बजारभरी म्याद गुज्रेका वस्तु छ्याप–छ्याप्ती: ग्राहक झुक्याउन कतै रिलेवलिङ त कतै बजार मूल्यभन्दा तेब्बर बढीमा बिक्री

समाचार

कल्पना घिमिरे आइतबार, फागुन ७, २०७९ १८:५३

काठमाडौं– अहिले बजारमा म्याद गुज्रेका वस्तु बिक्री गर्नेदेखि मनलाग्दी मूल्य असुल्नेहरुको बिगबिगी छ। पछिल्लो केही दिनयता भइरहेको अनुगमनका क्रममा बजारभरी म्याद गुज्रेका खाद्यवस्तु छ्यापछाप्ती फेला परेका छन्।

साथै बजार मूल्यभन्दा तेब्बरसम्म रकम असुल्ने गरेको पनि पाइएको छ। यस्ता कार्य गर्ने व्यवासायीहरुलाई कारबाहीको दायरामा ल्याउने काम भइरहेको वाणिज्य, आपूर्ति तथा उपभोक्ता संरक्षण विभागका प्रवक्ता होमनाथ भट्टराई बताउँछन्।

‘अहिले विवाहको सिजन भएकाले हामीले अनुगमनलाई नियमितभन्दा कडाइ गरेका छौं। अनुगमनमा धेरैभन्दा धेरै म्याद गुज्रेका रक्सी तथा बियर भेट्टायौं। अन्य पसलहरुमा पनि म्याद गुज्रेर रिलेबलिङ गरेका वस्तु बिक्री गर्ने तथा उपभोक्तासँग बढी रकम असुल्ने गरेको पाइएको छ। त्यसरी म्याद गुज्रेका वस्तु बिक्री गरेर कालो बजारी गरेको फेला पारे विभागले कारबाही गर्छ’, उनले भने।

फागुन २ गतेदेखि ५ गतेसम्म विभागले ५१ ओटा पसलहरुमा अनुगमन गरेको थियो। जसमध्ये म्याद गुज्रेका वस्तु बिक्री गर्ने, रिलेबलिङ गर्ने तथा कालो बजारी गर्ने र बिलविजक नराख्ने १७ ओटा पसलहरुमाथि कारबाही गरिएको छ। ३४ वटा पसललाई भने सचेत गराइएको छ।

म्याद गुज्रेका मदिरा छ्यापछ्याप्ती
यतिबेला मदिरा व्यवसायीहरुले लाखौं मूल्य बराबरका मदिराहरु म्याद गु्ज्रिए पनि बिक्रीका लागि भण्डारण गरेको पाइएको छ। विभागले गरेको अनुगमनका क्रममा यस्ता म्याद गुज्रिएका बियरहरु भेटिएका छन्।

फागु्न २ गते गरिएको अनुगमनमा विभागले धुम्बाराहीस्थित याक ब्रुअरी कम्पनीको डिलर क्लाईमेक्स ट्रेडिङ् प्रालिबाट उक्त कम्पनीका तीनवटा गोदाममा बाह्रसिङ्गे ब्राण्डका बियर म्याद गुज्रेको अवस्थामा फेला पार्‍यो। उक्त ब्राण्डका दुई आकारका (६५० मिलि र ३३० मिलि) बोत्तलमा रहेका २१ सय कार्टुन करिब ६० लाख रुपैयाँ बराबरको बियर फेला पार्‍यो। कारबाहीका लागि विभागले सोही दिन उक्त गोवदामहरु सिल गरेको छ।

यस्तै फागुन ३ गते विभागले सिनामंगलस्थपत संस्कार ट्रेडर्स प्रालिको गैह्रीगाउँको गोदाममा पनि म्याद गुज्रेका बियहरु फेला पार्‍यो। जसमा टुबोर्ग, सानमिगल, गोर्खाफिमियम र काल्सबर्ग, नेपाल आइस, बडवाइजर र गोर्खा ब्राण्डका बियर करिब ३५५ कार्टुन भेटिए। उक्त बियरको परिमाणत्मक मूल्य करिब १३ लाख ९० हजार रुपैयाँ पर्ने देखिएको छ। कार्टुन विभागले सिलबन्दी गरी कारबाहीको प्रक्रिया अगाडि बढाएको छ।

सोही दिन सिनामंगलकै अर्को सिके टे«डिङ प्रालिको गोदाममा भण्डारण गरिरहेको अवस्थामा ३०२ कार्टुन टुबोर्ग, सानमिगेल, गोर्खा प्रिमियम र काल्सबर्ग ब्राण्डका बियर म्याद गुज्रेको अवस्थामा फेला पारेको थियो। उक्त परिमाणको बियरको बजार मूल्य करिब ८ लाख ७५ हजार रुपैयाँ पर्ने देखिएको छ। उक्त सिलबन्दी गरिएका २ ओटा गोदामबाट म्याद गुज्रेका बियरको मूल्य करिब २२ लाख ६५ हजार पर्ने देखिएको छ।

म्याद नाघेका वस्तु रिलेवलिङ गरी दोब्बर/तेब्बर मूल्यमा बिक्री

बजारमा व्यापारीहरुले म्याद गुज्रेको वस्तुलाई म्याद थप गरी बिक्री गर्ने गरेकोसमेत पाइएको छ। त्यस्तै व्यापारीहरुले खुद्रा मूल्यमा दोब्बर/तेब्बर बढी मूल्य राखेर बिक्री गर्ने गर्दा कालो बजारी बढेको छ।

फागन २ गते विभागको नियमित अनुगमन टोलिले पुल्चोकको एक रेस्टुरेन्टमा अनुगमन गरेको थियो। उक्त रेस्टुरेन्टमा म्याद गुज्रेका वस्तुलाई रिलेवलिङ (वस्तुको मूल्य नापतौल वा गुणस्तर हेरफेर) गरेको फेला पारेपछि रिलेवलिङ गरेको कसुरमा २ लाख रुपैयाँ जरिवाना गरेको छ।

विभागको नियमित अनुगमनका क्रममा फागुन ४ गते त्रिभुवन अन्तर्राष्ट्रिय विमानस्थलको आन्तरिक र बाह्य टर्मिनलभित्र रहेका पसलहरुमा पनि बजार मूल्यभन्दा दोब्बर/तेब्बर बढी मूल्यमा बिक्री गरिरहेको पाइयो। जसमा ९ वटा पसलहरुलाई १५ लाख रुपैयाँ जरिवाना गरिएको छ।

विभागका अनुसार खुद्रा मूल्य भन्दा चर्को मूल्य असुल गर्नेमा अन्तर्राष्ट्रिय टर्मिनलतर्फ कफि एण्ड कन्फेक्सनरी सप, कार्की मल्टिपल ट्रेड एण्ड सप्लायर्स, एबीपी मार्ट प्रालि, ओमनवदुर्गा इन्टर प्राइजेज प्रालि र आन्तरिक टर्मिनलतर्फ न्यू कन्फेक्सनरी स्टोर, एयरपोर्ट टी एण्ड कफी कन्फेक्सनरी सप, होटल स्वनिङ(कफी एड कन्फेक्सनरी) पिडी इन्टरप्राइजेज प्रालि तथा होटल स्वानिङ रहेका छन्।

मूल्य सूची र खरिद बिलविजक नै राख्दैनन् व्यापारी
दैनिक अनुगमनकै क्रममा विभागको टोलीले फागुन ३ गते चुच्चेपाटीको एक पसलमा खरिद बिलविजक नै नराखेको फेला पार्‍यो। उक्त पसललाई बिलविजक नराखेको कसुरमा ५ हजार रुपैयाँ जरिवाना गरेको छ। सोहीदिन अनुगमनकै क्रममा विभागको टोलीले बौद्धको एक तरकारी तथा फलफूल पसलमा अनुगमन गर्दा उक्त पसलले अनुगमन टोलीलाई अनुगमनमा सहयोग नगरेको भन्दै १० हजार रुपैयाँ जरिवाना गरेको छ।

फागुन ५ गते विभागको टोलीले ठिमीको संगम कोलोनीमा रहेको एक रेस्टुरेन्टमा मूल्य सूची र दर्ता प्रमाण पत्र नराखी सञ्चालन गरेको पायो। उक्त रेस्टुरेन्टलाई मूल्य सूची दर्ता प्रमाण पत्र नराखेको कसुरमा ५० हजार रुपैयाँ जरिवाना गरेको छ।

सोही दिन विभागको टोलीले कालिकास्थानमा रहेको एक पसलमा खरिद बिलविजक नराखी व्यवसाय गर्दै आएको फेला पारेपछि १० हजार रुपैयाँ जरिवान गरेको छ।

यि त अनुगमन गरिएका पसलहरु भए। तर अनुगमनबाट ओझेलमा परेका पसलहरुले कसरी उपभोक्ता ठगिरहेका छन् भन्ने पत्तो छैन। विभागले यसरी ठगी गरेको पाइएमा ११३७ नम्बरमा फोन गरेर गुनासो टिपाउन अनुरोध गरेको छ। विभागका अनुसार हरेक दुई पसलको अन्तरमा यस्ता गल्तीहरु भेटिन सक्छन्। अधिकांश पसलहरुले उपभोक्तालाई या त रिलेवलिङ गरेर बिक्री गरिरहेका हुन्छन् या बजार मूल्यभन्दा चर्को मूल्यमा बिक्री गरिरहेका हुन्छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।