गण्डकीका महिला उम्मेदवारलाई गठबन्धनका 'हेभी वेट' को चुनौती

राजनीति

रिखिराम जिसी आइतबार, कात्तिक ६, २०७९ २०:३६

पोखरा- आउँदो मंसिर ४ गते हुने प्रतिनिधि सभा निर्वाचनका लागि गण्डकी प्रदेशबाट तीन जना महिला चुनावी मैदानमा होमिएका छन्। १८ वटा निर्वाचन क्षेत्र रहेको गण्डकीमा उम्मेदवारी दिने तीनै जना महिला नेकपा एमालेका हुन्।

नेपाली कांग्रेस, माओवादी केन्द्र र एकीकृत समाजवादीले गण्डकीमा एक जना महिलालाई पनि उम्मेदवार बनाएका छैनन्। एमालेले कास्की- २ मा विद्या भट्टराई, स्याङ्जा- २ मा पद्मा अर्याल र बागलुङ- २ मा मञ्जु शर्मा चालिसेलाई उम्मेदवार बनाएको हो।

पूर्वउपसभापतिलाई हराएकी पद्मालाई उपसभापतिको चुनौती
२०७४ को प्रतिनिधिसभा निर्वाचनमा स्याङ्जा- २ बाट उम्मेदवार बनेकी नेकपा एमालेकी सचिव पद्मा अर्यालले तत्कालीन उपप्रधानमन्त्री तथा कांग्रेसका पूर्वउपसभापति गोपालमान श्रेष्ठलाई पराजित गरेकी थिइन्। सो निर्वाचनमा तत्कालीन एमाले र माओवादीबीच तालमेल गरेर वाम गठबन्धन बनेको थियो। आउँदो मंसिर ४ गते हुने निर्वाचनमा अर्यालका प्रतिस्पर्धी कांग्रेसका हेभिवेट उम्मेदवार उपसभापति धनराज गुरुङ छन्।

कांग्रेस उपसभापति गुरुङलाई सत्ता गठबन्धनको साथ छ भने एमालेकी पद्मा एक्लै मैदानमा छिन्। अघिल्लो निर्वाचनमा कांग्रेसका पूर्वउपसभापति हराउँदै सांसद बनेकी पद्यालाई अहिले पनि उपसभापतिकै चुनौती छ।

भूमि व्यवस्था मन्त्रीसमेत भएकी पद्मा र पहिलो पटक चुनाव लड्न लागेका धनराजबीचको प्रतिस्पर्धालाई स्याङ्जाका बासिन्दाले पनि चासोसाथ हेरेका छन्।

स्याङ्जा- २ मा गत वैशाखमा भएको स्थानीय तह निर्वाचनको मत हेर्ने हो भने गठबन्धन करिब ४ हजार मतले अगाडि छ। गठबन्धनले ३८ हजार २ सय ८२ र एमालेले ३४ हजार ८ सय ८ मत प्राप्त गरेको छ। वैशाखपछि पनि सो क्षेत्रमा केही मतदाता थपिएका छन्।

मञ्जुलाई शिक्षामन्त्री देवेन्द्रको चुनौती
बागलुङ- २ बाट प्रतिनिधि सभा सदस्यका लागि मञ्जु शर्मा चालिसे र देवेन्द्र पौडेल भिड्दै छन्। मञ्जु शर्मा चालिसे एमालेबाट उम्मेदवार बनेकी हुन् भने शिक्षा, विज्ञान तथा प्रविधिमन्त्री देवेन्द्र पौडेल माओवादी केन्द्रबाट उम्मेदवार बनेका हुन्। पौडेल माओवादी केन्द्रका सचिव हुन्। पौडेलको क्षेत्रमा राजमोका चित्रबहादुर केसी उम्मेदवार बनेपछि उनी क्षेत्र नम्बर २ मा उम्मेदवार बनेका हुन्।

जीवनको लामो समय नेपाली कांग्रेसको राजनीतिमा बिताएकी चालिसे गत वैशाखमा भएको स्थानीय तह निर्वाचनमा कांग्रेस पार्टी परित्याग गरी गल्कोट नगरपालिकाको नगर प्रमुखमा स्वतन्त्र उम्मेदवार बनेकी थिइन्। प्रमुखमा पराजित भएकी चालिसे एमाले प्रवेश गरेकी थिइन्।

बागलुङ- २ मा गत वैशाखमा भएको निर्वाचन हेर्ने हो भने गठबन्धन धेरै अगाडि छ। गठबन्धनले ३४ हजार ५ सय ६८ र एमालेले १९ हजार ३० मत प्राप्त गरेको छ।

विद्या भट्टराईलाई सहकर्मीको चुनौती
एमालेबाट उम्मेदवार बनेकी विद्या भट्टराई दोस्रो पटक चुनावी मैदानमा छिन्। २०७६ को उपनिर्वाचनमा कास्की- २ बाट विजयी बनेकी विद्या यस पटक पनि सोही क्षेत्रबाट दोस्रो पटक संसद छिर्ने दाउमा छिन्।

उनलाई सत्ता-गठबन्धनका उम्मेदवार एकीकृत समाजवादीका श्रीनाथ बरालको चुनौती छ। बराल एमालेबाट फुटेर गएका पूर्वसहकर्मी हुन्।

गत वैशाख ३० गते भएको स्थानीय तहको नतिजा हेर्ने हो भने कास्की- २ मा गठबन्धन अगाडि देखिन्छ। गठबन्धनले यो क्षेत्रमा २२ हजार २ सय ५६ मत प्राप्त गरेको थियो भने एमालेले २१ हजार १ सय ६४ मत पाएको थियो।

पूर्वसहकर्मीहरु प्रतिस्पर्धा यस क्षेत्रमा निकै रोचक बन्ने देखिन्छ। स्थानीय तह चुनावको मत हेर्दा यो क्षेत्रमा साना दल, नयाँ थपिने मतदाता र उम्मेदवारप्रति मतदाताको विश्वासका आधारमा जित-हारको निर्क्योल गर्ने देखिन्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।