राजनीति

राजनीतिमा छिटो छलाङ मारेका खड्काको यसरी सुरु भयो ओरालो यात्रा

रिखिराम जिसी मंगलबार, कात्तिक २९, २०७९ २१:०७

पोखरा– कुनै बेला मुख्यमन्त्रीका नजिकका पात्र थिए– कुमार खड्का। नयाँ कानुन बनाउन होस् या नयाँ बजेट मुख्यमन्त्रीका दाहिने हातका रुपमा खड्का उभिरहन्थे।

तत्कालीन अखण्ड पार्टीका अध्यक्ष रहेका खड्का प्रदेश सभा सदस्य बन्ने सर्तसहित २०७४ मा कांग्रेसमा समाहित भए। सोहीअनुसार उनी कांग्रेसबाट समानुपातिक सांसद बने। पृथ्वीसुब्बा गुरुङ नेतृत्वको सरकार हुँदा सार्वजनिक लेखा समितिका सभापति रहे।

पछि पृथ्वीसुब्बा गुरुङ नेतृत्वको सरकार ढल्यो। कांग्रेस नेता कृष्णचन्द्र नेपाली पोखरेलको नेतृत्वमा सरकार बन्यो।

पार्टी नेतृत्वको निकटम रहेका खड्का मन्त्री बन्न केन्द्रीय नेताबाट सिफारिसमा पर्न सकेनन्। उनको प्रभावसाली उपस्थितिका कारण मुख्यमन्त्रीको एकल रोजाइमा पर्दै खड्का १ नम्बरमा मन्त्री बने। मुख्यमन्त्रीसँगै खड्काले विनाविभागीय मन्त्रालयको २०७८ जेठ २९ गते सपथ लिए। असार ११ गते सामाजिक विकास मन्त्रालय र साउन ८ गते भौतिक पूर्वाधार मन्त्रालयको जिम्मेवारी पाए। मन्त्री मात्र बनेनन् सरकारका प्रवक्तासमेत रहे। एउटै क्षेत्रमा रहेका कुमार खड्का र विन्दूकुमार थापाबीच संसद् छिरेपछि नै टकराब सुरु भएको थियो। पार्टीका केन्द्रीय नेताको मन जित्दै थापा पनि केही समय पछि मन्त्री बने।

एउटै पार्टीबाट मन्त्री बनेपनि दुवै प्रतिस्पर्धीकै रुपमा देखिन्थे। चुनाव नजिकिएसँगै खड्का र थापाबीचको टकराब छताछुल्ल देखिन्थ्यो। दुवै एउटै निर्वाचन क्षेत्रबाट निर्वाचन लड्न चाहन्थे। मन्त्री रहेका बेला खड्काले प्रत्यक्ष चुनाव लड्ने भन्दै आफ्नो वडामा चालु आर्थिक वर्षका लागि १६ करोड बजेट विनियोजन गरेका थिए।

खड्काले आफू पक्षका नेता कार्यकर्तालाई भेला गरी प्रत्यक्षमा चुनाव लड्ने बताएका थिए। खड्का र थापा टिकटका लागि कांग्रेस सभापति शेरबहादुर देउवा, रामचन्द्रसम्म लबिङ गरे। देउवानिकट मानिने खड्का टिकटको प्रतिस्पर्धामा भने असफल भए। अन्ततः प्रदेश सभातर्फ क्षेत्र नम्बर २ ‘ख’ मा थापाले टिकट पाए। कांग्रेसले थापालाई उम्मेदवार बनाएपछि खड्का असन्तुष्ट बनेका थिए।

असन्तुष्ट बनेका खड्कालाई अन्ततः मुख्यमन्त्री कृष्णचन्द्र नेपाली पोखरेलले मंगलबार बर्खास्त गरेका छन्। उनलाई मुख्यमन्त्री र कानूनमन्त्री विन्दूकुमार थापालाई असहयोग गरेको आरोपमा मुख्यमन्त्री पोखरेलले बर्खास्त गरेका हुन्। चुनावका बेला गठबन्धनलाई असहयोग गरेको भन्दै बर्खास्त गरिएको बताइएको छ। खड्कालाई बर्खास्त गरिएसँगै भौतिक पूर्वाधार, सहरी विकास तथा यातायात मन्त्रालय मुख्यमन्त्री पोखरेलले लिएका छन्।

यसअघि मुख्यमन्त्री पोखरेलले हरिशरण आचार्यलाई ऊर्जामन्त्रीबाट बर्खास्त गरेका थिए। गोरखा २ मा माओवादी केन्द्रका अध्यक्ष पुष्पकमल दाहाल प्रचण्ड र प्रदेश सभाका उम्मेदवार फणिन्द्र देवकोटाको चुनाव प्रचारमा नलागेको भन्दै आचार्यलाई बर्खास्त गरिएको थियो।

छिट्टै छलाङ मारेका खड्का

राजनीतिमा छिटो छलाङ मार्ने नेतामध्येका एक हुन् कुमार खड्का। क्षेत्री एकता समाजबाट सांगठनिक गतिविधिमा सहभागी भएका थिए उनी। पहिलो संविधानसभामा तत्कालीन एमाओवादीले लगाएको जातीय नारापछि क्षेत्रीहरूका नाममा खड्कालगायत मिलेर क्षेत्री समाज खोले।

त्यसलाई निर्वाचन घोषणा भएलगत्तै २०७० साल जेठ ९ गते नयाँ पार्टी अखण्ड नेपालको नाममा दल दर्ता गराए। खड्का क्षेत्री समाजको महासचिव र अखण्ड पार्टीको सभापति बने। २०७० मंसिर ४ गते भएको दोस्रो संविधान सभा निर्वाचनबाट अखण्ड पार्टीले समानुपातिकतर्फ एक सिट प्राप्त गर्‍यो। खड्का अखण्ड पार्टीबाट सिफारिस भए। त्यसपछि समानुपातिक सांसद बन्न पुगे।

जातीय राज्य हुनु हुँदैन भन्दै क्षेत्री–बाहुनको जातीय नारा बोकेर सांसद बनेका खड्का प्रचण्ड प्रधानमन्त्री हुँदा महिला, बालबालिका तथा समाजकल्याण मन्त्रालयको जिम्मेवारी पाए। पछि सरकार ढलेपछि २०७४ मा प्रदेश सांसद पाउने सर्तमा पार्टीलाई कांग्रेसमा समाहित भए।