काठमाडौं– प्रधानमन्त्री पुष्पकमल दाहाल ‘प्रचण्ड’ संसद्बाट विश्वासको मत लिएसँगै मन्त्रिपरिषद् विस्तारमा केन्द्रित भएका छन्। उनले अबको एक/दुई दिनभित्रै मन्त्रिपरिषद्लाई पूर्णता दिन आन्तरिक गृहकार्यमा लागेका छन्।
प्रधानमन्त्रीलाई विश्वासको मत दिएका १० दलसहित केही स्वतन्त्र संसदहरुलाई समेत मन्त्रिपरिषद्मा समेट्नुपर्ने भएकाले प्रचण्ड मात्रै होइन स्वयम् सत्ता साझेदारी गरिरहेका दलहरुका लागिसमेत यो विषय सकसपूर्ण देखिन्छ।
यद्यपि, विगतमा एमालेले सम्हालेका १० वटा मन्त्रालयमध्ये सात मन्त्रालय कांग्रेसले लिने लगभग निश्चित भइसकेको छ। प्रतिनिधि सभाको सबैभन्दा ठूलो दल भएकाले कांग्रेसले अझै थप एक मन्त्रालयमा दाबी गरिरहेको छ। यद्यपि, कांग्रेसले पाउने निश्चित रहेका सात मन्त्रालयमा कस–कसलाई पठाउने भन्ने तयारी थालिसकेको छ।
नेपाली कांग्रेसका वरिष्ठ नेता शेखर कोइरालाले अबको एक/दुई दिनभित्रै सरकारमा सहभागी हुनेगरी कांग्रेसले तयारी गरिरहेको जानकारी दिएका छन्। कांग्रेस महामन्त्री गगन थापाले पनि एक/दुई दिनमा केन्द्रदेखि प्रदेशसम्मका सरकारमा कांग्रेस सहभागी हुने बताएका छन्।
मंगलबार नेपाल प्रेस युनियनको केन्द्रीय समितिले काठमाडौंमा आयोजना गरेको एक कार्यक्रममा बोल्दै वरिष्ठ नेता कोईराला र महामन्त्री थापा दुवैले वर्तमान सरकारलाई असफल हुने छुट नरहेको भन्दै कांग्रेसका मन्त्रीहरुले सरकारलाई नै सफल बनाउने गरी काम गर्नुपर्नेमा जोड दिएका छन्।
कांग्रेसका शिर्षस्थ तहका दुई नेताहरुले सरकारमा एक/दुई दिनमै पार्टी सहभागी हुने बताए पनि कांग्रेसले कुन–कुन मन्त्रालय पाएको छ र त्यहाँ क–कसलाई पठाउने भन्नेबारे औपचारिक जानकारी गराएको छैन। गत आइतबार बसेको कांग्रेस कार्यसम्पादन समिति र संसदीय दलको बैठकले प्रधानमन्त्रीलाई विश्वासको मत दिँदै सरकारमा सहभागी हुने निर्णय गरेको थियो।
कांग्रेस सभापति शेरबहादुर देउवा पनि सोमबार प्रधानमन्त्री प्रचण्डलाई विश्वासको मत दिने क्रममा प्रतिनिधि सभामा बोल्दै आफूहरु प्रधानमन्त्रीलाई विश्वासको मत दिँदै सरकारमा सहभागी हुने बताएका थिए।
देउवा निकट स्रोतका अनुसार पार्टीभित्र मन्त्रिपरिषद्मा नेतृत्व गरेर जाने र मन्त्री बन्ने लाम नै लागेपछि उनले आफूलाई सहज हुनेगरी एउटा ‘फरमुला’ सेट गरेका छन्। जसले देउवालाई राहत मिलेको छ। उनले पार्टीका पदाधिकारीहरुलाई प्राथमिकतामा राखेर मन्त्री छनोट गर्ने र बाँकी दुई संख्यामा भने समावेशिता हेरेर मन्त्रीको नाम टुंग्याउन लागेका छन्।
काग्रेसका महामन्त्रीद्वय गगन थापा र विश्वाप्रकाश शर्माले यसअघि नै मन्त्री नबन्ने घोषणा गरिसकेकाले देउवाले उप सभापतिद्वय पूर्णबहादुर खडका, धनराज गुरुङ र सहमहामन्त्रीहरु किशोरसिंश राठौर, बद्री पाण्डे र जीवन परियारलाई मन्त्रिपरिषद्मा पठाउने तयारी गरेका छन्।
अहिलेसम्म कांग्रेसले पाएको सातमध्ये पाँच जना पदाधिकारी नै पर्ने भएपछि देउवा अहिले एक जना महिला र एक जना मधेशी समुदायका नेतालाई मन्त्री बनाएर समावेशी सन्तुलन बनाउने पक्षमा छन्। महिला कोटामा सिता गुरुङ लगभग निश्चित जस्तै रहेको र मधेशी समुदायमाबाट पर्साका अजय चौरसिया, धनुषाका रामकृष्ण यादव र सप्तरीका तेजुलाल चौधरीमध्ये एक जनालाई मन्त्री बनाउने तयारी देउवाको छ।
यसरी मन्त्रिपरिषद्मा सहभागी हुनेहरुको नाम छनोट गर्दा देउवा निकट उप–सभापति पूर्णबहादुर खड्काको नेतृत्व पनि हुने र कोइराला समूहबाटसमेत केही मन्त्री बन्ने भएकाले पार्टीभित्र विरोध नहुने देउवाको योजना देखिन्छ।
यद्यपि, कांग्रेसले दाबी गरिरहेको थप एक मन्त्रालय पाएको खण्डमा भने बागमती प्रदेशबाट मन्त्रीका लागि चर्चामा रहेका आकांक्षीहरु मोहन बस्नेत र प्रदीप पौडेलमध्ये एक जनाले अवसर पाउने सम्भावना देखिन्छ। तर सतारुढ गठबन्धनमा साना दलहरुसमेत धेरै भएकाले कांग्रेसले आठ मन्त्रालय पाउने सम्भावना कमै छ।
कांग्रेसमा यसअघि महामन्त्री थापा पनि अर्थमन्त्रीको जिम्मासहित सरकारमा जाने चर्चा चले पनि थापाले आफ्नो नेतृत्व भएमात्रै जाने नभए नजाने निर्णय पार्टी नेतृत्वलाई जानकारी गराइसकेका छन्। महामन्त्री थापा पार्टीको नेतृत्व गरेर जाने अवस्थामा अझै तयार रहेको उनीनिकट नेताहरुको भनाइ छ।
तर, पार्टी उप–सभापति खडका सरकारमा जाने भएपछि अरु नेताहरुलाई त्यसले अप्ठ्यारो पारेको छ। हुन त पार्टीबाट सरकारको नेतृत्वमा पदाधिकारी बाहिरका शेखर कोइरालादेखि प्रकाशमान सिंह र बिमलेन्द्र निधिको नामसमेत चर्चामा थियो। तर, सभापति देउवासँग नजिक रहेर काम गरिरहेका उपसभापति खड्का जाने भएपछि चर्चामा आएका नामहरु ओझेलमा परेका छन्।
यतिसम्म कि देउवा समूहबाटै मन्त्रिपरिषद्मा जान इच्छा देखाएका रमेश लेखक, एनीपी साउददेखि प्रवक्ता प्रकाशशरण महतसमेत मन्त्री बन्ने सम्भावना अब न्यून हुँदै गएको छ। कांग्रेस सरकारमा जाने भएसँगै मन्त्री बन्नेहरुको सूचीमा सभापति देउवा पत्नी आरजु राणा देउवाको नामसमेत चर्चामा थियो। तर आइतबार संसद् भवनमा पत्रकारहरुसँग कुरा गर्दै आरजु स्वयम्ले अहिले आफू तत्कालै मन्त्री बन्ने लाइनमा नरहेको बताएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
