दोहा– अर्जेन्टिनी मिडफिल्डर एञ्जल डि मारियालाई आफ्नो पुरानो प्रशिक्षक लुई फ खालविरूद्ध बदला लिने मौका जुरेको छ।
म्यानचेस्टर युनाइटेडको प्रशिक्षक हुँदा लुई र डि मारियाबीचको सम्बन्ध बिग्रिएको थियो। त्यतिबेला आफूलाई खराब खेलाडीको रूपमा चित्रण गर्न खोजेको भन्दै डि मारियाले असन्तुष्टी व्यक्त गरेका थिए।
म्यानचेस्टमा हुँदा लुईसँग उनको बहस पनि भएको थियो। डि मारियालाई ६ करोड स्टर्लिङ पाउण्ड तिरेर सन् २०१४ मा म्यानचेस्टर युनाइटेडले रियल म्याड्रिडबाट भित्र्याएको थियो।
उनले ओल्ड ट्राफोड भित्रिएको सुरुको दुई महिना उत्कृष्ट प्रदर्शन गरेका थिए। डि मारियाले लिगको अघिल्लो ६ खेलमा ३ गोल गर्नुका साथै गोलका लागि ४ अवसर सिर्जना गरेका थिए।
डि मारियाले सन् २०१९ मा अर्जेन्टिनी टेलिभिजनलाई दिएको अन्तर्वार्तामा भनेका थिए, ‘म्यानचेस्टरमा मेरो समस्या प्रशिक्षकसँग मात्र थियो। मेरो करिअरमा सबैभन्दा झुर प्रशिक्षक भनेकै फा खाल हुन्।’
उनले अन्तर्वार्तामा भनेका थिए, ‘मैले गोल गरे, मौका पनि मिलाए तर भोलि पल्ट उनले मैले बिगारेको पासहरूको गिन्ती देखाउन थाले। उनले अर्को दिन नै मलाई निकाले। खेलाडीले चर्चा कमाएको उनलाई पटक्कै मन पर्दैन। उनी सधै आफू माथि हुन चाहन्छन्।’
लुईसँगको तिक्त सम्बन्धकै कारण उनी म्यानचेस्टर छोडेर पेरिस सेन्ट जर्मेन पुगेका थिए। उनले सन् २०१९ मा दिएको अर्को अन्तर्वार्तामा फ खालसँग भएको प्रतिवादले रेड डेभिलमा आफ्नो करिअर अगाडि नबढेको बताएका थिए।
‘म म्यानचेस्टरमा आवद्ध हुँदा सुरुको दुई महिना फ खालसँगको सम्बन्ध राम्रो थियो,’ उनले अर्जेन्टिनी टेलिभिजन कार्यक्रम इएसपिएनको रेड्समा बताए, ‘एउटा झगडापछि सम्बन्ध पहिले जस्तो रहेन।’
प्रशिक्षकसँग झगडा पर्नुको कारण फ खालले सधै आफ्नो नराम्रो पक्ष र नकरात्मक कुरा मात्र देखाउने र त्यही आधारमा लखेट्ने गरेको उनले बताए।
‘अति भएपछि एक दिन मैले उनीसँग विवाद गरे। मैले ती नराम्रा कुराहरू पुनः सुन्न नचाहेको उनलाई बताए। मलाई राम्रो गर्नु थियो, त्यसैले मैले राम्रो कुरा किन देखाउनु हुन्न भनेर प्रश्न गरे,’ उनले अन्तर्वार्तामा भनेका थिए, ‘तर उनलाई मैले गरेको प्रतिवाद मन परेन। यही दिनदेखि समस्या सुरु भयो।’
फ खालले केही समयपछि बीबीसीलाई दिएको अन्तर्वार्तामा भनेका थिए, ‘डि मारियाले मेरो समस्या भनेका रहेछन्।
मैले उसलाई हरेक आक्रामक स्थानबाट खेलाए। तपाईहरू अनुसन्धान गर्न सक्नु हुन्छ। तर उसले मलाई कुनै पनि पोजिसनमा विश्वस्त पार्न सकेन। उसले प्रिमियर लिगमा बलको निरन्तर दबाबको सामना गर्न सकेन। समस्या त्यहा थियो।’
म्यानचेस्टर छोडेर गएपछि डि मारियाले पीएसजीमा आवद्ध हुँदा २९५ खेलमा ९३ गोल गर्नुका साथै गोलका लागि ११९ वटा बल मिलाएका थिए। गत जुलाईमा उनी फ्री ट्रान्सफरमा युभेन्ट्स लागेका छन्।
टुरिनमा हुँदा उनलाई चोटले सतायो। चोटबाट बाहिरि लगत्तै ३४ वर्षीय यी मिडफिल्डर पुनः अर्जेन्टिनी टोलीमा फर्किएर लिओनल स्कोलानीको टिममा संलग्न छन्।
उनका लागि आजको खेल नेदरल्याण्ड्स प्रशिक्षकसँग पुरानो हिसाबको बदला लिने दिन बन्न सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
