छ।
पहिलो दुर्घटनाबाट बाँचेका थिए पाइलट गुरुङ
गुरुङ अनुभवी पाइलटमध्ये पर्दथे। ५५ वर्षीय गुरुङ विगत १० वर्षदेखि मनाङ एअरमै आबद्ध भएर हेलिकोप्टर उडाउँदै आएका थिए। यसअघि उनले गोरखा एअर, श्री एअरसहितका कम्पनीका हेलिकोप्टर उडाएका कारण अन्य पाइलटभन्दा अनुभवी थिए। तर, सोलुखुम्बुको कुहिरोकाबीचमा उनको अनुभवले काललाई जितेर अघि बढ्न सकेन।
उनी अन्तत: दुर्घटना हुँदै आफ्नो यात्रामा विश्राम लिन बाध्य भए। पाइलट गुरुङ यसअघि पनि दुर्घटनामा भाग्यले बाँचेका थिए। २०७६ वैशाख १ मा सोलुखुम्बुको लुक्ला विमानस्थलमा भएको दुर्घटनामा उनी घाइतेमात्र भएका थिए। लुक्लाबाट रामेछापका लागि उड्नै लागेको समिट एअरको ‘नाइन एन एएमएच’ कलसाइन जहाज धावनमार्गबाट चिप्लिएर ठूलो दुर्घटनामा परेको थियो।
उक्त विमानका कारण रोकिएका मनाङ र श्री एअरलाइन्सका हेलिकोप्टर पनि दुर्घटनामा परेका थिए। उक्त दुर्घटनामा समिट एअरका को–पाइलट सुजित ढुंगाना, प्रहरी सहायक निरीक्षकद्वय यमबहादुर खड्का र रुद्रबहादुर श्रेष्ठको निधन भएको थियो। गुरुङ उक्त दुर्घटनामा परे पनि घाइतेमात्र भए। लामो अस्पताल बसाईपछि उनी पुन: काममा फर्केका थिए। तर मंगलबार उनले सोलुखुम्बु जिल्लामै ज्यान गुमाएका छन्।
उनी पर्यटक लिएर माउन्टेन फ्लाइटका लागि पुगेको विमानस्थलका निमित्त महाप्रबन्धक टेकनाथ सिटौलाले जानकारी दिए। उनीहरु सोमबार लुक्ला पुगेका थिए। सोमबार प्रतिकूल मौसमका कारण उडान सम्भव नभएपछि उनीहरुले त्यहिँ रात बिताएका थिए। मंगलबार बिहानै माउण्टेन फ्लाइट सम्पन्न गरेर उनीहरु काठमाडौं फर्केका थिए। तर गुरुङसहित पाँच मोक्सिकन नागरिकको काठमाडौं फर्कने सपना भने पूरा भएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
