राजनीति

निर्वाचन आयोगप्रति सत्ता गठबन्धनकै नेताहरू असन्तुष्ट, ओलीमाथि पनि खनिए

शेरबहादुर ऐर बिहीबार, कात्तिक ३, २०७९ २१:१३

मसुरिया– निर्वाचन आयोगका गतिविधिप्रति सत्ता गठबन्धनका नेताहरूले असन्तुष्टि व्यक्त गरेका छन् । कैलाली क्षेत्र नम्बर ४ को प्रदेश ‘क’मा बिहीबार चुनावीसभालाई सम्बोधन गर्दै नेताहरूले आयोगप्रति असन्तुष्टि व्यक्त गरेका हुन् ।

नेपाली कांग्रेसका प्रदेश सभापति तथा प्रतिनिधि सभा कैलाली क्षेत्र नम्बर ४ का वाम–लोकतान्त्रिक गठबन्धनका साझा उम्मेदवार वीरबहादुर बलायरले पार्टीबाटै जितेका जनप्रतिनिधि र शुभेच्छुक संस्थाका प्रतिनिधिलाई निर्वाचन गतिविधिमा संलग्न हुनबाट वञ्चित गरेको भन्दै रोष प्रकट गरे ।

‘एकीकृत समाजवादीका अध्यक्ष माधवकुमार नेपालले रौतटहको चुनावीसभालाई सम्बोधन गर्दै बोलेको सामान्य शब्दलाई लिएर निर्वाचन आयोगले पत्र काट्यो,’ उनले भने, ‘हामी इमान्दारपूर्वक निर्वाचन आयोगको आचारसंहितामा हस्ताक्षर गरेका छौँ । उल्लङ्घन गर्दैनौ र गर्न पनि दिँदैनौँ । तर, केपी ओलीको इशारामा मुख्य निर्वाचन आयुक्त दिनेशकुमार थपलियाले उच्छृङ्खल गतिविधि गर्दैछन् ।’

त्यस्तै, नेसपाका केन्द्रीय सदस्य तथा कैलाली क्षेत्र नम्बर ४ को प्रदेश सभा ‘क’का वाम–लोकतान्त्रिक गठबन्धनका साझा उम्मेदवार दीर्घबहादुर सोडारीले केपी ओलीले संवैधानिक अंगलाई प्रभावित पार्दै अग्रगमनमाथि प्रहार गर्न थालेको बताए । ‘राष्ट्रपति विद्यादेवी भण्डारी र निर्वाचन आयोगलाई दबाब दिएर ओलीले तिकडम अपनाउन थालेका छन् । उनले कम्युनिस्टको खोल ओढेर राजावादी र प्रतिगमनकारीसँग मिलेर गणतन्त्रमाथि प्रहार गरे,’ उनले भने ।

उनले चुनावीसभालाई सम्बोधन गर्दै क्षेत्र नम्बर ४ मा गरेको विकास र ल्याएको बजेट तथा आफूले गरेका कामको फेरहिस्तसमेत प्रस्तुत गरे ।

चुनावीसभालाई माओवादी केन्द्रका केन्द्रीय सदस्य लक्षिराम आचार्यले निर्वाचन आयोगका गतिविधिप्रति शंका उत्पन्न भएको बताए । जनताको ठूलो बलिदानीबाट प्राप्त लोकतन्त्रको सुन्दर पक्षलाई अंकुश लगाउँदै ओलीको इशारामा निर्वाचन आयोगका प्रमुख आयुक्त थपलिया चलेको आरोप लगाए । यसले गर्दा आज जनप्रतिनिधिको भागाभाग भएको उनको भनाइ थियो ।

‘हिजो यिनै झण्डामुनि रहेर चुनाव जितेका जनप्रतिनिधिहरूले आज आफ्नै नेताका लागि भोट माग्नसम्म डराउनुपर्ने स्थिति सिर्जना भएको छ,’ उनले भने, ‘प्रतिगमनका मतियार ओलीको इशारामा निर्वाचन आयोगले यस्तै गतिविधि भइरहेको छ, त्यसका विरुद्धमा जनताले चुनावी मैदानबाटै तह लगाउनु नपरोस् ।’