काठमाडौं- नेपाली कांग्रेस संसदीय दलका लागि प्रधानमन्त्री समेत रहेका सभापति शेरबहादुर देउवा र महामन्त्री गगन थापाले उम्मेदवारी दर्ता गराएका छन्। छैटौंपटक प्रधानमन्त्री बन्ने लक्ष्यसहित देउवाले संसदीय दलको नेतामा दाबी गरेका छन्। थापाले ‘रुपान्तरण र पुस्तान्तरण’का लागि उम्मेदवार बनेको बताएका छन्।
उम्मेदवारी दर्ता गराउन सिंहदरबारस्थित कांग्रेस संसदीय दलको कार्यालयमा पहिल्यै पुगेका थिए देउवा। अर्का प्रत्यासी महामन्त्री थापा आइपुग्नुअघि संसदीय दलको कार्यालयमा रहेको कार्यकक्षमा ‘डकुमेन्ट’ मिलाउन सक्रिय रहे। बसेरा होटेलबाट केही ढिलोगरी पुगेका थापा भने सिधै उम्मेदवारी दर्ता गर्ने ठाउँतिर सोझिएपछि देउवा पनि सँगसँगै त्यहीँ आइपुगे।
देउवा र थापाले एकसाथ उम्मेदवारी दर्ताको प्रक्रिया पूरा गरे। नयाँ सरकार बनाउने बाटोमा हिँडिरहेका देउवाले आफ्नो पुरानै स्वभावलाई निरन्तरता दिए। काम सकिएपछि फटाफट निस्किन खोजे। फोटो पत्रकारले आग्रह गरे, ‘दुवैजना एकसाथ हात हल्लाइदिनुहोस्।’ देउवाले सुने तर वास्ता गरेनन्। बरु हतारिँदै बाहिर निस्किए।
निस्किनै थाल्दा पत्रकारहरूले ठूलो स्वरमा प्रश्न गरे, ‘संसदीय दलमा तपाईंको फेरि उम्मेदवारी किन?’ देउवाले प्रश्नको ‘रेस्पोन्स’ त परै जाओस्, प्रश्नकर्तातिर हेर्न समेत उचित ठानेनन्। उनी र उनको ‘समूह’ बाहिर निस्कियो।
सामान्यतया पार्टी सभापतिसमेत रहेका प्रधानमन्त्री भित्रिदा र निस्किँदा दलबल हुन्थ्यो। तर, मंगलबारको दृष्य फरक देखियो। देउवासँग ‘समूह‘ मात्रै थियो। दलबल भने महामन्त्री थापाको थियो। उम्मेदवारी दर्ता गराएर फर्किदै गर्दा थोरै भएपनि नारा थापाकै पक्षमा लाग्यो। हुटिङ खाने पनि थापा नै देखिए। तर, उक्त पक्षले नारा लगाउन रोक्यो।
उम्मेदवारी दर्ता गराउँदै गर्दा देउवासँग रामचन्द्र पौडेल मात्रै उभिए। समर्थक पूर्णबहादुर खड्का थापा पक्षका नेताहरूको हुलमा कहीँ छेउतिर परे। बरु देउवाको दायाँ-बायाँ र पछाडि जम्मै थापाको पक्षका नेताहरू उभिएका थिए। देउवाको बायाँ गगन थापाका एक समर्थक विश्वप्रकाश थिए। दायाँतिर थापाका साथमा नेता शेखर कोइराला, उपसभापति धनराज गुरुङ, सहमहामन्त्रीद्वय बद्री पाण्डे र जीवन परियार, नेताहरू प्रदीप पौडेल, चन्द्र भण्डारीलगायत थिए।
कांग्रेसका भविष्य परिवर्तनका पक्षमा
देउवा कांग्रेसको पहिलो पुस्तासँगै राजनीति गरेका नेता हुन्। बहुदलपछि निरन्तर शक्तिको केन्द्रमा रहेका उनीसँग तेस्रो पुस्ताका नेता गगन थापा प्रतिष्पर्धामा उत्रिएका छन्। यो सवाल पुस्तान्तरणको मात्रै देखिएको छैन, गठबन्धनको टेको नभइ उभिनै नसक्ने अवस्थामा पुगेको कांग्रेसलाई तंग्र्याउन चाहने र यथास्थितिमै रमाउनेबीचको प्रतिस्पर्धा जस्तो देखिएको छ।
उम्मेदवारी मनोनयपछि गगन थापा।
उम्मेदवारी दर्तापछि थापाले प्रष्ट रुपमा त्यो सन्देश प्रवाह गरेका छन्। उनले देउवालाई उम्मेदवारी फिर्ता लिन आग्रह गरेका छन्। उनले भने, ‘असिम श्रद्धाका साथ मेरो उहाँलाई आग्रह छ यो बेलामा शान्त मनले, शान्त चित्तले मनन् गरेर उम्मेदवारी फिर्ता लिने कुरा नेपाली कांग्रेसको जीवनमा ऐतिहासिक निर्णय हुनेछ। यसले कांग्रेसभित्र उत्साहको सन्देश सञ्चार गर्छ। उहाँलाई मनन् गर्न आग्रह गर्छु।’
देउवाका पक्षमा उभिएका ‘यथास्थिति’का पक्षधरहरू रामचन्द्र पौडेल, विमलेन्द्र निधि र कृष्णप्रसाद सिटौलाका परिवर्तन आकांक्षी नेताहरू गगनका पक्षमा उभिएका छन्। मौन बसिरहेका प्रकाशमान सिंहको खेमाको समेत समर्थन लिएर महामन्त्री जितेका विश्वप्रकाश शर्माले सुरुदेखि नै गगनका पक्षमा चट्टानी अडान लिए।
देउवाका प्रस्तावक रहेका रामचन्द्र पौडेलनिकट मानिएका प्राय: सबै नेताहरू थापाका पक्षमा खुलेका छन्। देउवालाई सघाइरहेका विमलेन्द्र निधिसँग निकट रहेका रामकृष्ण यादव, तेजुलाल चौधरी, मुक्ता यादवलगायतका सांसदहरू गगनकै पक्षमा खुलेका छन्। यस्तै, नेता शशांक कोइरालानिकट मानिसका सांसद दीपक गिरी पनि गगनको पक्षमा खुलेका छन्।
अनुहारकै हिसाबले हेर्दा पदाधिकारीहरूमा प्रभावशाली देखिएका र पदाधिकारीका लागि प्रतिस्पर्धा गरेकाहरू धेरै गगन पक्षमा उभिएका छन्। महामन्त्रीका दुई विजेता मात्रै होइन, दुई पराजित उम्मेदवार समेत थापाका पक्षमा लागेका छन्।
थापाले पौडेल र सिंहलाई कांग्रेसमा परिर्वतनको सन्देशलाई मनन् गर्न गर्दै परिवर्तनको पक्षमा उभिन आग्रह गरेका छन्। सिंहले २०७४ मा परिवर्तनका लागि भनेर उम्मेदवारी दिइरहँदा आफू त्यसका पक्षमा दृढतापूर्वक उभिएको स्मरण गराएका छन्।
नेपाली कांग्रेसको भविष्यका भनिएका प्राय: सबै नेताहरू यसपल्ट थापाका साथमा उभिएका छन्। यसले माहोलमा बदलाव आउने शेखर-गगन पक्षको विश्वास छ।
‘आज साँझ सांसद साथीहरूले शान्त चित्तले आफ्नो मनलाई सोध्नु हुन्छ। जनमतलाई एकपटक सम्झिनुहुन्छ र भोलि बिहान आउँदै गर्दा सबै आग्रहबाट मुक्त भएर, सबै बन्धनबाट मुक्त कांग्रेसको भविष्यको निम्ति मत हाल्नु हुन्छ भन्ने विश्वास गर्छु। अनुरोध गर्न चाहान्छु’, थापाले भने।
चुनावअघि टिकट पाउन र समानुपातिकमा पर्न देउवासँग पक्षधरता देखाएका केही सांसदहरू परिवर्तनका पक्षमा उभिने विश्वास गगन पक्षका नेताहरूको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
