काठमाडौं– राष्ट्रपति निर्वाचनका कारण पुन: फेरिएको सत्ता समीकरणसँगै केन्द्रदेखि प्रदेशहरुसम्म सत्तामा कांग्रेसको ‘कमब्याक’ हुने भएको छ। यससँगै कांग्रेसभित्र मन्त्रिपरिषद्मा जान चाहनेहरुको दौडधूप पनि बाक्लिएको छ।
पार्टी नेतृत्व भने हिसाबिकताबमा जुटेको छ। २५ फागुनमा भएको राष्ट्रपति निर्वाचनमा कांग्रेस नेता रामचन्द्र पौडेल निर्वाचित भइसकेका छन्। उता १० पुसमा माओवादीसँग मिलेर सत्तामा फर्किएको एमाले पनि अहिले सत्ताबाट टाढिइसकेको छ।
गठबन्धनभित्र सहमति नहुँदा १० पुसमा एकाएक एमाले र माओवादी मिलेका थिए। जस अनुसार माओवादी केन्द्रका अध्यक्ष पुष्पकमल दाहाल प्रचण्डलाई एमालेले प्रधानमन्त्री बनायो। तर प्रधानमन्त्री भएलगत्तै प्रचण्ड एमालेसँग लामो सहयात्रा असुरक्षित रहेको भन्दै कांग्रेससँग गुहार माग्न गएका थिए।
जुन राष्ट्रपति निर्वाचनमा आएर मूर्त रुप लिएको छ। त्योसँगै एमाले सत्ताबाट बाहिरियो। यद्यपि, प्रदेशहरुमा भने एमाले सत्तामै छ। उसले पाएका मुख्यमन्त्रीहरु नेतृत्व गरिरहेका छन्। यस्तोमा कांग्रेसले भने केन्द्रबाट सत्तामा प्रवेश गर्ने तयारी गरिरहेको छ।
तत्कालीन अवस्थामा एमाले सत्तामा हुँदा १० वटा मन्त्रालय पाएको थियो। स्रोतका अनुसार अहिले कांग्रेसले एमालेले पाएका ती १० वटै मन्त्रालयमा दाबी गरिरहेको छ।
यसका साथै राप्रपा र राष्ट्रिय स्वतन्त्र पार्टीले पाएका तीन/तीनवटा मन्त्रालय पनि खाली छन्। नेपाली कांग्रेस स्रोतका अनुसार मन्त्रालय बाँडफाँटमा विगतभन्दा पनि नयाँ शिराबाट अघि बढ्ने तयारी छ। जुन उपराष्ट्रपति निर्वाचनलगत्तै सुरु हुनेछ।
कांग्रेस प्रवक्ता प्रकाशशरण महतले मन्त्रिपरिषद् विस्तार र मन्त्रालय बाँडफाँटबारे अहिलेसम्म सत्तारुढ दलहरुका बीचमा औपचारिक रुपमा छलफल भएको छैन। ‘प्रधानमन्त्रीजीले नै उपराष्ट्रपति निर्वाचनपछि गर्ने भनेकाले त्यसबारेमा अहिलेसम्म छलफल सुरु भएको छैन’, महतले भने, ‘चैत्र ३ गतेपछि नै हामी यो विषयमा प्रवेश गर्नेछौं।’
तर कांग्रेस सभापति शेरबहादुर देउवा भने मन्त्रीहरुको नाम छनोटमा लागिसकेको कांग्रेसकै केही नेताहरु बताउँछन्। देउवाले सात वटै प्रदेशको प्रतिनिधित्व हुनेगरी मन्त्रीहरुको नाम छनोटको गृहकार्य गरिरहेको स्रोत बताउँछ।
अब हुने मन्त्रिपरिषद् विस्तारमा कांग्रेस कसको नेतृत्वमा प्रवेश गर्छ भन्ने अहिले आम चासोको विषय बनेको छ। यस पटक पार्टीभित्र सरकारमा सहभागितालाई लिएर विवाद नहोस् भन्ने तरिकाले कांग्रेस सभापति देउवाले शेखर कोइराला वा प्रकाशमान सिंहमध्ये एक जनाको नेतृत्वमा सरकारमा आफ्ना मन्त्रीहरु पठाउने तयारीमा छन्।
मन्त्रालयकै टुंगो लागिनसकेकाले भने अहिले नै कुन मन्त्रालयमा कसलाई पठाउने भन्नेबारेमा भने देउवाले निर्णय गरिसकेका छैनन्। कोइराला वा सिंहमध्ये एक जनालाई उपप्रधानमन्त्रीसहित सरकारमा पठाउँदा पार्टीभित्र आफूमाथि औंला नउठ्ने देउवाको आकलन छ।
अहिलेसम्मको संवाद र छलफलमा सहभागी कांग्रेसका एक नेताका अनुसार करिब आठ वटा मन्त्रालय कांग्रेसले पाउने निश्चित जस्तै छ। कांग्रेसले पाएका मन्त्रालयमा देउवाले सात वटै प्रदेश र महिला समेतको सहभागितालाई ख्याल गरेर नाम तय गर्ने तयारी गरिरहेका छन्।
यसैबीच सभापति देउवाले पत्नी आरजु राणा देउवालाई परराष्ट्रमन्त्री बनाउने तयारी भइरहेको चर्चा पनि छ। तर यो विषयमा हालसम्म पुष्टि भने भइसकेको छैन। कांग्रेसभित्र मन्त्री बन्ने लाइनमा अहिलेसम्म शेखर कोइराला, प्रकाशमान सिंह, आरजु राणासहित धनराज गुरुङ, बद्री पाण्डे, प्रदीप पौडेल, मोहन बस्नेत, उदय शमशेर राणा लगायतका सांसदहरु रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768271809.png)
-1764146706.png)
