काठमाडौं– विश्वकप दावेदार मानिएको अर्जेन्टिनालाई पराजित गर्न जसले मैदान बाहिर बसेर रणनीति बुने, विश्व चर्चित खेलाडी लिओनल मेसीलाई स्तब्ध पारे र पूरै एसियाली फुटबलको अनुहारमा नयाँ रौनक थपे, उनी हुन्– साउदी अरेबियाका ५४ वर्षीय प्रशिक्षक हार्भे रेनार्ड। जो अहिले चर्चाको शिखरमा छन्।
रेनार्डलाई नचिन्नेहरू उनी चाहिनेभन्दा बढी गम्भीर भएको आरोप लगाउँछन्। तर, उनीहरू रेनार्डको जीवनको अर्को पाटोसँग बेखबर छन्। रेनार्डलाई थाहा छ, आफ्नो जिम्मेवारी कसरी बहन गर्ने भन्ने। त्यसैले त उनी फुटबल र परिवारीक जिम्मेवारीलाई उत्तिकै गहनताका साथ उठाइरहेका छन्।
रेनार्डको दाम्पत्य जीवन रंगीन मात्र होइन, निकै रोचक छ। उनकी श्रीमती भिभियान दाये सेनेगलको राष्ट्रिय फुटबल टोलीका पूर्वप्रशिक्षक ब्रुनो मेट्सुको पूर्व पत्नी हुन्, जसको सन् २०१३ मा क्यान्सर रोगका कारण मृत्यु भएको थियो।
मंगलबार राति अर्जेन्टिनालाई पराजित गर्दै जसरी रेनार्ड विश्व चर्चित बन्न पुगे, त्यस्तै २० वर्षअघि सन् २००२ को विश्वकपमा विश्व च्याम्पियन फ्रान्सलाई स्तब्ध पार्दै सेनेगलका प्रशिक्षक मेट्सु पनि चर्चामा आएका थिए।
मेट्सुको निधनपछि रेनार्ड र दायेले विवाह भएको हो। अहिले यो जोडीबाट तीन सन्तान छन्। रेनार्ड मोरक्कोको प्रशिक्षक भएको बेला दायेसँग भेट भएको थियो। यही सम्बन्ध विस्तार हुँदै विवाहमा परिणत भयो।
रेनार्डका तीन सन्तान क्यान्डिस, केभिन र ओड्रे हुन्। क्यान्डिसको फ्रान्समा छुट्टै नाम छ। उनी फ्रान्सको रियालिटी टिभीकी प्रस्तोता हुन्। पिता मोरक्कोको प्रशिक्षक हुँदा उनीमाथि एक पल्ट आक्रमण पनि भएको थियो। आइभोरी कोस्टविरूद्ध खेलमा क्यान्डिस आफ्नो बुवालाई ड्रेसिङ रूम बाहिर पर्खेर बसेकी थिइन्।
त्यति नै बेला स्थानीय समर्थकले उनीमाथि हमला गरे। उनलाई स्ट्रेचरमा हालेर लैजानु परेको थियो। त्यतिबेला रेनार्डले भनेका थिए, ‘कस्तो खाले मानिस होलान्। यसरी पनि मेरो छोरीसँग व्यवहार गर्न मिल्छ?’
भिभियानको मूलघर सेनेगल हो। उनी मेट्सुसँग बिहे भएपछि धर्मान्तरण गर्दै मुस्लिम बनेकी थिइन्।
रेनार्डलाई भेट्नुअघि उनको मोरक्कोमा खेलकुदको सामान पाउने दोकान थियो। मेट्सुबाट उनको तीन जना बच्चा थिए– इन्जो, नोहा र माएभा। मेट्सुको पहिलो श्रीमतीबाट पनि एउटा सन्तान जन्मिएका थिए– रेमी। जसको हेरचाह पनि उनैले गरेकी थिइन्।
मेट्सुको निधनपछि गल्फ पत्रिकालाई अन्तर्वार्ता दिने क्रममा भिभियानले भनेकी थिइन्, ‘मैले मेट्सुसँग अविस्मरणीय समय बिताए।’
रेनार्ड, जसको जन्म फ्रान्समा भएको हो। उनी विशेष समयमा आफ्नो भाग्यमानी सेतो सर्ट पहिरिने गर्छन्। अर्जेन्टिनालाई पराजित गरेको खेलमा पनि उनी त्यही सेतो सर्टमा सजिएका थिए।
प्रशिक्षक बन्नुअघि रेनार्ड औसत खेलाडी थिए। सन् १९९८ मा घुँडाको समस्याका कारण उनले फुटबल करिअरबाट बिदा लिनुपर्यो।
उनले प्रशिक्षकको भूमिका सानो लिग क्लब एससी ड्रयुइगनानबाट सुरु गरे। जीविका चलाउन प्रशिक्षणसँगै सरसफाइको कम्पनी पनि खोल्नुपर्यो।
सुरुवाती दिनमा उनले चीन र भियतनामको क्लबमा सहायक प्रशिक्षकको भूमिका निर्वाह गरे। सन् २००४ मा बेलायतको क्याम्ब्रिज युनाइटेडमा पनि आबद्ध भए। तर, क्याम्ब्रिज रेलिगेशनमा झरेपछि उनले केही महिनामै जागिर गुमाउनुपर्यो। २६ मध्ये यतिबेला ४ खेलमा मात्र उनको जादु चल्यो।
प्रशिक्षकको रूपमा उनको भाग्योदय सन् २०१० देखि सुरु भयो, जब उनी एसिया र अफ्रिकी देशतर्फ मोडिए। सन् २०१२ मा अफ्रिकी कप अफ नेसन्समा जाम्बिया र २०१५ मा आइभोरी कोस्टलाई जिताएपछि रेनार्डको परिचय फेरियो
तीन वर्षअघि उनले साउदी अरेबियाको राष्ट्रिय टोलीसँग सम्झौता गरेका थिए। सन् २०१८ को विश्वकपमा मोरक्कोलाई पहिलो चरणबाट माथि उठाउन नसकेपछि उनलाई बर्खास्त गरिएको थियो।
तर, यसपाली विश्वकपमा उनले जुन काम गरेका छन्, त्यो लामो समय फुटबल समर्थकको स्मरणमा ताजा रहने पक्का छ।
–एजेन्सीहरूबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
