दाङ- दाङको राजपुर गाउँपालिका- ४ की श्यामकुमारी यादवले सासु नाता पर्ने कृष्णाकुमारी यादवलाई झुक्याएर चार कठ्ठा जग्गा आफ्नो नाममा पास गरेको खुलेको छ।
कृष्णाकुमारीको नाममा रहेको कित्ता नम्बर ५५८ को चार कठ्ठा १३ धुर जग्गा श्यामकुमारीले आफ्नो नाममा पास गरेकी हुन्।
आफूलाई उपचारका लागि लैजाने भन्दै बुहारी श्यामकुमारीले वडा कार्यालयबाट कीर्ते सिफारिस बनाएर मालपोत कार्यालय लमहीमा पुगी जग्गा पास गरेको सासु कृष्णाकुमारीले बताइन्।
कृष्णाकुमारी बिरामी भएका कारण धेरै बोल्न सक्दिनन्। आमाको सोझोपन र बिरामी भएको मौका छोपेर श्यामकुमारीले जग्गा आफ्नो नाममा पारेको कृष्णाकुमारीका छोरा सुरेश यादवले बताए।
जग्गाको एकल अंशियार आफू भए पनि थाहा नै नदिई जग्गा पास गरेको उनको भनाइ छ। सुरेशले भने, 'आमा बिरामी हुनुहुन्छ। धेरै बोल्न पनि सक्नुहुन्न। यही मौका छोपेर जग्गा रजिष्ट्रेसन पास गरिछन्। मलाई न्याय चाहियो जग्गा फिर्ता चाहियो।'
आइतबार दाङको लमहीमा पत्रकार सम्मेलन गरी सुरेशकी आमा कृष्णाकुमारीले नि:शुल्क उपचार गर्नका लागि भन्दै मालपोतमा औंठाछाप लगाउन लगाएको र आफूलाई जग्गा पासबारे केही थाहा नभएको बताइन्।
उनले भनिन्, 'म बिरामी छु, बोल्न पनि राम्रोसँग सक्दिनँ। बुहारीले उपचार गर्नुपर्यो, छुट हुन्छ भनेर कहाँ-कहाँ लगिन्, ल्याप्चे हान्न लगाइन्। छोराले जग्गा पास भइसकेको बताएपछि पो थाहा पाएँ।’
जग्गा आफ्नो नाममा गराउने बुहारी श्यामकुमारीले भने आफूले जालसाजी नगरी खरिद गरेको दावी गरेकी छन्। कृष्णाकुमारीले छोरो आवश्यक पर्दैन भनेपछि नबोलाएको र आफूले जग्गाको रकम चार लाख रुपैयाँबाट ८३ हजार रुपैयाँ ऋण तिरिदिएको र बाँकी रकम सासुलाई दिएको उनले बताइन्।
घरपरिवारको सल्लाहमै आवश्यक लिखत नबनाएको र आफूले रकम बुझाएको उनको दावी छ।
पीडित कृष्णाकुमारीले भने आफूलाई बुहारीले अलिकति पनि पैसा नदिएको बताइन्। कृष्णाकुमारीका आमा-छोरा न्यायका लागि मालपोत कार्यालय र प्रहरी कार्यालयमा समेत पुगेका छन्।
लमही मालपोत कार्यालयका प्रमुख मानबहादुर कुँवरले जग्गा बिक्री गर्नका लागि आवश्यक कागजात पूरा भएकाले रजिष्ट्रेसन पास भएको बताए। सहमतिविना जग्गा पास भएको भए रोक्काको प्रक्रिया अघि बढाउन उनले आग्रह गरे। पालिकाबाट पत्र आए आफूहरुले जग्गा रोक्का गर्ने उनले बताए।
यस विषयमा प्रहरीले पनि सक्रियता देखाएको छ। पीडित पक्षले निवेदन लिएर प्रहरी कार्यालय गए पनि मुद्दा दर्ता नभएको पीडित पक्षको भनाइ छ।
प्रहरीले भने यो मुद्दा देवानी अन्तर्गतको भएकाले दर्ता गर्न नमिलेकोले सरकारी वकिलसँग परामर्श गरिहेको बताएको छ।
जिल्ला प्रहरी कार्यालय दाङका प्रवक्ता डिएसपी राजनकुमार गौतमले मातहतका प्रहरी कार्यालयमा यस विषयमा गम्भीरता बुझेर सरकारी वकिलसँग परामर्श गर्न र अन्याय भएको भए न्याय दिलाउन लाग्न निर्देशन दिएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
