निर्वाचन विशेष

परियार र कोइरालाको राजनीतिः पहिले प्रतिस्पर्धी, अहिले सारथि

रिखिराम जिसी बुधबार, कात्तिक १६, २०७९ १३:४०

पोखरा– नेपाली कांग्रेस सहमहामन्त्री जीवन परियार र नेकपा (माओवादी केन्द्र)का नेता दीपक कोइराला ०७४ को निर्वाचनमा प्रतिस्पर्धी थिए। त्यो बेला प्रदेश सभा निर्वाचनमा कास्की १ ‘क’मा कांग्रेसको तर्फबाट परियार र वाम गठबन्धनका तर्फबाट कोइराला उम्मेदवार बनेको थिए।

परियारलाई ३ हजार ६४६ मतान्तरले हराउँदै कोइराला प्रदेश सभा सांसद बनेका थिए । कोइरालाले १८ हजार ७२७ र कांग्रेसका परियारले १५ हजार ८१ मत प्राप्त गरेका थिए। यसपटक भने कोइराला परियारकै सहयोगमा चुनाव जितेर संसद छिर्ने चाहन्छन्। कांग्रेस सहमहामन्त्रीसमेत रहेका परियार कोइरालालाई जिताउन कस्सिएका छन्। कोइराला र परियार आजकल जनतामाँझ जाँदा सँगैै देखिन्छन् । परियार कोइरालालाई मत दिन जनतामाझ लागि परेका छन्।

कांग्रेस, माओवादी केन्द्रसहितका दलसँग गठबन्धन भएपछि कोइराला र परियार एकै ठाउँ भएका हुन्। स्थानीय चुनावमा सहकार्य गरेका दलले संघ र प्रदेशको चुनावमा पनि गठबन्धनलाई कायम राखेका छन्।

यसपल्ट गठबन्धनको जित निश्चित रहेको कांग्रेस नेता परियार बताउँछन्। केपी शर्मा ओलीले संसद् विघटन गरिसकेपछि विशेष परिस्थितिमा कांग्रेसको नेतृत्वमा गठबन्धन बनेको उनको भनाइ छ।

‘हामी हिजो झगडा गरेका आदर्श नमिलेका दलहरू नि एउटै पार्टी भएर एक ठाउँमा बस्नु चानचुने कुरा होइन। कुनैबेला माओवादी र कांग्रेस मिलेर सँगै हिँड्छन् भनेर कसैले पनि कल्पना गरेको थिएनन्,’ उनी भन्छन्। संविधानको रक्षा, राजनीतिक स्थायित्व, समृद्धि र विकास निर्माणका लागि गठबन्धन आवश्यक रहेको नेता परियारले दाबी गरे।

कांग्रेस सहमहामन्त्री परियार स्वयं प्रतिनिधिसभा सदस्यका लागि समानुपातिक सूचीमा छन्। उनी संघीय सांसद बन्ने निश्चित प्रायः छ। अब उनको ध्यान आफ्नो निर्वाचन क्षेत्रमा गठबन्धनका उम्मेदवारलाई जिताउनुमा छ। उनी यतिबेला कास्की १ ‘क’का उम्मेदवार कोइरालालाई जिताउन स्थानीयसँग भेटघाट गरिरहेका छन्। गठबन्धनका दलका स्थानीय नेतासँगै छन्। कोइरालालाई जिताउन कांग्रेस नेता परियार सारथिको भूमिकामा उत्रिएका छन्। उनलाई जिताउन मतसमेत मागिरहेका छन्।

अघिल्लो निर्वाचनमा विजयी भएका कोइरालालाई माओवादी केन्द्रले दोस्रोपटक उम्मेदवार बनाएको हो। कोइराला प्रदेश सभामा अर्थ तथा विकास समितिको सभापति भइसकेका छन्। कांग्रेससँगै नेकपा (एमाले)का कार्यकर्ताले पनि आफूहरूलाई मत दिने दाबी माओवादीका नेताहरूले गर्दै आएका छन्।

कोइरालाका मुख्य प्रतिस्पर्धीको रुपमा एमालेका खगराज अधिकारी छन्। ०७४ को निर्वाचनमा कास्की १ बाट चुनावी मैदानमा उत्रेका अधिकारीले कांग्रेसका यज्ञबहादुर थापालाई हराएका थिए। यसपटक भने मुख्यमन्त्री बन्ने भन्दै प्रदेश सभामा उम्मेदवारी दिएका छन्।

यसअघि, एमालेबाट मुख्यमन्त्री बनेका एमाले उप–महासचिव पृथ्वीसुब्बा गुरुङलाई पार्टीले संघमा टिकट दिएको छ। अधिकारीलाई मुख्यमन्त्री बनाउने भन्दै प्रदेशमा लगिएको छ। कास्की प्रदेशसभा १ ‘क’मा ५८ हजार ४ ४५ मतदाता छन् ।