काठमाडौं– काठमाडौं महानगरपालिका नेपाल विद्युत प्राधिकरणसँग महानगरपालिकाले तिर्नुपर्ने नियम र विद्युत महसुलको वैधानिक कागजात माग गरेको छ।
महानगरपालिकाले प्राधिकरणलाई सम्पत्ति कर बुझाउन भनेर आग्रह गरेपछि प्राधिकरणले महानगरपालिकासँग अर्बौं रुपैयाँ बत्तीको महसुल तिर्न बाँकी रहेको जनाएको थियो।
यसपछि मंगलबार महानगरपालिकाका मेयर बालेन शाहले सामाजिक सञ्जाल फेसबुकमा प्राधिकरणले महानगरपालिकाले तिर्नुपर्ने बक्यौता रकम नै उल्लेख नगरी पत्राचार गर्नु र संचारमाध्यममा दिनु गैरजिम्मेवारपूर्ण कार्य भएको बताएका छन्। उनले प्राधिकरणले गरेको बाक्यौता रकम दाबीसँग सम्बन्धित ५ वटा बुँदामा धारणा अघि सारेका छन्।
शाहले प्राधिकरणले महसुल दाबी गरेको क्षेत्र सडक, मठमन्दिर, सार्वजनिक स्थानको रहेको र महानगरवासीप्रति प्राधिकरणको दायित्व चाहिं के हुन्छ ? भनेर प्रश्न गरेका छन्।
‘कुन सडकमा कुन मिटरमा कहिले देखिको रकम बक्यौता रहेको उल्लेख नगरी काठमाडौं महानगरपालिकको नाममा पत्राचार गर्नु र सञ्चारमाध्यममा सो बिषयमा उल्लेख गर्नु गैरजिम्मेवार काम हो,’ उनले लेखेका छन्।
महानगरले तिर्ने कर वा बुझाउने महसुल महानगरवासीको रगत पसिनासँग जोडिएको र त्यस्ता कर सम्बन्धित निकायमा दाखिला हुने र नेपाल सरकार तथा संवैधानिक निकायहरुबाट यसको लेखापरीक्षण हुँदै आएको उल्लेख गर्दै मेयर शाहले ‘सडक बत्ति महानगरबासीले प्रयोग गर्ने हो। महानगरक्षेत्रबाट नेपाल बिद्युत् प्राधिकरणले आफ्नो आम्दानीको के कति रकम प्राप्त गर्दछ?,' प्रश्न गरेका छन्।
जनताप्रति जिम्मेवार हुने जनप्रतिनिधिले जनताको रकमको सदुपयोग गर्नु पर्ने दायित्वप्रति सजग रहेको पनि उनले स्पष्ट पारेका छन्।
उनले प्राधिकरणलाई लक्षित गर्दै महानगर नियमसंगत कर उठाउन पछि नहट्ने र वैधानिक कागजात लिएर आएको खण्डमा महसुल चुक्ता गर्न तयार रहेको कुरा जनाएका छन् ।
प्राधिकरणले सम्पत्ति कर नबुझाएको भन्दै महानगरलाइ बुझाउन ताकेता गर्दै आएको छ । करको विषयलाई लिएर पछिल्लो चरणमा दुई पक्षबीच असमझदारी बढ्दै गएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
