पटक–पटकका प्रतिस्पर्धी, संसद् छिर्न जो यसपटक पनि भिड्दैछन्

राजनीति

रिखिराम जिसी सोमबार, कात्तिक ७, २०७९ १२:३०

पोखरा– मंसिर ४ गते हुने प्रतिनिधि सभा सदस्य निर्वाचनका लागि स्याङ्जा १ बाट एमालेका नारायण मरासिनी तेस्रोपटक चुनावी मैदानमा छन्। पहिलो पटक २०७० को निर्वाचनमा उम्मेदवार बनेका मरासिनी त्यतिबेला कांग्रेसका उम्मेदवारसँग पराजित भएका थिए। उनलाई नेपाली कांग्रेसका राजु थापाले पराजित गरेका थिए।

मरासिनी २०७४ को प्रतिनिधि सभाको निर्वाचनमा दोस्रोपटक उम्मेदवार बने। २०७० सालमा आफूलाई पराजित गर्ने कांग्रेसका थापालाई नै पराजित गर्दै संसद् छिर्ने अवसर पाए।

२०७४ को निर्वाचनमा मरासिनीले १० हजार ५६४ मतान्तरले कांग्रेस उम्मेदवार थापालाई पराजित गरेका थिए। मरासिनीले ३९ हजार २२६ र कांग्रेसका थापाले २८ हजार ६ सय ६२ मत प्राप्त गरका थिए। त्यतिबेला मरासिनी एमाले र नेकपा माओवादी केन्द्र बीचको वाम गठबन्धनका साझा उम्मेदवार थिए।

आउँदो मंसिर ४ गते हुने निर्वाचनमा मरासिनी र थापा तेस्रोपटक आमनेसामने हुने भएका छन्। तर, यसपटक मरासिनीलाई अघिल्लोपटकको जस्तो ‘बलियो गठबन्धन’को समर्थन रहने छैन। मरासिनी एमाले ‘एक्लै’का उम्मेदवार छन् भने कांग्रेसका थापा माओवादी, एकीकृत समाजवादीसहितको गठबन्धनको साथमा मैदानमा छन्।

सो क्षेत्रमा प्रतिनिधि सभा सदस्यका लागि ३ स्वतन्त्रसहित १५ जनाको उम्मेदवारी दिएका छन्। तर मुख्य प्रतिस्पर्धा मरासिनी र थापाबीच हुने देखिन्छ। संसद् यात्रालाई निरन्तरता दिने चाहनाका साथ मैदानमा उत्रिएका मरासिनीलाई यसपटक अघिल्लो पटकको जस्तो सजिलो छैन। त्यसो त पटक–पटक ‘परीक्षण’ भइसकेका कांग्रेसका थापालाई पनि जित हासिल गर्न त्यति सहज छैन।

गत बैशाखमा भएको स्थानीय तहको निर्वाचनको मतपरिणामअनुसार यो क्षेत्रमा सत्ता गठबन्धन बलियो देखिएको छ। स्थानीय तहको निर्वाचनमा गठबन्धले ३९ हजार ४९४ र एमालेले ३६ हजार ८४५ मत प्राप्त गरेको थियो। बैशाखपछि पनि केही मतदाता थपिएका छन्। जसले गर्दा नयाँ मतदाता र चुनावी अजेण्डाले पनि नतिजामा फरक पार्न सक्छ।

प्रतिनिधि सभा निर्वाचनका लागि पर्वतमा १२ जनाको उम्मेदवार परेको छ। प्रतिनिधि सभातर्फ एउटा निर्वाचन क्षेत्र रहेको पर्वतमा गठबन्धनबाट उम्मेदवार बनेको कांग्रेसका अर्जुन जोशी र नेकपा एमालेबाट उम्मेदवार बनेका पदम गिरी मुख्य प्रतिस्पर्धी हुन्। जो यसअघि २०७४ सालमा भएको प्रतिनिधि सभा निर्वाचनका पनि प्रतिस्पर्धी हुन्।

गिरी दोस्रोपटक र अर्जुन चौथोपटक संसद् छिर्ने योजनासहित चुनावी मैदानमा होमिएका छन्। कांग्रेसका जोशीले २०५६ सालको संसदीय चुनाव, २०६४ मा भएको पहिलो संविधान सभा निर्वाचन र २०७० को दोस्रो संविधान सभा निर्वाचन जित हासिल गरेका थिए। २०७४ को निर्वाचनमा भने गिरीले जोशीको विजययात्रालाई रोकेका थिए। त्यतिबेला गिरी एमाले–माओवादीको वाम गठबन्धनका उम्मेदवार थिए।

२०७४ को निर्वाचनमा गिरी ३९ हजार २७५ मत ल्याएर विजयी हुँदा जोशीले २६ हजार ८१९ मत प्राप्त गरेका थिए। एमालेका गिरीसँग झण्डै १२ हजार ४५६ मतान्तरले पराजित भएका जोशी यसपटक गठबन्धनको साथ रहेकाले त्यति नै मतान्तरले जित्ने दाबी गर्छन्।

गत बैशाख ३० गते भएको स्थानीय तहको निर्वाचनका सो क्षेत्रमा वडाध्यक्षहरुले पाएको मतका आधारमा एमाले गठबन्धनभन्दा अघि छ। एमालेका वडाध्यक्षका उम्मेदवारले ३५ हजार ७१६ मत पाएका थिए। कांग्रेस माओवादीसहितको गठबन्धनका उम्मेदवारले ३५ हजार २०४ मत पाएका थिए। जुन एमालेभन्दा करिब ५०० मत कम हो।

गोरखा १ बाट प्रतिनिधि सभाका लागि एमालेबाट रामशरण बस्नेत र कांग्रेसबाट राजेन्द्र बजगाईं चुनावी मैदानमा छन्। बस्नेत र बजगाईंले यसअघि २०७४ को प्रदेश सभा निर्वाचनमा गोरखा १ को प्रदेश सभा १ बाट प्रतिस्पर्धा गरेका थिए।

त्यतिबेला वाम गठबन्धनका उम्मेदवार बनेका एमालेका बस्नेतले बजगाईंलाई पराजित गर्दै प्रदेश सभाको यात्रा निश्चित गरेका थिए। १६ हजार ६ सय ५६ मत पाउँदै विजयी भएका बस्नेत गण्डकी प्रदेश सरकारको भौतिक पूर्वाधार विकास मन्त्री भएका थिए। कांगेसका बजगाईंले १३ हजार १ मत प्राप्त गरेका थिए।

यसपटक भने एमालेका बस्नेत एक्लै रहँदा कांग्रेसका बजगाईंलाई माओवादी केन्द्र, एकीकृत समाजवादीसहितको गठबन्धनको साथ छ।

गएको स्थानीय तहको निर्वाचनमा पनि एमाले कमजोर देखिएको छ। गत बैशाख ३० गते भएको स्थानीय तहका निर्वाचनमा उक्त क्षेत्रमा गठबन्धनले ५५ हजार मत प्राप्त गर्दा एमालेले १४ हजार मत प्राप्त गरेको छ।

स्थानीय तहको प्राप्त गरेको मत तुलना गर्दा गठबन्धन तेब्बर मतले अघि देखिन्छ। यसकारण पनि गठबन्धन दल आफ्नो पक्षमा परिणाम आउनेमा ढुक्कजस्तै देखिन्छन्। उक्त क्षेत्रमा प्रतिनिधि सभातर्फ २०७४ सालमा वाम गठबन्धनबाट विजयी हरिराज अधिकारीले २९ हजार ८६० र कांग्रेसका चिनकाजी श्रेष्ठले २६ हजार ६४३ मत प्राप्त गरेका थिए।