गुल्मी– गुल्मीमा सडक बालबालिका पहिचान अभियान २०७९ सुरु गरी व्यवस्थापन गरिएको छ। जिल्लाभित्रका अभिभावकविहीन १८ जना सडक बालबालिकाको पहिचान गरी व्यवस्थापन गरिएको छ।
सडक बालबालिकाहरूको पहिचान गर्नका लागि जिल्ला शिक्षा समन्वय एकाइ गुल्मीका प्रमुख लोकनाथ मरासिनी संयोजक रहेको पाँच सदस्यीय कार्यदल गठन गरिएको थियो। जसको सदस्यहरूमा जिल्ला समन्वय समिति गुल्मीबाट विष्णु भुसाल, रेसुंगा नगरपालिकाबाट कल्पना पाण्डे‚ नेपाल पत्रकार महासंघ जिल्ला शाखा गुल्मीका अध्यक्ष टोपलाल अर्याल, जिल्ला प्रशासन कार्यालय गुल्मीबाट नरेश गिरी, जिल्ला प्रहरी कार्यालय गुल्मीबाट प्रहरी नायव उपरिक्षक माधवराज खरेल छन्।
बालबालिका पहिचान कार्यदलले झण्डै ५० दिनमा महेन्द्र नमूना माध्यामिक विद्यालयमा उनीहरुलाई व्यवस्थापन गरेको हो। पहिचान समितिले १८ जना बालबालिकाहरुलाई विद्यालयको महेन्द्र मिनी होस्टेलमा व्यवस्थापन गरेको हो।
उनीहरुलाई बिहान ६ बजेदेखि बेलुका ६ बजेसम्म विद्यालयमै शिक्षकहरुले पढाउने, व्यावहारिक ज्ञान सिकाउने, खेलकुदका क्रियाकलापमा सहभागी बनाउने गरी उनीहरुको व्यवस्थापन गर्ने कार्यदलका संयोजक लोकनाथ मरासिनीले बताए। उनीहरुको व्यवस्थापन र सिकाइ २ जना शिक्षक खटाउने मरासिनीले बताए।
जिल्ला समन्वय प्रमुख द्रोणबहादुर खत्रीले सडक बालबालिकाको संरक्षणमा स्थानीय सरकारले सहयोग गरेको दाबी गरे। ‘जिल्लाका सरोकावाला निकायले मात्र हेरेर हुँदैन पहिला अभिभावक नै सचेत हुन जरुरी छ। यो अभियानलाई सफलसँगै बालबालिको भविष्य राम्रो बनाउन अभिभावकले ख्याल गर्नुपर्ने हुन्छ’, जिल्ला समन्वय प्रमुख खत्रीले भने।
महेन्द्र माध्यामिक विद्यालयको मिनी होस्टेलमा १८ जना बालबालिका बाहेक अन्य बालबालिकाहरुलाई राख्न नसकिने खत्रीले बताए।
रेसुङ्गा नगरपालिकाका नगरप्रमुख खिलध्वज पन्थीले सडक बालबालिकाहरुको व्यवस्थापन र संरक्षणमा रेसुङ्गा नगरपालिकाले चासो दिएर काम गरेको बताए। सडक बालबालिकाहरुको व्यवस्थापन गर्न पाउँदा खुशी व्यक्त गरे। यो अभियानमा रहेर काम गर्ने जिल्लाका सरोकारवाला निकायलाई पन्थीले धन्यवाद दिए।
रेसुङ्गा नगरपालिकाले आगमी दिनमा समेत यस्ता बालबालिकाको क्षेत्रमा काम गर्ने बताए। सडक बालबालिकाहरुलाई अध्ययनभन्दा पनि पहिला उनीहरुको आनिबानीमा परिवर्तन ल्याउन सके अभियानले सार्थकता पाउने विश्वास व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
