काठमाडौं– दशैं सुरु भएसँगै काठमाडौं उपत्यकाबाट दैनिक एक लाख बढीको संख्यामा मानिसहरु उपत्यकाबाट बाहिरिँदैछन्। तर भनेजस्तो सहज रुपमा यात्रुले घर जान पाएका छैनन्। न समयमै टिकट नै पाएका छन्।
बिहानैदेखि दिउँसोसम्म लाइन लाग्दा पनि बसको टिकट नपाउने गरेको यात्रुले गुनासो गरेका छन्। अझ विशेषगरी यो समस्या पश्चिम रुटमा बढी छ।
काठमाडौंको नयाँ बसपार्कस्थित टिकट काउन्टरमा शनिबार भेटिएका डोटीका हरि बिसीले टिटक नपाएको दुखेसो पोखे। पाँच दिनसम्म धाउँदा पनि टिकट नपाएको उनको भनाइ छ।
बस व्यवसायी र प्रहरीले आफन्तलाई टिकट बाँड्ने गरेका कारण पनि सर्वसाधारणले टिकट नपाएको उनको गुनासो छ।
‘हामी बिहानदेखि लाइनमा छौं। पालो नै आउँदैन। यसरी धाउन थालेको पाँच दिन भयो। तर कोही बस व्यवसायीका आफन्त वा यहाँ सुरक्षाका लागि बसेका प्रहरीका आफन्त आए भने पालो मिचेरै प्रहरीले भित्र छिराउँछन्। हामी खाना नखाएर घण्टौं लाइन बस्दा पनि टिकट पाउँदैनौं’, उनले भने।
यस्तै टिकट नपाएकै कारण यसपालीको दशैंमा घर जान नसक्ने अवस्था आएको कैलालीका कृष्ण टमाटाले दुखेसो गरे। सरकारले टिकटको व्यवस्था नमिलाएर सर्वसाधारणलाई अलपत्र पारेको भन्दै उनले आक्रोश पोखे।
केही यात्रुहरु भने टिकट नपाए पनि बसको क्याबिनमै बसेर घर जाने तयारी गर्दै थिए। टिकट पाउनै गाह्रो भएपछि क्याबिनमा बसेर घर जाने तयारी गरिरहेको नेपालगन्जकी दिलमाया खत्रीले बताइन्। त्यो पनि दुई तीन दिन कोशिश गर्दा क्याबिनकी टिकट पाइएको उनको भनाइ छ।
बस व्यवसायीहरुले दोब्बर मूल्य भाडा लिएर रिजर्भमा पनि यात्रुहरुलाई ओसार्ने गरेको तर टिकट भने नदिएकोमा यात्रुहरुको चर्को गुनासो छ।
उनीहरुले सरकारले दशैंमा घर जानेहरुलाई बसको टिकटको लागि आवश्यक व्यवस्था नमिलाएको सरकारप्रति आक्रोश समेत व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
