काठमाडौं– लुम्बिनी प्रदेश योजना आयोगको गाडीले जेब्राक्रसमै पैदलयात्रीलाई ठक्कर दिएको छ। प्रदेश योजना आयोगका उपाध्यक्ष बामदेव क्षेत्री सवार बा २ झ ३०८५ नम्बरको सरकारी गाडीले जेब्रा क्रसमै पैदलयात्रीलाई ठक्कर दिएको हो।
बुटवलबाट भैरहवातर्फ जाँदै गरेको क्षेत्री सवार उक्त गाडीले तिलोत्तमा नगरपालिकास्थित ड्राईभरटोलमा ट्राफिक लाइटसमेत रातो बलेको अवस्थामा जेब्राक्रसबाट बाटो पार गरिरहेका स्थानीय छविलाल अधिकारीलाई ठक्कर दिएको हो।
गाडीको ठक्करबाट आफ्नो खुट्टामा चोट लागे पनि उपाध्यक्ष क्षेत्रीले आँखा हेरर हिँड्न सक्दैनस् भन्दै आफूलाई हकारेको अधिकारीले बताए। ‘पहिलो कुरा त म सिग्नल पाएपछि जेब्राक्रसमा हिँडेको थिए, दोश्रो उहाँको गाडीले ट्राफिक लाइटमा रातो बत्ती बलेको बेला आएर ठक्कर दिएको छ। आफ्नै गल्तीमा पनि उहाँले मलाई गाली गरेर हिँड्नुभयो,’ घाइते अधिकारीले भने।
जिम्मेवार व्यक्ति चढेकै गाडीले ट्राफिक नियम मिचेर पैदल यात्रीलाई ठक्कर दिए पनि सामान्य मानविय व्यवहारसमेत नदेखाइ उल्टै गाली गरेर हिँडेको उनले गुनासो गरे। ‘ठक्कर दिएपछि उठाउने र उपचार गर्ने कुरा त परै जाओस्, क्षेत्रीले उल्टै हकार्दै मलाई भैरहवा जान हतार छ भन्दै हिँड्नुभयो, सामान्य मानविय व्यवहारसमेत देखाउनु भएन’, उनले भने।
प्रत्यक्षदर्शीका अनुसार क्षेत्री सवार गाडी सडक लेन मिचेर सबैभन्दा दायाँको लेनमा पुगेको थियो। सिधा लेनमा जानुपर्ने गाडीले लेन मिचेर आएको स्थानीयले बताए।
उपाध्यक्ष क्षेत्रीले भने आफू सवार गाडीले ठक्कर दिएर भागेको नभइ बाटो पार गर्दा ध्यान दिएर हिँड्न सम्झाएको बताए। ‘मैले त्यसो भनेको होइन, मलाई हतार छ उपचार गराउन भैरहवा जाउँ भनेको थिएँ, तर उहाँले भैरहवा जान्न भनेपछि त्यहिँका साथीहरुलाई जिम्मा लगाएर हिडेको हुँ,’ उनले भने।
प्रहरी चौकी ड्राईभरटोलका अनुसार घाइते अधिकारीको अहिले मणिग्रामस्थित क्रिमसन अस्पतालमा उपचार भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
