कास्कीका मतदातालाई भोट दिने जाँगरै छैन, भन्छन्– पुराना नेतालाई कति जिताउनु!

राजनीति

रिखिराम जिसी शुक्रबार, कात्तिक २५, २०७९ १९:४२

पोखरा– आसन्न मंसिर ४ मा हुने प्रतिनिधि सभा तथा प्रदेश सभा निर्वाचनका लागि राजनीतिक दल तथा उम्मेदवारहरू मतदाता रिझाउन घरदैलोमा छन्। उम्मेदवार घरदैलोमा पुग्दा मतदाता भने घरमा देखिँदैनन्।

कास्की क्षेत्र नम्बर १ का मतदाताहरू आफूले उब्जाएको बाली भित्र्याउने चटारोमा खेतबारीतिर व्यस्त देखिन्छन्।

मतदाता रिझाउन केही उम्मेदवारले घरमा चिठी छोडेर फर्किएका छन् त केही उम्मेदवार खेतबारीतिरै पुग्ने गरेका छन्। घरदैलोमा भेटिएका मतदाताहरूमा पनि त्यस्तो चुवानी रौनक देखिँदैन। त्यसको कारण हो वर्तमान राजनीतिक नेतृत्वप्रतिको वितृष्णा।

चुवानी घरदैलोमा या खेरबारीमा भेटिने मतदाताले प्रकट गर्ने आक्रोश नै नेताहरूप्रति देखिन्छ। पोखरा महानगरपालिका १३ कोउखोलामा बुधबार खेतबारीमा काम गरिरहेकी श्यामा बरालको आक्रोश पुराना नेताहरूप्रति नै छ।

६० वर्ष पुगेकी श्यामा धेरैपटक मतदानमा सहभागी भइसकेकी छिन्। तर, पुराना नेताका कारण यसपालीको निर्वाचनमा सहभागी हुन जागर नभएकोतर्फ उनको संकेत थियो। पुराना नेताहरूलाई संकेत गर्दै श्यामाले भनिन्, ‘यिनीहरूलाई पाखा नगलाइकिन मलार्ई भोट दिन पनि जागर छैन।’

उनको आक्रोश उच्च ओहोदामा पुगेका र पटकपटक परीक्षण भएका नेताहरूप्रति थियो। राजनीतिमा पुराना नेतालाई पाखा लगाउनुपर्नेमा उनले पटक–पटक जोड दिइन्। उनी भन्छिन्, ‘न त तिनीहरूसँग देखादेख भाको छ, न त जम्कोभेट। यिनीहरूसँग मेरो सरोकार छैन। पुराना नेताहरूलाई पाखा नगलाइकिन हामीलाई भोट दिन पनि जाँगर छैन। हामीले एउटा भोट दिनै पर्छ भन्ने थाहा छ, तर जाँगर छैन।’

आफ्ना उमेरका नेता कोही पनि गतिला नभएको श्यामाले आरोप लगाइन्। ‘आफूसँगको ब्याजका नेताहरू देख्दा मन लागेन कुनै पनि गतिला छैनन्’, उनले भनिन्।

माओवादीकालमा पाएको दुःखको स्मरण उनीसँग ताजै छ। माओवादीका पालामा खान लागेको गाँस पनि खान नदिएको श्यामा सम्झिन्छिन् । ‘माओवादीका पालामा एउटा थोत्रो लुगा भएको बाकस पनि खोले। हामीलाई खान लागेको गाँस खान दिएनन्। एक माना पकाएका छौं भने मानेनन्, तिनीहरूले नै खाए। हामी भोकै बसियो, त्यो कालमा, त्यस्तो गरेर हामीले दियौं’, उनी भन्छिन्।

माओवादीको समयमा दुःख–सुखले एक छाक नखाइकन पनि उनीहरूलाई सहयोग गरेको श्यामा बताउँछिन्। ‘त्यतिबेला हामी किसान थियौं र हाम्ले दुःख–सुखले एक छाक नखाइकन यिनैलाई दिऔं भनेर आफूले पेट बाँधेर भएपनि सहयोग गर्रौं’, उनले भनिन्।

नेताहरूले जनताको दुःख नदेखि भष्ट्रचार गरी लाख–करोड खाएको श्यामाको आरोप छ। ‘हामी दुःख गरेर खाने हौं। आफ्नै खेती किसानी, नाम्लो–दाम्लो, कुटो–कोदालो गरेर खाका छौं। नेताहरू भ्रष्टाचार गर्छन्, लाख करोड ग्वाम्म खान्छन्। यिनलाई दुःख भयो भनेर हामीलाई कहिल्यै हेरेका छैनन्,’ उनी भन्छिन्।

श्यामासँगै रहेकी तेजकुमारी विश्वकर्माले पनि नेताहरूले केही नगरेकाले चुनावमा सहभागी हुने जाँगर नरहेको प्रतिक्रिया दिइन्।

चुनाव नजिकिएर उम्मेदवार घरदैलोमा व्यस्त छन्। तर, मतदाता भने खुसी देखिएका छैनन्। श्यामा र तेजकुमारी जस्तै अधिकांश मतदाता राजनीतिक दल र उम्मेदवारप्रति असन्तुष्ट रहेको बताउँछन्। उक्त क्षेत्रमा प्रदेश सभातर्फ पुरानै उम्मेदवार चुनावी मैदानमा होमिएका छन्। पुरानै उम्मेदवार, पटक–पटक परीक्षण भएका उम्मेदवार चुनावी माहोलमा होमिँदा मतदातामा भने कुनै उत्साह देखिँदैन ।

काउखोला क्षेत्र प्रतिनिधि सभातर्फ कास्की १ र प्रदेश सभातर्फ २ मा पर्छ। उक्त क्षेत्रमा मुख्य राजनीतिक दलहरूका उम्मेदवारबीच नैै मुख्य प्रतिस्पर्धा हुने देखिन्छ। प्रतिनिधि सभातर्फ एमालेबाट मनबहादुर गुरुङ र सत्ता गठबन्धनबाट कांग्रेसका किशोरदत्त बरालबीच मुख्य प्रतिस्पर्धा हुने बताइएको छ। प्रदेश सभातर्फ एमालेका बेदबहादुर गुरुङ र गठबन्धनबाट कांग्रेसका दीपक गुरुङबीच प्रतिस्पर्धा हुनेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।