काठमाडौं– नेदरल्याण्ड्सलाई क्वाटर फाइनलमा पराजित गर्दै सेमिफाइनलको यात्रा तय गरेपछि अर्जेन्टिनाका कप्तान लिओनल मेसीले डच प्रशिक्षक लुई फ खालको विषयमा कडा टिप्पणी गरेका छन्।
पीएसजीका सुपरस्टारले नेदरल्याण्ड्सलाई पेनाल्टी सुटआउटमा ४–३ गोलले पराजित गरेपछि फ खाल नजिकै पुगेर भने, ‘तिमी आवश्यकताभन्दा बढी बोल्छौं।’
शुक्रबार राती भएको क्वाटर फाइनल खेलको निर्धारित समय २–२ गोलमा परिणत भएपछि पेनाल्टी सुटआउटबाट नतिजा निस्किएको थियो। मेसीले २ गोल गरे। दुवै गोल पेनाल्टीबाट सम्भव भएको थियो। एउटा गोलका लागि उनले मोलिनालाई पास मिलाइदिएका थिए।
निकै तनावपूर्ण खेलमा मेसीलाई प्रभावित गर्न डच खेलाडीले मैदान बाहिर विभिन्न प्रतिक्रिया दिएर मात्र होइन, मैदानभित्र पनि टिकाटिप्पणी गर्दै उकास्न खोजेका थिए।
म्यानचेस्टर युनाइटेडका पूर्व प्रशिक्षक फ खालले पनि मेसीको विषयमा टिप्पणी गरेका थिए। खेल सकिएपछि मेसी फ खाल भएको ठाउँमा पुगेका थिए। यतिबेला डच टोलीका अन्य प्राविधिकहरू पनि फ खाल नजिकै थिए।
मेसीले प्रतिक्रिया दिँदा नेदरल्याण्ड्सका पूर्वस्टार इडगार डेभिस पनि फ खाल नजिकै थिए। मेसीले फ खालमाथि अर्जेन्टिनी टोली र खेलाडीलाई सम्मान नगर्ने प्रशिक्षकको आरोप लगाए।
दोस्रो हाफको ७३ मिनेटमा पेनाल्टीबाट गोल गरेपछि उनी नेदरल्याण्ड्सको डिबक्स क्षेत्र नजिकै पुगेर उनीहरूको दर्शक सामू कानमा हात राखेर आफ्नो नाम सुन्न चाहिरहेका थिए।
शुक्रबारको खेलमा दुई वटा पेनाल्टी रोकेर नायक बनेका अर्जेन्टिनी गोलकिपर इमिलियानो मार्टिनेजले पनि खेललाई प्रभावित पार्न फा खालले खेल पेनाल्टी सुटआउटतर्फ लम्किएको खण्डमा आफूहरू माथि पर्ने तर्क राखेको बताए।
तर, पेनाल्टी सुटआउटमा अर्जेन्टिना विजयी भएपछि मार्टिनेजले फ खालको मुख बन्द गराएको प्रतिक्रिया दिए। ‘मलाई लाग्छ उनको मुख बन्द भयो होला।’
शुक्रबार रेफ्रीको भूमिकामा रहेका स्पेनिस रेफ्रीको निर्णय खराब रहेको मार्टिनेज र मेसी दुवैले बताएका छन्।
मेसीले भने, ‘म रेफ्रीको विषयमा धेरै कुरा बोल्न चाहदिन् किनभने उनीहरूले इमान्दार भएबापत प्रतिबन्ध लगाउन सक्छन्।’
दर्शकहरूले सबै कुरा देखेको बताउँदै मेसीले फिफाले ठूलो प्रतिस्पर्धामा यस्ता खाले रेफ्रीलाई खेल खेलाउन दिन नहुने विचार व्यक्त गरे।
शुक्रबारको खेलमा स्पेनिस रेफ्री आन्टोनियो लाहोजले १८ वटा पहेँलो कार्ड देखाएका थिए, जुन विश्वकपको कीर्तिमान हो। उनले पेनाल्टी हानेर फर्किएपछि खराब आचरण देखाएको भन्दै डेन्जल डम्फ्रिजलाई दोहोरो पहेँलो कार्डस्वरुप रातो कार्ड प्रदान गरे।
मेसीले दोस्रो हाफमा रेफ्रीले अनावश्यक १० मिनेटभन्दा बढी खेल खेलाएको भन्दै आपत्ति जनाए। उनलाई पनि पहेँलाे कार्ड प्रदान गरिएकाे थियाे।
अझ, मार्टिनेजले रेफ्रीलाई ‘काम नलाग्ने’ संज्ञा दिए। ‘खेलमा थुप्रै झोल थियो,’ मार्टिनेजले भने, ‘मेरो विचारमा हामीले खेलमा नियन्त्रणमा राखेका थियौं। हामी २–० ले पनि अगाडि थियौं। तर, रेफ्रीले उनीहरूको पक्षमा काम गरे। उनीहरूलाई सबै उपलब्ध गराए।’
उनले पनि निर्धारित ९० मिनेटपछि १० मिनेटको समय थप गर्नु नै विवादास्पद भएको बताए। ‘उनले २–३ वटा फ्रिकिक हाम्रो डिबक्स नजिकै दिए’, मार्टिनेजले बताए, ‘उनी हामीविरूद्ध उनीहरूले गोल हानोस् भन्ने चाहन्थे। हामीलाई यस्तो रेफ्री अव प्राप्त हुने छैन, आशा गरौं।’
अर्जेन्टिनाले खेल जितेपछि पत्रकारसँग कुरा गरिरहेको बेला मेसीको अगाडि एक जना नेदरल्याण्ड्स टिमका अपरिचित सदस्य अगाडि उभिन पुगेका थिए। मेसीले ती सदस्यलाई किन अगाडि उभिएको भन्दै, त्यहाँबाट हट्न भनेका थिए। त्यतिबेला उनले ती व्यक्तिलाई मुर्खको संज्ञा दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
