काठमाडौं– मंगलबार दिल्लीको एक अदालतले बलिउड अभिनेत्री ज्याकलीन फर्नान्डिजविरुद्ध दर्ता भएको मनि लन्ड्रिङ मुद्दामा फैसला सुनाउनेछ।
३७ वर्षीया अभिनेत्रीविरुद्ध प्रवर्तन निर्देशालयको जाँच चलिरहेको छ। यो एजेन्सीले वित्तीय अपराध नियन्त्रण गर्दछ। ज्याकलीनमाथि वित्तीय अनियमितताको आरोप लागेको छ। एजेन्सीले ज्याकलीनविरुद्ध अनुसन्धानका लागि हिरासतको माग गरेको छ।
फर्नान्डिजका वकिल प्रशान्त पाटिल आफ्नो वादीमाथि लागेको आरोव अस्वीकार गर्दै उनीविरुद्ध परेको मुद्दाको कुनै आधार नभएको बताउँछन्।
को हुन् फर्नान्डिज?
फर्नान्डिज पछिल्लो समय चर्चित बलिउड अभिनेत्री हुन्। उनले आफ्नो करिअरको सुरुवात श्रीलंकाको एक ब्यूटी प्रतियोगिताको विजेता हुँदै गरेकी थिइन्।
उक्त सफलतापछि उनी मोडल बनिन्। सन् २००९ मा उनले बलिउडमा आफ्नो करिअरको सुरुवात गरिन्। यद्यपी सिनेमाका पारखी मानिस उनको अभिनय नै सफलताको कारण हो भन्ने कुरा स्वीकार्दैनन्।
फर्नान्डिजले सैफ अलि खान, अक्षयकुमार र सलमान खानजस्ता ठूला स्टारसँग काम सिनेमामा काम गरेकी छन्। उनले भारत तथा विदेशमा शाहरुख खान र प्रियंका चोपडाका साथ कैयौं स्टेज शो गरिसकेकी छन्। साथै उनी एक डान्स रियालिटी शो की निर्णायक पनि बनिसकेकी छन्।
फर्नान्डिज कैयौं ठूला ब्रान्डका लागि विज्ञापन पनि गर्दै आएकी छन्। तर विगत एक वर्षदेखि उनले दिल्लीको चक्कर लगाउन थालेकी छन्। उनीमाथि कथित ठग सुकेश चन्द्रशेखरसँग महँगो गिफ्ट लिने र मनि लन्ड्रिङ गरेको आरोप लागेको छ।
प्रवर्तन निर्देशालयका अधिकारीले उनीविरुद्ध केश दर्ता गरिसकेका छन्। एजेन्सीले फर्नान्डिजलाई पक्राउ गरेर मुद्दा चलाउन माग गरेको छ। तर दिल्लीको एक अदालतले फर्नान्डिजको जमानत निवेदनमाथि सुनुवाई नहुँदासम्म पक्राउ गर्न नसकिने बताएको छ।
फर्नान्डिजमाथि लागेको आरोप कथित ३२ वर्षीय ठग चन्द्रशेखर वरिपरि घुमिरहेको छ। चन्द्रशेखरमाथि कैयौं मानिसबाट जबरजस्ती असुली गर्ने गरेको आरोप छ। अदालतमा पेश गरिएका प्रमाण अनुसार सन् २०१८ मा जेलमा रहेका सुकेश चन्द्रशेखरविरुद्ध एक व्यवसायीसँग दुई सय करोड भारतीय रुपैयाँ असुली गरेको आरोप थियो।
उनका वकिल अशोककुमार सिंहले सबै आरोप अस्वीकार गर्दै झुटो केसमा फसाइएको बताएका थिए। फर्नान्डिजविरुद्ध केस दर्ता गरेको एजेन्सीले गत वर्षको फेब्रुअरीदेखि अगस्टसम्म चन्द्रशेखरले फर्नान्डिजलाई करोडौंका गिफ्ट दिएको आरोप लगाएको छ।
यी उपहारहरुको मूल्य करिब सात करोड भारतीय रुपैयाँभन्दा बढी भएको बताइएको छ। जसमा डिजाइनर ह्याण्डब्याग, बहुमूल्य कपडा, गहना, एक घोडा, सम्पत्तिलगायत छन्।
फर्नान्डिजले ती सबै उपहार स्वीकार गरेकी थिइन्। तर फर्नान्डिजका वकिल प्रशान्तले भने उनी एक विस्तृत अपराधको शिकार भएको बताएका छन्।
के हो सम्बन्ध?
अदालतमा जम्मा गरिएको कागजातका अनुसार चन्द्रशेखर पहिलोपटक सन् २०२० मा फर्नान्डिजसँग सम्पर्कमा आएका थिए।
यो सम्पर्क पिन्की इरानीमार्फत् भएको थियो। पिन्की इरानीलाई चन्द्रशेखरसँग सम्बन्ध भएको आरोपमा गत वर्ष नै पक्राउ गरिएको थियो।
पहिलोपटक भेटका क्रममा फर्नान्डिजले चन्द्रशेखरसँग कुरा गर्ने कुनै मनसाय व्यक्त गरेकी थिइनन्। जनवरी २०२१ मा पहिलोपटक फर्नान्डिजले चन्द्रशेखरसँग कुरा गरिन्। फर्नान्डिजका एक कर्मचारीलाई चन्द्रशेखरको फोन आएको थियो। उक्त फोनमा चन्द्रशेखर भारतीय गृह मन्त्रालयका एक प्रमुख अधिकारी भएको भन्दै कुरा गर्न अनुरोध गरिएको थियो।
अनुसन्धानकर्ताका अनुसार यो फेक कल थियो। जसमा चन्द्रशेखरको नम्बर भारतीय गृह मन्त्रालयको देखाएको थियो। फर्नान्डिज भन्छिन्, ‘चन्द्रशेखरले आफू दक्षिण भारतको एक सम्पन्नशाली परिवारको सदस्य रहेको र दक्षिण भारतकी चर्चित टेलिभिजनको मालिक भएको बताए।’
चन्द्रशेखरले फर्नान्डिजका साथमा एक स्ट्रिमिङ सर्भिसको प्रोजेक्ट गर्न चाहेको बताएका थिए।
बीबीसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
-1786513116.png)
