अन्य

पोखरामा चम्किइन् जयरानी!

रिखिराम जिसी बिहीबार, कात्तिक ३, २०७९ ०९:४९

पोखरा– गएको ४ दिनमा नवौं राष्ट्रिय खेलकुद अन्तर्गत एथलेटिक्सका ४ विधामा ४ स्वर्ण एउटै खेलाडीको नाममा रह्यो। स्वर्णमात्र रहेन ३ इभेन्टमा नयाँ राष्ट्रिय कीर्तिमानसमेत कायम भयो। त्यस्तो कीर्तिमानी कायम गर्ने खेलाडी हुन् त्रिभुवन आर्मी क्लबकी जयरानी थारु।

आर्मीमा आवद्ध भएपछि पहिलोपटक राष्ट्रिय खेलकुदमा सहभागी भएकी जयरानीले नवौं खेलकुदमा सनसनी मच्चाइन्। उनीले सहभागिता जनाएका ४ वटै इभेन्टमा स्वर्ण पदक जित्न सफल भइन्।

३ वटा इभेन्टमा नयाँ राष्ट्रिय कीर्तिमान कायम गरिन्। जयरानीले महिला ४०० मिटर हडल्स, महिला एक सय मिटर हडल्स र महिला लङजम्पमा स्वर्ण पदकसहित नयाँ राष्ट्रिय कीर्तिमान कायम गरिन्। ४ गुणा १०० मिटर रिलेमा जयरानीसहितको आर्मी टिमले स्वर्ण जित्यो।

उक्त सफलता जयरानी आफ्नो कडा मिहेनेतबाट सम्भव भएको बताउँछिन्। उनी भन्छिन्, ‘मेरो कडा परिश्रम र मिहेनतले यो सम्भव भएको हो।’ खेलमा सोचेभन्दा राम्रो नजिता भएको जयरानी बताउँछिन्। ‘आफूले सोचेभन्दा राम्रो गरे भनम्, धेरै नै खुसी छ। ३ वटैमा कीर्तिमान गर्छु भनेर सोचेकी थिइनँ।’

३ वटामा कीर्तिमान कायम गरेकी जयरानी लङजम्पमा रेकर्ड तोड्दा आफैं अचम्मित छिन्। बिनाअभ्यास नै कीर्तिमान कायम गर्दा उनले झनै खुसी व्यक्त गरिन्। अभ्यास नगरे पनि लङजम्पमा राम्रो नतिजा आएको जयरानी बताउँछिन्।
‘त्यो मेरो एक्स्ट्रा गेम हो। बिना प्राक्टिस सहभागी भएको गेममा रेकर्ड तोडेँ। प्राय प्राक्टिस गर्दिनँ। नतिजा राम्रो आयो, एकदम खुसी छु,’ उनले भनिन्।

४०० हडल्स र १०० हडल्समा अभ्यास गरे पनि लङजम्पका लागि अभ्यास नै नगरेको जयरानी बताउँछिन्। ‘४०० हडल्स र १०० हडल्समा कीर्तिमान गर्छु भनेर त्यही अनुसार नै गरेकी थिएँ। लङजम्पको कहिल्यै पनि प्राक्टिस गर्दिनँ,’ उनले भनिन्, ‘लङजम्पमा पनि मेडल त लाग्छ तर जित्छु नै लाग्छ भन्ने चाहिँ १ प्रतिशत पनि थिएन, दोस्रो, तेस्रो चाहिँ आउँछु भन्ने थियो।’ ४०० हडल्स र १०० हडल्समा कीर्तिमान राख्नेगरी नै तयारी गरेको जयरानी बताउँछिन्।

जयरानी ३ वर्षअघि आर्मीमा भर्ना भएकी थिइन्। खेलकै माध्यमदेखि आर्मीमा जोडिएकी उनी अन्य क्षेत्रमा अवसर आउँदा पनि बुबाको चाहना अनुसार आफू आर्मीमा भर्ना भएको बताउँछिन्।

‘मेरो गेम पहिलेदेखि नै राम्रो थियो। सशस्त्र र प्रहरीमा पनि जागिरका लागि अवसर आएका हुन्,’ उनी भन्छिन्, ‘तर, बाबाको चाहना आर्मी बन्नुपर्छ भन्ने नै थियो। खेलकुद कोटाबाट म आर्मीमा भर्ना भएँ।’

विभागबाट धेरै अवसर पाएँ
प्रदेशभन्दा विभागमा धेरै अवसर तथा एक्स्पोजर पाउने तथा खेलकुदको स्तरमाथि उठ्नेमा जयरानी सहमत छिन्। आर्मीबाट खेल्न थालेपछि आफ्नो खेलको स्तर धेरै सुध्रिएको उनको अनुभव छ। ‘यहाँ खेलाडीलाई सुविधा राम्रो छ। बाहिर भएको भए अहिलेको उपलब्धी हासिल गर्नु मेरा लागि सम्भव थिएन। विभागीय टोलीसँग जोडिएपछि मैले आफ्नो क्षमता बढाउने अवसर पाएँ।’

प्रदेशबाट खेल्दा र विभागबाट खेल्दा धेरै फरक हुने जयरानी बताउँछिन्। ‘प्रदेशबाट खेल्दा र विभागीयबाट खेल्दा धेरै नै फरक पाउँछु म। पहिले यसरी प्रशिक्षण कसैले दिएनन्’, उनले भनिन्।

उनी सातौं राष्ट्रिय खेलकुदमा मध्यपश्चिम र आठौंमा प्रदेश नम्बर ५ बाट सहभागी बनिन्। सातौंमा अनुभव बटुलेकी उनले आठौंमा ३ रजत पदक जितिन्। नवौं खेलकुदमा भने ४ स्वर्णसहित ३ कीर्तिमान कायम गर्न सफल भइन्।