प्रतिकात्मक तस्बिर : केजीएनएस.टिभी
काठमाडौं- कीर्ते सर्टिफिकेट बनाएर एमबीबीएस अध्ययन गरेर डाक्टर बनेको पाइएको भन्दै एक जना डाक्टरविरुद्ध मुद्दा दर्ता भएको छ।
मुद्दा दर्ता हुनेमा सर्लाहीको ईश्वरपुर नगरपालिका-१४ का २७ वर्षीय डाक्टर अजय साह छन्। एमबीबीएस अध्ययन गर्नका लागि चाहिने एसएलसीको लब्धांक नम्बर कीर्ते गरेको पाइएपछि साहविरुद्ध काठमाडौं जिल्ला अदालतमा मुद्दा दर्ता गरिएको हो।
नेपाल मेडिकल काउन्सिलका इलिजिबिटी कमिटीका अध्यक्ष डा अनिलकुमार झाको पालामा साहले एसएलसीको मार्कसिट कीर्ते गरेर बंगलादेशमा एमबीबीएस अध्ययन गरेको पाइएपछि उनीविरुद्ध मुद्दा चलाइएको हो।
एमबीबीएस अध्ययनका लागि चाहिने न्युनतम योग्यता नपुगेका साहले एसएलसीको नम्बर कीर्ते गरेको पाइएको छ। मार्कसिटको नम्बर कीर्ते गरी नेपाल मेडिकल काउन्सिलबाट समेत स्वीकृत लिएर उनले बंगलादेशमा एमबीबीएस अध्ययन गरेका थिए।
अजय साहले एसएलसीको सर्टिफिकेट कीर्ते गरेको पाइएपछि उक्त सर्टिफिकेट भेरिफाइ गर्न भन्दै प्रहरीको केन्द्रीय अनुसन्धान ब्यूरो (सीआईबी), राष्ट्रिय परीक्षा बोर्ड, परीक्षा नियन्त्रण कार्यालयमा पठाइएको थियो।
तर, साहको सर्टिफिकेट भेरिफाइ हुन सकेको थिएन। उनले २०६७ सालमा एसएलसी पास गरेका थिए। उनको सिम्बोल नम्बर ०२२४६३५ यू हो। तर, राष्ट्रिय परीक्षा बोर्डबाट भेरिफाइ हुन सकेन। साहले एमबीबीएसअध्ययन गर्नका लागि पेस गरेको उक्त सिम्बोल नम्बरको सर्टिफिकेट र परीक्षा बोर्डमा रेकर्ड भएको सर्टिफिकेटको नम्बर मेल खाएको थिएन।
साहले २०६७ सालमा जनता माध्यामिक विद्यालय नेत्रगन्ज हाल लालबन्दी-७ बाट दोस्रो श्रेणीमा एसएलसी उत्तीर्ण गरेका थिए। तर, उनले एमबीबीएस अध्ययनका लागि मार्कसिटको नम्बर अपुग हुने भन्दै ६७ दशमलव ७५ प्रतिशत अर्थात् प्रथम श्रेणी बनाएर कीर्ते गरेको सीआईबीको अनुसन्धानबाट खुलेको छ।
साहले कीर्ते गरेको अनुसन्धानबाट खुलेपछि मुलुकी फौजदारी अपराध संहिता २०७४ को दफा २७६ अन्तर्गतको कसुरमा उनीविरुद्ध मुद्दा दायर गरिएको छ। सार्वजनिक लिखत अन्तर्गतको कसुरमा उनीवरुद्ध ७ वर्षसम्म कैद र ७० हजार रुपैयाँसम्म जरिवानाको माग दाबी गरिएको छ।
साहविरुद्ध सीआईबीले दुई वर्षअघि नै छानबिन गरे पनि पक्राउ भने परेका छैनन्। अहिलेसम्म पनि पक्राउ नपरेकाले उनलाई फरार प्रतिवादी बनाएर मुद्दा दायर गरिएको हो। कीर्तेको कसुरको मुद्दा दर्ताको हदम्याद सकिन लागेपछि फरार प्रतिवादी बनाउँदै मुद्दा दर्ता गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
