काठमाडौं– ललिता निवासको जग्गा घोटाला प्रकरणका मुख्य अभियुक्त शोभाकान्त ढकाल थुनामै रहने भएका छन्। थुनामुक्त हुन माग गर्दै ढकालले दिएको निवेदनको सुनुवाइ गर्दै आइतबार विशेष अदालतले थुनामै राख्न आदेश दिएको हो ।
विशेष अदालतका न्यायाधीशद्वय बलभद्र बास्तोला र खुशीप्रसाद थारुको जलासले ढकाललाई थुनामै राख्न आदेश दिएको हो।
ढकालले आफू ज्येष्ठ नागरिक समेत भएको भन्दै मुलुकी फौजदारी अपराध संहिताको दफा ७८ बमोजिम थुनामुक्त हुनुपर्ने माग गरेका थिए। दफा ७८ मा अभियोग प्रमाणित भएमा हुनसक्ने अधिकतम कैदको सजायको अवधिभन्दा बढी अवधिसम्म थुनामा नराखिने उल्लेख गरिएको विषयलाई आधार बनाउँदै ढकालले रिट दायर गरेका थिए।
तर, ढकाल कैद बसेको दुई वर्ष पनि भएको भन्दै उनलाई थुनामुक्त हुन आदेश नदिएको विशेष अदालतका प्रवक्ता दीपेन्द्रनाथ योगीले नेपाल लाइभलाई जानकारी दिए।
विशेष अदालत काठमाडौंले बालुवाटारस्थित ललिता निवासको ११३ रोपनी सरकारी जग्गा व्यक्तिको बनाई भ्रष्टाचार गरेको आरोपका मुख्य अभियुक्त मानिएका ढकाललाई २०७७ माघ २८ गते पुर्पक्षका लागि थुनामा पठाउन आदेश थियो। न्यायाधीशहरु अब्दुल अजिज मुसलमान, बालेन्द्र रुपाखेती र चन्द्रबहादुर सारूको संयुक्त इजलासले उनलाई थुनामा पठाउने आदेश दिएको थियो।
मुख्य बिचौलियाको भूमिका निभाएको आरोप लागेका ढकाल उक्त प्रकरणमा अनुसन्धान सुरु भएपछि फरार भएका थिए। म्याद जारी भएको करिब एक वर्षपछि विशेष अदालत हाजिर भएका उनलाई विशेषले थुनामा पठाउने आदेश जारी भएको थियो। ढकाल र रामकुमार सुवेदीले संयुक्त रुपमा उक्त जग्गा व्यक्तिको बनाउने कार्यमा मुख्य बिचौलियाको भूमिका निभाएको आरोप लागेको छ। सुवेदी लेखापढी व्यवसायीसमेत भएकाले उनको सहयोगमा चलखेल सुरु भएको बताइएको छ।
उनीहरुले समीरजंग कम्पनीका नामबाट व्यक्तिको नाममा मोही कायम गराउँदै सरकारी जग्गा व्यक्तिको बनाएको आरोप लागेको छ। ललिता निवास प्रकरणमा छानबिन र बयान गर्दा अधिकांश प्रतिवादीहरूले ढकालको नाम लिएका थिए। ढकालले आफू, श्रीमती र छोराछोरीको नाममा समेत बालुवाटारको जग्गा राखेको पाइएको थियो। उनले उक्त जग्गा राखेर आईएमई इन्स्टिच्युसनबाट १ करोड ९० लाख ऋणसमेत लिएका थिए। त्यस्तै सोही स्थानको सन्दीप ढकालका नामको जग्गा राखेर यति विकास बैंकबाट ४९ लाख रुपैयाँ ऋण लिइएको पाइएको थियो।
अख्तियार दुरुपयोग अनुसन्धान आयोगले विशेषमा दायर गरेको अभियोगपत्रमा शोभाकान्तकी श्रीमती उमासँग ९१ लाख २० हजार र ढकालसँग २९ करोड २७ लाख ९८ हजार बिगो मागदाबी गरिएको छ।
ढकालले यसरी व्यक्तिगत बनाएको सम्पत्ति बिक्री गर्नेदेखि बकसमा दिनेसम्मका कार्य गरेको अभियोगपत्रमा उल्लेख छ। ढकालले नै सत्तारुढ नेकपाका महासचिव विष्णु पौडेलका छोरालाई जग्गा बिक्री गरेका थिए। यो प्रकरणमा ढकालसँग पौडेलसमेत जोडिएपनि उनीविरुद्ध मुद्दा दायर भएन।
जग्गा फिर्ता र भ्रष्टाचार अभियोगमा संलग्न गरी १७५ जनालाई विपक्षी बनाउँदै अख्तियार दुरुपयोग अनुसन्धान आयोगले मुद्दा दायर गरेको थियो। अख्तियारले ११० जनालाई आरोपितका रूपमा र ६५ जनालाई जग्गा फिर्ताका लागि प्रतिवादी बनाएको थियो।
आयोगले बालुवाटारको ११३ रोपनी सरकारी जग्गा कीर्ते गरी व्यक्तिको नाममा दर्ता गरेको अभियोगमा ४ मन्त्री र तीन पूर्वसचिवसहित १ सय १० जनाविरुद्ध २०७६ माघ २२ गते भ्रष्टाचार मुद्दा दायर गरेको थियो। अख्तियारकै पूर्वप्रमुख आयुक्त, भूमिसुधार तथा मालपोतका कर्मचारी, जग्गा खरिद–बिक्री गर्नेहरूविरुद्ध पनि मुद्दा दायर भएको थियो। यसरी मुद्दा दायर हुने उच्च राजनीतिक व्यक्ति नेपाली कांग्रेसका उपसभापति विजयकुमार गच्छादार थिए। उनी विशेषबाट धरौटीमा रिहा भएका थिए।
यो प्रकरणको अनुसन्धान सीआईबीले गरेर कीर्तेमा मुद्दा चलाउने बताएपनि अहिलेसम्म मुद्दा दर्ता हुन सकेको छैन। सीआईबीले मुद्दा दर्ताका लागि सरकारी वकिल कार्यालयमा पेश भएको फाइल समेत एक पटक फिर्ता भएको थियो। त्यसपछि उक्त फाइल सीआईबीमै थन्किएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
